31 March 2007

ولـــــــــــد الهــــــــــــــدى Ahmed Moghazy

اليوم هو الثانى عشر من ربيع الأول , يوم ميلاد الرجل الأكثر تأثيرا فى تاريخ البشر منذ نزول ادم عليه السلام على الارض , ليس فقط الأكثر تأثير , بل و هو الإنسان الذى ظلم كثيرا قديما وحديثا , الإنسان الذى تجنى عليه الجميع حتى اتباعه وأقرب الناس إليه,الإنسان الذى جاهد كثيرا وتحمل كثيرا من أجل أن ينشر العدل والرحمة والمساواة بين الناس , والان هو عند كثيرين رمزا للتطرف والارهاب والعنف وما جاء به هو العنف والإنغلاق , نحن المسلمين نتحمل المسئولية وحدنا عن كل ذلك , نعم نتحملها جميعا مئة فى المئة , نحن أول من أساء إلى هذا الرسول الكريم , نحن أول من خالف رسالته وتعاليمه , ولا أقصد مسلمى اليوم فقط , لا الكلام للجميع ومنهم من عاش مع الرسول وشاهده وتحدث اليه, هل تتخيلوا أنه بعد 35 عاما فقط من انتقال الرسول الى المولى عز وجل تدب الفتنة بين الصحابة ويتقاتلون بينهم وتناسوا قول الرسول (ص) لهم فى خطبة الوداع : إن أموالكم وأولادكم ودمائكم عليكم حرام كحرمة يومكم هذا فى بلدكم هذا فى شهركم هذا .......لا ترجعوا بعدى كفارا يضرب بعضكم أعناق بعض
أين نحن اليوم من تعاليم وخلق سيد البشر , ألم يقل لنا :إنما بعثت لأتمم مكارم الأخلاق ؟
ألم يقل لنا :إنما أنا رحمة مهداه؟
ألم يقل لنا : عليكم بالصدق ..... وإياكم والكذب...؟
الم يقل لنا : المؤمن للمؤمن كالبنيان يشد بعضه بعضا؟
ألم يقل لنا : كل المؤمن على المؤمن حرام ماله ودمه وعرضه؟
ألم يقل لنا : أقربكم منى يوم القيامة أحسنكم خلقا ؟
ألم يقل لنا أنتم أعلم بشئون دنياكم؟
ألم تكن دولة الإسلام التى أقامها هى أثر الدول عدلا وحرية , والأكثر مساواة فى تاريخ البشرية , والأكثر تسامحا وتعايشا ؟
ألم يعطى هذا الأمى القادم من قلب الصحراء , ألم يعطى المرأة الحق فى أن تطلق نفسها و لها أن تكون العصمة بيدها , ألم يعطها الحق فى ان تخلع زوجها اذا استحالت العشرة معه ؟ وهو حق لم تحلم به المرأة فى الغرب نفسه؟
ألم يعطى الحيوانات حقها , األم ينهى عن احتجاز القطط دون إطعام , ألم يقل بدخول الجنة من يسقى الكلب العطشان؟
ألم يكن يهتم بأمر البيئة عندما نهى عن قطع الأشجار التى يستظل بها الأنسان أو الحيوان ؟ وعندما نهى عن التبول فى الماء الجارى؟ ...وعندما نهى عن الإسراف فى استهلاك الماء حتى لو كنا على نهر جار؟
ألم يضع قانونا للحروب منذ أكثر من ألف عام؟
ألم يرفض إشراك الصبية الصغار فى الحروب معه ,رغم قلة العدد والحاجة الماسة لمجهود أى فرد؟
ألم يقل لقادة الجيوش المسلمة وهو يودعها : سيروا بسم الله وعلى ملة رسول الله , لا تقتلوا شيخا ولا إمرأة ولا
طفلا , ولاتحرقوا بيتا ,ولا تقتلعوا زرعا , ولا تدخلوا قرية ليلا ؟
ألم يضع أول قوانين التعايش السلمى بين الاديان والمذاهب المختلفة ؟
الم يقل : من قتل معاهدا فلن يشم ريح الجنة ؟
ألم يقل : من اذى ذميا فقد اذانى؟
ألم يعفو عن عبد الله بن ابى بن سلول وكفنه فى قميصه وصلى عليه وهو الذى طعنه فى شرفه وكان رأس الفتنة فى دولة الإسلام؟
إن سيرة الرسول وخلقه وتعاليمه ومبادئه وحياته كلها فى حاجة إلى أن تظهر من جديد إالى المسلمين قبل غيرهم فى صورتها النقية الأصيلة
يجب أن نعلم النشء الصغير كل شىء عن رسوله
أين نحن اليوم من كل تلك القيم الشامخة الراقية؟ .....لو أننا التزمنا بها لكنا اليوم أكثر الأمم رقيا و؛حضارة , و أفضلها خلقا , وأكثرها استقرارا , وأكثرها عدلا وحرية وديمقراطية
لكن للأسف تركنا الأصول , وتمسكنا بالفروع والقشريات والتوافه والصراعات , تأخرنا وتقهقرنا عن جميع الامم الشرقية والغربية , وأصبحت سمعة رسولنا فى العالم كله سيئة لانهم وجدوا الإسلام فى تخلفنا وجهلنا وتعصبنا و دكتاتوريتنا وسوء أخلاقنا , وجدوا الإسلام فى مجتمعات غير قابلة للتقدم والتعايش بالعقل ,مجتمعات تريد ان تعيش فى العصور الوسطى ,تجلد الذات , وتبكى على الماضى وتتحسر على الذكرى
إنه برىء منا جميعا , نعم هو برىء من كل من أساء اليه بأن انتسب إلى الإسلام ولم يكن خلقه خلق رسول الإسلام
فاللهم صلى وسلم وبارك على سيد الخلق اجمعين سيدنا محمد وعلى اله وصحبه وسلم
امين

