30 March 2007

مفيش فايدة may


"مفيش فايدة "

، هية دي الجملة اللي دايما اسمعها من الناس انصار التشاؤم

مثلا طلبت من بابا اروح الاستفتاء رفض و قال مفيش فايدة انتى فاكرة يا مفعوصة ان انتي اللي هاتصلحي الكون اجري افتحيلك كتاب ينفعك بدل العك اللى عملتية في امتحان التنمية و بعد الاعلان عن نتيجة الاستفتاء بالموافقة قاللى شوفتي بقى انى كان عندى حق اية رايك بقى؟

الاجابة : مفيش فايدة

6 comments:

Ahmed Moghazy said...

السلام عليكم , أولا نورتى المدونة وعايزين نشوف النشاط والكتابات الكبيرة الجميلة
لا فيه فايدة والله ,فيه فايدة فى كل شىء المهم العزيمة , طاب كنتى تصدقى إن مدينة زى دبى تبقى كدة؟ ولا منت تصدقى ان صحراء خالية مفيهاش غير شوية بدو يطلع منها دولة تهد النظام الكونى كله فى 25 سنة بس؟
كنتى تصدقى إنك تعدى من الثانوية وتجيبى مجموع يدخلك كلية الإقتصاد؟
مفيش مستحيل , كل حاجة لها مليون حل مش حل واحد

3abratalsabeel said...

سلام عليكم
طبعا فى فايدة ونص وتلاتاربع
انت اللى غلطانه من الاول، مش قلنا روحو طلعوا البطاقة من بدرى
وعلى فكرة باباكى هو كمان عارف ان فيه فايدة بس تلاقيه كان خايف عليكى من دخول القسم ولا حاجة
لو ما كانش فيه فايدة ماكانش اتنين مليون قالوا لا
وايه يعنى امتحان تنمية يعنى ؟ هو اخر امتحان ؟ ده يا دوبك تسخين للامتحان الكبير

ما حدش يقول ما فيش فايدة والدليل اهو اضرابات العمال واللى كان نتيجتها ان اصحاب الشركة عملوا اللى العمال عايزينه

اقتبس كلمة امى الشهيرة : (نقطة الماء تثقب الحجر ) مش كده ولا ايه ؟

may said...

السلام عليكم
اولا: شكرا انكم عبرتوني
ثانيا: خلاص مادام كلكو علية امرى لله حاحاول اتفائل ان شاء الله بس ادعولى
و السلام عليكم

Anonymous said...

ايوه يامى انا معاك انا كمان مش حاسه ان فيه فايده انا واحده من الشعب ...........اركب الاتوبيس تلاقيه يقف عند المطعم بدون اذن الركاب ويعطلنا تروحى تخلصى مصلحه تقفى فى طابور طويل 10 متر تلاقى اكتر من مصيبه بتحصل زى ايه ...ااقولك:الموظف اين كان لسه بيشرب الشاى وبراحته جدا ولو كلمتيه وقلتيله وقت العمل من فضلك يتنرفز ويقول والله ماواخد ورقك...والله دا حصل معايا اكتر من مره ......تانى مصيبه بقى الناس اللى بتدخل للموظف من الباب وهات يا بوس وسلامات ودول بقى ورقهم يخلص قبل الواقفين من ساعه واكتر ولا عزاء لكبار السن ولا المستاءزن من شغل ولا للعداله فى الطابور .........المصيبه التالته بقى ولا ااقولك كفايه عليك كدا يابنتى ..........كمان شوفى اللى بيحصل فى الشغل والنفاق اللااخلاقى ودا ليه طبعا علشان شوية مصالح واللى شغال بما يرضى الله ما يعجبش حد وفعلا حسبنا الله ونعم الوكيل.........وعندك العلاج على نقة الدوله ومادراك ما يحدث فيه وغيره وغيره وغيره ..........هانقول ايه ولا ايه ..................................وفى الاخر يقولولنا لا فيه فايده ........... ابقوا قابلونا ..والسلام عليكم ورحمة الله وبركاته

may said...

السلام عليكم
اية يا بنتى الاكتئاب دة انا صحيح متشائمة بس مش اقوى كدة و بعدين الموظفين دول مش من عالم اخر اكيد فى عيلة كل واحد فينا فى موظف يعنى لو كل واحد اتقى ربنا و راعا ضميرة ربنا هيكرمنا ان شاء الله
و السلام عليكم

Ahmed Moghazy said...

طيب نعمل اية ,فعلا حاجات كتير بايظة , نسكت ونمشى مع الماشيين وخلاص ؟
مش ممكن , كل شىء كبير بيبدأ بحلم بسيط , حتى لو كان مستحيل
هو الانسان كان يحلم انه يطلع على القمر ؟
التفاؤل اختيار وحيد امامنا مش باختيارنا نعرف نسيبه