12 March 2007

3abratalsabeelغاوية وجع دماغ

لانى غاوية وجع دماغ قررت انى اكتب لوحدى فى مدونة ليا لوحدى . كلام فى سركم كان فى مشروع مدونة مشتركة وانا ما صبرتش لما صاحبها يخلصها قلت خلينى هنا مع نفسى اعبر عن راى وشخصيتى بمزاجى

والله عندى كلام كتير اقوله بس خايفة اتقل عليكم

على فكرة انا اسمى عابرة سبيل عشان لو ما حدش عارف يقراها

اول فكرة جت فى دماغى اكتبها هى سؤال واسمحولى اتكلم بالفصحى شوية ......... ممكن؟

اين انا من هذا العالم؟
سؤال طرح نفسه فى عقلى وتغلب على تفكيرى لاكثر من اسبوع ......... من انا؟ ماذا على ان افعل تجاه كل ما يحدث حولى؟ اعلم بان الله خلقنى لاعبده ولكن اوليس العمل عبادة؟!!!!! كانت اجابتى على هذا السؤال هى انشائى لهذه المدونة فقد اوجدت لنفسى دورا الا وهو ان اكتب واشارك الاخرين افكارى لعلها تكون الشمعة التى تنير طريقنا بدلا من ان نلعن الظلام

كلامى كئيب وصعب ؟ مش اصعب من الواقع اللى عايشينه يعنى انا بعد ما خلاص عرفت كليتى الجميلة هتودينى على فين وعرفت انى لازم اخد كام كورس كده لغات وكمبيوتر عشان املى( السي فى) بتاعى وبعدين اروح الف على الشركات عشان يعطفوا عليا ويشغلونى ........ بعد ما عرفت طريقى ده لقيته طريق طويل وصعب فقلت لازم الاقى اى حاجة تانية اعملها عشان احس انى موجودة فى الدنيا

كتبت ولسه هكتب واعافر فى الدنيا لحد ما حقق اللى انا عايزاه وحتى لو جيت مرة ازرع ورد طلع بطيخ اهو برضه البطيخ حلو فى الصيف

9 comments:

Sanaa El-Banna said...

ألف ألف ألأف مبروك يا عابرة سبيل
وان شاء الله يكون المدونة صوت صادق بيعبر عنك .على فكرة عجبنى أوى كلامك على السايد بار ..هاتابعك ان شاء الله .

Ahmed Moghazy said...

الف مبروك يا عابرة السبيل على البلوج الجميل البسيط العفوى دة,ويارب يكون خير ليكى وتقدرى تعبرى عن نفسك فيه بحرية وموضوعية وهدوء بعيدا عن الشعارات الجوفاء والاراء والاحكام المسبقة
وان شاء الله هتابعك وهتابع كتاباتك على البلوج

3abratalsabeel said...

السلام عليكم ورحمة الله وبركاته
ربنا يكرمكم يارب كده وما يكسفكوش ابدا نورتوا المدونة وهستنى تعليقاتكم وكلامكم على طول سناء ليكى معزة خاصة عندى لاننا من بلد واحدة هى كليتنا اكيد هغلس عليكى وابعتلك كلام على المدونة بتاعتك على طول .

الخطاب said...

ياسلام ياعابرة لو فعلا فى يوم شفنا نتيجة لاى حاجة احنا بنحلم بيها


تخيلى بقىىىىىىىىىىىىىىىىىىىىىىىىىىىى

3abrtalsabeel said...

السلام عليكم
اولا: اهلا بيك يا الخطاب فى البلوج بتاعى وتنور فى اى وقت واتشرفت بكتابتك عندى
ثانيا: ليه اتخيل وانا وغيرى الحمد لله وانت كمان اكيد، شفنا احلامنا بتتحقق انا معرفكش صحيح لكن اكيد انت كنت بتحلم بحاجة وحققتها حتى ولو انك مثلا كنت بتحلم فى ليلة انك تلعب كورة مع صحابك وصحيت تانى يوم نزلت لعبت فى الشارع وجبت اجوان كمان.... مش دى نتيجة برضه؟!!!
على فكرة فى احلام كتير نقدر نخليها تتحقق وفى احلام لو حاولنا نحققها بتتحول لكابوس لانها ما بتبقاش خير لينا احلم انت بس واصحى حقق احلامك بس احلم على قد الواقع بتاعك عشان ما يجيلكش احباط .
سلام عليكم

Anonymous said...

سلام عليكم مبروك على مدونتك انا عاوزة اتعرف عليكى انت اكيد فى الكلية ومعانا فى الدفعة انا اسمى امانى المصرى لو حبيتى تتعرفى على

3abrtalsabeel said...

سلام عليكم
اهلا بيكى يا امانى هسال النهاردة مين امانى واكيد هتلاقينى بكلمك من زمان

الامل said...

الف مبروك ياعابرة السبيل على هذا
البلوج الرائع واتمنى ان يكون بمثابة
دفعة قوية لامل جديد وان يكون نوع من
الاشراقة على المستقبل الجميل ؛؛؛؛بغض النظر عن مساؤه
ووووووفى النهاية اتمنى لك مزيد من التعبير عن نفسك

3abratalsabeel said...

ماشى يا الامل شكرا جدا مع انى عارفة انك تعرفى تكتبى تعليق اكبر من كده وبلاش الكلام الرسمى ده وحياتك

الكلام ده خاص بالامل بس عشان انا اعرفها كويس
واعرف هى ممكن تكتب ايه

سلام عليكم