30 March 2007

مفيش فايدة may


"مفيش فايدة "

، هية دي الجملة اللي دايما اسمعها من الناس انصار التشاؤم

مثلا طلبت من بابا اروح الاستفتاء رفض و قال مفيش فايدة انتى فاكرة يا مفعوصة ان انتي اللي هاتصلحي الكون اجري افتحيلك كتاب ينفعك بدل العك اللى عملتية في امتحان التنمية و بعد الاعلان عن نتيجة الاستفتاء بالموافقة قاللى شوفتي بقى انى كان عندى حق اية رايك بقى؟

الاجابة : مفيش فايدة

24 March 2007

نمــــــــــــــــــــــل و نحــــــــــــــــــــــل Ahmed Moghazy

فى البداية الكلام المكتوب هنا هوعبارة عن مقال للدكتور الكبير زكىنجيب محمود , حبيت انى انشره بتصرف واختصار لانه مقال جميل ويستحق القراءة
...................................................
النملة تدخر القوت لفصل الشتاء , وهى اذ تخزن القوت الذى جمعته , تتركه كما وجدته , فحبة القمح تظل حبة قمح وقطعة السكر تبقى قطعة سكر دون أى تغيير , وتحتفظ به كذلك حتى إذا ما احتاجت إليه أخرجته كما خزنته أول مرة. أما النمل فأمره جد مختلف , لأنه ما إن يمتص من الزهور رحيقها , حتى يدير لها معامله الداخلية , لإنتاج شيئا جديدا مختلفا عن رحيق الزهور الا وهو العسل
وعلى طريقة النمل والنحل يكون الإنسان فى جميع معارفه وعلومه , فتارة تراه يقوم بعمل النمل , وتار أخرى يقوم بعمل النحل ,وكذلك بين الطريقتين تختلف الشعوب و الأمم , فمنهم من يقوم بعمل النمل ومنهم من يقوم بعمل النحل . ولسوء الحظ أن مصر منذ زمن بعيدا وهى تعيش حياة النمل ولا تقوم بعمل النحل إلا نادرا
لقد بدأت مصر نهضتها الحديثة منذ أكثر من 200 سنة , أى قبل أن تبدأ روسيا نهضتها بثلث قرن , وقبل اليابان بما يقرب من80 سنة , ولكنها طوال تلك المائتين سنة لم تبتكر الجديد الذى تضيفه لمسيرة النهضة الإنسانية كما فعل من بدأ بعدها , والسبب الأول - ضمن أسبابا أخرى كثيرة - هو إتباع طريقة النمل دون النحل
إن قيام أى نهضة لأى أمة من الأمم يقوم على خطوتين , الأولى خطوة نملية : تجمع فيها ما وصلت إليه معارف الأمم الأخرى وتستوعبها , الثانية خطوة نحلية : ويقوم فيها أصحاب المواهب بتحويل المعارف المجموعة تلك إلى إبداعا جديدا وفكرا مختلفا
أما فى مراحل الإنطفاء الحضارى والركود فإن الدارسين يحفظون عن ظهر قلب ما يتلقونه من مأثورات الأولين ليخرجوها فى المناسبات المختلفة وكأنها مومياوات محنطة فى توابيت محفوظة دون أن يمسسها أى تغيير
وقامت الحضارة العربية الإ سلامية على هذا الإساس , ففى المرحلة النملية جمع المسلمون كل ما وصل إليه اليونانيون والفرس والهنود وغيرهم من علوم وفلسفة وأدب , وترجموا كل ما وصلت إليه ايديهم , ثم جاءت المرحلة النحلية فظهر المولود الجديد المختلف عن كل الحضارات السابقة وهو الحضارة التى نتغنى بها كل اليوم ونبكى ليل نهار على أطلالها
نفس الشىء حدث فى أوروبا مع بداية عصر النهضة, فبعد مرحلة نملية جمعوا فيها تراث الاغريق وعلوم العرب المسلمين, انطلقوا بروح النحل يكتشفون الكرة الأرضية أسرارها ونواميس الكون وقواعده ونظرياته الحاكمة
وإلى اليوم نقف أمام رأيين لا ثالث لهما , فى أى مناقشة لأى قضية مهما كانت تجد رأيين ,, الأول يقول : قال أسلافنا , والاخر يقول : قال الغرب عن أسلافه ومعاصريه
لا بأس من أن نصغى لما قاله الأسلاف , وما قاله الغرب عن أسلافه ومعاصريه , بل هو ضرورى وحتمى لأى نهضة صحيحة, لكن البأس كل البأس هو الوقوف من هذين المصدرين موقف النمل فى الجمع والتخزين والتسميع وكفى , إذ يبقى دور النمل فى التحويل والتخليق
........................................................
من كتاب قيم من التراث
أ. د / زكى نجيب محمود

23 March 2007

الشدة يا ولاد بلدنا Amed Moghazy

أنا عارف إن الأيام دى أيام مشحونة بحاجات كتير , وخصوصا لطلبة الجامعات
وخاصة طلبة كليتنا العزيزة كلية الاقتصاد ,من ظهور النتيجة لأمتحانات المد ترم
للتعديلات الدستورية والاستفتاء عليها ودمغنا اللى هينفجر من كتر الكلام
عليها , علشان كدة أنا مقدر اللى كتبته الأخت عابرة السبيل عن عدم وجود وقت
فاضى للكتابة ومتابعة المدونة , وطبعا رمت الحمل عليا من أول يوم أشاركها فى
- المدونة , وعلشان أنا مريت بنفس اللى هى فيه دلوقتى فأنا هحاول- ولو بجزء بسيط انى املأ الفراغ اللى هتسيبه أختى العزيزة ,وأدعولها تعدى من الفترة الصعبة دى على خير
كلامى بقى لكل الحبايب اللى بيدخلوا على المدونة البسيطة دى , وخاصة من الطلبة
هقولكم شدو حيلكم وتعالوا على نفسكم شوية علشان تخلصوا وتتفضوا بقى من
الكابوس المزعج ده ,ممكن تكون المادة صعبة أو الدكتور غلس ومش فاهم أصلا , مش
مشكلة المهم إن انتوا كمان أسابيع بسيطة هتكونوا فى الإجازة والأيام الصعبة دى
هتكون مجرد ذكريات تبقوا تفتكروها لما السنين تعدى وكل شىء ينتهى إلا شوية ذكريات
ماتنسوش يوم الاثنين تروحوا وتشاركوا فى الاستفتاء وبلاش حكاية مفيش فايدة لاننا
هنتسأل عن عدم مشاركتنا , روحوا وقولوا رأيكم واعملوا اللى عليكم

22 March 2007

3abratalsabeel انا مالیش دعوة

انا بقول من الاول اهو
فى ناس ان شاء الله هتلاقوهم فى المدونة بتاعتى بيكتبوا..... مش هتعرفوا مين اللى بيكتب غير بالاسلوب بتاع كل واحد
الناس اللى بتكتب هنا دول انا اعرفهم وعجبهم البلوج وعايزين يكتبوا زيى وانا مااقدرش اقولهم لا طبعا وانا عارفة انهم هيشرفونى وهيكتبوا كلام كبييييييييييييييييييير انا مش قده




فى ناس ان شاء الله هتكتب فى السياسة اللى انا قلت من الاول انا ماليش فيها ، فى ناس هتكتب خواطر ، وناس معرفش لغاية دلوقتى هتكتب ايه .......بس كلهم نفسهم يكتبوا زيى ولان مدونتى اسمها صوت عالى فانا من واجبى انى اوصل صوتهم ليكم.... وبينى وبينكم كده انا هستفيد برضه مهم هيجيبوا ناس جديدة تقرا المدونة
:)

____________________________________________________________________


مش فاضية


مش فاضية ... مش فاضية ... مش فاضية .....
كلمة بقالى ايام وليالى عايزة اقولهالكم ..... بس ما جاتليش الجرآءة انى اقولهالكم ......
بجد مش فاضية ..... مش هقول اللى دايما بقوله ان الدراسة دى اكبر ظلم بيحصل للواحد فى حياته ، لانى استفدت منها كتير ، لكن هقول ان اسلوب الدراسة فى بلدنا يخلى الواحد يكره انه يفتح كتاب .... كل ده لانى مش فاضية امخمخ واكتب كلام حلو فى المدونة ...لكن الحمد لله حظى حلو مغازى هيحل محلى لغاية ما اخلص امتحانات الميدتيرم(امتحانات عزاب اعمال السنة)..... حد يتصور انى بقيت فى الجامعة ولسه عندنا امتحانات اعمال سنة .... ده ولا كأنى فى ابتدائى وبامتحن امتحان شهر .....

بجد مش فاضية ... ويقولولى بصى لنص الكوباية اللى مش فاضى ..... هو انا فاضية ؟!! ... انا مش فاضية ولا المترو فاضى ولا الشارع فاضى ولا الكلية فاضية ولاالمكتبة فاضية ولا عندى ولا ورقة فاضية اكتب فيها ..... كله مش فاضى ....
!!!!!!!!!!!!!!!!!!!!!!!

مافيش غير مكان واحد بس بشوفه فاضى ورغم كده كله ناس ببتتخانق وتزعق.... ورغم كده فيه ناس نايمة وناس بتاكل ولا كانه جنينة... كل مرة اشوفه فى التليفزيون اقول هو اشمعنا المكان ده فاضى كده؟ ولما حد فى مرة سمع سؤالى ده قالى : اصل اصحابه مش فاضيين وسايبينه وراحو يشوفوا مشاغلهم ......قلتله وهو مش المكان ده برضه من ضمن مشاغلهم ؟ قالى لا.... ده من ضمن اماكن التسلية بتاعتهم لما بيبقوا فاضيين بيجوا يقعدو فيه .... حقيقى صعبوا عليا حتى هما مش فاضيين ؟ وانا قال كنت فكرة ان تحت القبة شيخ .....

______________________________________________________________

اعلان هام جدا جدا جدا
______________
عرفت امبارح ان الاستفتاء بتاع تعديل الدستور ده اللى وجعنلنا دماغنا بيه فى الكليه هيبقى الاسبوع الجاى وكله ممكن يروح القسم اللى هو مولود جنبه يعرف هو اسمه فى انهى لجنة ويروح يقول رايه بالبطاقة الشخصية ..... يعنى ما حدش ليه حجة اهو .... والكلام ليكى يا جارة .... ايوة انتى بتبصى جنبك ليه؟ .... ايوة انتى انا عارفة انك هتكسلى وتقولى بلا كلام فاضى .... بس انا ناوية اروح وعايزاكى انتى كمان تروحى ..... اهى فسحة حلوة للقسم تشوفى اسدين قصر النيل .... اقصد الاتنين العساكر اللى على الباب واكيد لجنتك هتبقى فى مدرسة قريبة منك ويمكن تتطلع مدرستك .... تبقى كمان فسحة لمدرستك القديمة.....
ها قولتى ايه ؟ هتروحى انا عارفة ومتاكده انك مش هتسيبى حقك فى صوتك .... مش عايزة اعرف هتقولى فى ورقة الاستفتاء ايه ..... المهم انك تشاركى .... وبكرة احلى من النهاردة وبكرة الشمس هتطلع وبكرة النور هيبان .... ولا بلاش النور ده لحسن حد يفهمنى غلط
سلام عليكم






عاجز عن الشكر Ahmed Moghazy

أولا :انا مش عابرة السبيل

لكن أنا نلت شرف كبير وثقة غالية بمنحى المقدرة على الكتابة على هذه المدونة الجميلة
لكن ان شاء الله مش هكتب أى كلمة الا بعد مراجعة و موافقة كتابية من صاحبة الحق الاصيل وهى الاخت عابرة
السبيل , واتمنى ان افيد ومكنش ضيف غلس لانى لا اتمتع بخفة الظل التى تتمتع بها صاحبة المدونة

18 March 2007

3abratalsabeelنتكلم شوية

سلام عليكم .... بناء على نصيحة زميلة وصديقة عزيزة عليا....يعنى بناء على طلب الجمهور الغفير بتاعى.....اتكلم شوية .... هى قالتلى اتكلمى فى حاجة مفيدة.... وانا كنت هتكلم بس لما اخد نفسى... لكن لان ما حدش ضامن عمره
قلت اكتب النهاردة .... عشان خاطرك انتى بس يا (ح) ده اول حرف بس على ما استازنها انى اكتب اسمها كله .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اكلة ومش عاجبانى

تصوروا انى ادخل مطعم عشان اتغدى وأرم عضمى يقولولى ما عندناش غير اكلة واحدة وهى (رز ، خضار سوتيه _يعنى مسلوق_، سلطة ، لحمة _عارفينها طبعا_، عيش ) والاكلة كلها على بعضها وما ينفعش تغيري فيها حاجة وهتدفعى ثمنها على بعضها . ..... طيب انا مش بحب الخضار المسلوق ومش عايزة اكله ولا ادفع ثمنه ...... لا ما ينفعش يا تاخدى الاكلة على بعضها يا تمشى وما تاكليش خالص .....

حد يرضيه ده ؟ انا متاكده ان ما حدش هيحس بكلامى الا الغلابة اللى قاعدين فى المدينة الجامعية ولو انهم حظهم احلى من حظى على الاقل هما ممكن يجيبو اكل من بره لكن انا بقة ما عنديش غير المطعم ده اللى ينفع اكل منه......

طيب المطعم بيعمل رز حلو ولحمة مش بطاله والعيش مستورد من بره ما فيش مانع والسلطة بسيطة اهو فيها فيتامين ...لكن الخضار المسلوق ده مش بحبه ده للمرضى اللى معدتهم ما تقدرش تهضم ...لكن انا معدتى الحمد لله لسه فيها الرجا ... يبقى اكل الخضار ده ليه ؟ ولا ادفع تمن حاجة اطبخت غلط ليه ؟ وليه يعنى الاكلة على بعضها ؟ ما المطعم يخلى كل اكلة لوحدها يا اكلها يا اقول لا ...يعنى انا هرضى انهم يطبخوا الاكل بنوعياته دى كلها على بعضها لكن ما ارضاش انى اطحت ما بين اختيارين بس .... يا نعم ... يا لا .... ما ينفعش ده حتى يبقى ظلم ليا وللمطبخ اللى ممكن هيضيع فلوسه على اكلة هتترمى لما ما حدش يوافق يكلها

مش كان احسن يخلوا الواحد يقول نعم على اللى يحبه ولا على اللى ما يحبوش؟!!!! حد ممكن يقلى انت عاملة الدوشة دى كلها على الخضار المسلوق .... لا طبعا ....انا عاملة الدوشة دى على 34 نوع اكل مطلوب منى يا اكلهم كلهم يا افضل جعانة ومش لاقية اكل يقوينى ويساعدنى على انى اكمل مزاكرتى وشغلى وتفكيرى وبنا مستقبلى..... مش حقى برضه انى اعمل دوشة ؟
خاصة بقى انى قربت اجوع واروح المطعم..... اتفضلوا معايا .... المطعم هيفتح اول ابريل .... ربنا يسهل ....يـــــــــــــــــــــــــــــــا رب ..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عيد الام
ـــــــــــــــــــــــــــــــــــــــــــــ

حد يقولى اجيب هدية لماما ايه ؟ كل اللى حيلتى ما يكملش خمسة جنيه ...
اجيبلها شنطة ؟ شنطة ايه ... دا اخر شنطة كانت ب100 جنيه ......

حد يا ناس يجبلى هدية سلف ...... هما يومين هجبهاله تانى من غير تلف ......مهى مامى هدايها بتشيلها ليا..... لحد ما اكبر واخلص كلية

حد يا هووو يجبلى جتوه..... ماما بتحبه واخواتى بيخلصوه ..... عايزة اجيبه فى مرة واخبيه قبل ما عينى تيجى عليه.... وساعتها لا هلاقى شوكلاته ولا كريزة واحدة فوقيه ...

حد يا عالم يقولى اسم محل... هداياه فيه مالهاش حل ..... اشترى منه بسعر ااقل ... وارجع وجيوبى عمرانه ... بهدايا حلوة و محفظة دفيانه...

حد يشورنى انا اعمل ايه .... فى اليوم ده واجيب فيه ايه ...... ولو ان مهما انا اجيب.... مش راح اوفى حب عجيب ...

حب مهوش لمصالح ولا لنفاق .... حب لغالى ولابن حبيب .

كل سنة وانت طيبة يا ماااااااااااااامااااااااااااااااا
ـــــ ـــــــ ـــــــ ـــــــ ــــــ ــــــ ــــــ ـــــ ــــــ ــــــ ــــــ ــــــ ــــــ

حقوق النشر غير محفوظة( ملحوظة) سلام عليكم

14 March 2007

3abratalsabeelالخوف من المجهول

تحزير هام : قبل ما حد يقرا اى حاجة .......... اى حد عنده اكتئاب او عنده ميل للاكتئاب او بيفكر انه ينتحر ما يقراش الكلام اللى جاى , واصحاب القلوب الرهيفة واللى قلبهم قلب خساية واللى دمعتهم قريبة انا بقولهم المناديل على حسابى النهاردة . انا حزرت اهو عشان ماحدش بعد كده يدعى عليا



اللهم بلغت اللهم فاشهد












الخوف من المجهول


يخطر فى بالى سؤال ... لماذا الخوف من المجهول ؟ الانه مجهول؟ ام لتوقعنا الشر فيه؟ واذا ما كان المجهول فيه الشر... اونرهق انفسنا من خوف قد يصل الى حد الجنون؟ ام علينا ان نسعى جهدا الى اتقاء كافة السبل التى قد ياتى منها الشر؟!! اولن ياتى هذا المجهول فى يوما ما ليزعجنا ويشتت ازهاننا ويدمر احلامنا؟ .. اذا فلنحيا بعيدا عن الخوف .


اوقن ان الحزن , لا ليس الحزن بل الخوف , الخوف يملأنى يسرى فى بدنى ويقشعر قلبى كالثلج ....وسؤال يملؤنى رعبا ...... اهناك جديد ينظرنى ؟؟؟ ام ان الحال كالحال السابق لا يعنى بتغيير البال؟







النوم يثقل جفنى ....كاذب من قال بان النوم سلطان .....قد تغمض عينى لتنام لكن لب فؤادى ومخ عقلى يتفتح يخرج ما يخفيه الدهر والازمان ...يسكننى فكر جبار يجلو بين الحينة والاخرى كاشعار ...يتفتح عقلى كالازهار اه والازهار فهى قصة لاتمل الاعين قراتها



مالى لا ارغب فى النوم ؟!! ادرك ان هناك كثير الاقوال تحاول ان تعلو فوق الصفحات ولكن.....هيهات ان اعرف اسراركتاباتى ....هيهات ان اسبر غور افكارى او ان انتشل غموض كلماتى



يتثاقل راسى يمنعنى ان اكمل خطراتى ... فلننهى حديثى بلا فائدة تزكر.... اتمنى لو اعلم سر عزابى فارتاح



اعلم ان السر هو الخوف , بل ان الخوف لمغوار ... يقتحم اسوار القلب ويعتلى اعلى حصونه... فيموت القلب .. يموت القلب ويصبح عقلى غنيمة خوفى .... يستصرخنى قلبى يستنجد بى ... افاجيبه ام اتنازل عن حقى فيه؟ ساموت فى يوم ما ... فليحيا قلبى معى حتى الممات .... لن استسلم لمخاوف لا داعى لها.... لن يسلبنى الخوف ارادتى ... سوف اواجه خوفى واقف امامه لاكمل سيرى فى الحياة .



ان كان الخوف سيتملكنى اليوم فساصبح امة لغدى ... لا... لا لن اخشى من يومى ...لا لن اترك الخوف يسطير علي....وسياتى الغد وانا حرة ...لا لن ياتى الغد ليستعبدنى ...ااترك خوفى يحتال علي؟!! لا.... ساكون انا المحتالة.... ااخاف من الغد وبيدى اليوم؟ !!!! فليأتى الغد بما ياتى به فانا لن انتظر قدومه







كل يوم له شمس جديدة تسطع فى سمائه وتعلو ثم تدنو وتختفى .. ويهل القمر ليلا .. اما ليل طويل او قصير .... الكل يمضى..... فليمضى الخوف ان كان الغد سياتى ومعه الخير فمرحبا به, وان كان سياتى الغد ومعه الشر فتعسا له, لن يكون الشر الضيف الاول على طاولتى ولن تطول ضيافتى له ... فسيمضى كما اليل يمضى , وستشرق شمس من جديد ... شمس يعلم خالقها وقت مغيبها.... ساعيش يومى واتملكه .... ساعيش يومى بلا خوف ....بلا مجهول ..... بلا استعباد





بـــــــــــــــــــــــــــــــــس خــــــــــــــــــــــــــــــلاص





حد بقى يقولى مش فاهم معنى الكلام .... عموما هو الفيلم كده من غير ترجمة


سلام عليكم

12 March 2007

3abratalsabeelغاوية وجع دماغ

لانى غاوية وجع دماغ قررت انى اكتب لوحدى فى مدونة ليا لوحدى . كلام فى سركم كان فى مشروع مدونة مشتركة وانا ما صبرتش لما صاحبها يخلصها قلت خلينى هنا مع نفسى اعبر عن راى وشخصيتى بمزاجى

والله عندى كلام كتير اقوله بس خايفة اتقل عليكم

على فكرة انا اسمى عابرة سبيل عشان لو ما حدش عارف يقراها

اول فكرة جت فى دماغى اكتبها هى سؤال واسمحولى اتكلم بالفصحى شوية ......... ممكن؟

اين انا من هذا العالم؟
سؤال طرح نفسه فى عقلى وتغلب على تفكيرى لاكثر من اسبوع ......... من انا؟ ماذا على ان افعل تجاه كل ما يحدث حولى؟ اعلم بان الله خلقنى لاعبده ولكن اوليس العمل عبادة؟!!!!! كانت اجابتى على هذا السؤال هى انشائى لهذه المدونة فقد اوجدت لنفسى دورا الا وهو ان اكتب واشارك الاخرين افكارى لعلها تكون الشمعة التى تنير طريقنا بدلا من ان نلعن الظلام

كلامى كئيب وصعب ؟ مش اصعب من الواقع اللى عايشينه يعنى انا بعد ما خلاص عرفت كليتى الجميلة هتودينى على فين وعرفت انى لازم اخد كام كورس كده لغات وكمبيوتر عشان املى( السي فى) بتاعى وبعدين اروح الف على الشركات عشان يعطفوا عليا ويشغلونى ........ بعد ما عرفت طريقى ده لقيته طريق طويل وصعب فقلت لازم الاقى اى حاجة تانية اعملها عشان احس انى موجودة فى الدنيا

كتبت ولسه هكتب واعافر فى الدنيا لحد ما حقق اللى انا عايزاه وحتى لو جيت مرة ازرع ورد طلع بطيخ اهو برضه البطيخ حلو فى الصيف

11 March 2007

3abratalsabeelالسلام عليكم




الحمد لله بقيت بلوجر