30 April 2007

3abratalsabeel ويبقى الشعر

والله يا جماعة انا من فترة عايزة احط كام بيت شعر كده للشاعر فاروق جويدة ....بس كنت كل ماجى احطهم الاقى الوقت مش مناسب لا سياسيا ولا دراسيا
ففضلت ااجل لغاية النهاردة وقلت احطهم بقة فى وقت الروقان ده ....قبل ما مغازى يكتبلنا حاجة جديدة
بعد الكام بيت دول هتلاقوا شعر ملخبط كده ....ده شوية تخاريف قبل النوم ...مش تخاريف امتحانات يعنى زى بتاعة مى
سلام عليكم

ويبقى الشعر
------------------------



الفارس المخدوع القى راسه فوق الجدار

وكل شىء فى جوانحه همد

هربت خيولك من صقيع الياس

فالشطان حاصرها الزبد

وعلى امتداد الافق تنتحب الماذن

والكنائس ...والقباب

وصوت مسجون سجد

هذى الخيول ترهلت
ومواكب الفرسان ينقصها مع الطهر ...الجلد

هذا الزمــــــــــــــــــــان تعفنت فيه الرءوس

وكل شىء فى ضمائرها فسد

ان كان هذا العصر قد قطع الايادى والرقاب


فكيف تامن سخط بركان خمد

فاروق جويدة
------------------------------------------------------------------------------------------------



مــــــــــــــــزاد
------------------------------------

وقفوا يبايعوا عليها فى المزاد

واحد قال خمسة .....التانى فى صمتــه زاد

وقفوا يتقاسموا غنايم حرب كاسدة

غنايم حرب...ماعرفولـــــــــهاش ميـــــــعاد

ويتشاورا لمين هيدفع المهزوم

ومين فى الاخر هيضحــــــــــك على مين

ونسيوا ان الجيوش مابينهاش حروب

وان القلوب اتوحدت على دعاء ياســــين

الدنيا جرى فيها ايه ياولاد الحلال ؟

الحرام يتشرى والحلال يتبـــــــــــــاع

وكله عشان قرش فانى المآل

ولقمة زايلة ...ويموت الجيـــــــــــــاع

سلام عليكم

28 April 2007

MAY تخاريف الامتحانات

يااااااااااااااااااااااااااااااااه خلاص بيقولو فاضل تلات اسابيع و الدراسه تقف و فاضل اقل من شهر ع الامتحان اية دة التعليم بقى فية خم يا جدعان هوة احنا لحقنا ، اتذكر اول يوم ليا ف الكلية كانة امبارح معقول تلات سنين عدت و فاضل سنة واحدة
مش عارفة لية تواردت علية كل الافكار دى دلوقتى تقريبا تخاريف الامتحانات ايا كان انا عندى دلوقتى نوبة صراحة و شجاعة كافية للاعتراف بنعم ربنا الكتييييييير قوي ماهو الواحد لازم يفتكر ربنا وقت الزنقة
من اول لحظة لية بعد مجموع الثانوية العامة الكبير افتكرت انى حظى وحش عشان مادخلتش اعلام زى ماكنت عاوزة لكن قضاء ربنا نفد و الحمد لله لكن بعد كدة عرفت اد اية انا محظوظة
اولا اول يوم دخلت الكلية لقيت كل اصحابي بتوع فصل المتفوقين بتوع المدرسة الثانوي و كان الواحد في المدرسة خصوصا ان عدد الولاد قليل فلم اشعر اني تحولت من مدرسة بنات لكلية مختلطة
ثانيا الكلية قريبة جدا من بيتي بتاع تلت ساعة و مواصلة واحدة كمان
ثالثا اكتشفت انى انفع اشتغل اعلام برضة و انا خريجة سياسة
رابعا وجدت جو اسري جميل داخل الكلية دكاترة محترمين و ديمقراطيين و بيتعاملو مع الطلبة على انهم ولادهم مش اعدائهم زى باقي الكليا
خامسا اتعلمت حاجات كتييييير قوي وفهمت حاجات مهمة هاتساعدني في حياتي اتعلمت ازاي اسمع و افهم و بعدين اتكلم ازاي اكون موضوعية و محايدة و ابطل الحفظ و الصم بتاع ثانوي
وسادسا و قبل ماعابرة السبيل و مغازي يزعلو اتعرفت على اجمل و اطيب ناس في حياتى وبقيت بكتب في مدونة اصل التعليم بيروح و ييجي لكن الصحبة الحلوة ماتتعوضش
في النهاية انا هدفي م اللت اللى انا لتيتة كلة مش انى اغيظ الناس بتوع المدينة الجامعية اللى متشحططين او اللى ماقدروش يحبو الكلية لانهم دخلوها غصب عنهم زيى لكن هدفي انى اقول انه مش مهم دخلت بمزاجك ولا لأ المهم تفكر لية ممكن يكون ربنا دخلك الكلية دى بالذات اية الدور اللى لازم تلعبة في الكلية دى و اية المميزات اللى حصلت عليها ولسة ممكن تحصل عليها ماتبصوش للنص الفاضى م الكوباية بصو للنص المليان و اذا مافهمتوش حاجة م العك دة او كنتو مش متفقين معايا يبقوا تعالو على نفسكو و سامحونى مانا قولتلكو بقى تخاريف امتحانات وربنا مايوريكو
و السلام ختام

26 April 2007

3abratalsabeel مغازى از كمينج

مغازى ان شاء الله هيتولى مسؤلية المدونة لحين انا ارجع تانى ،الامتحانات بقة كل سنة وانتم طيبين
الراجل ده بقة هو المدير هنا ،اى حاجة هتبوظ ولا تتغير هو اللى هيبقى السبب
سلام عليكم

22 April 2007

3abratalsabeel غرقان فى شبر مية

سلام عليكم ....يلا سلام انا ماشية بقة




طيب ما فيش ماتخليكى شوية؟ ايه ده ؟دى معاملة ضيوف برضه؟




ما علينا ،خلينا فى اللى عايزة ااقوله النهاردة.......ايه بقة حكاية غرقان فى شبر مية دى ؟......




هو حاجة كده لما تقع فيها تبقى كانك غرقان فى شبر مية مش عارف تفلفص منه ....




مخكوا مايروحش بعيد .....اه ما انا عارفة ...فى ناس نيتها وحشة.....انا افهمكم عشان عارفة ان فى ناس سايببينه فى البيت:)...يلا بينا :-




جالى سؤال فى راسى كده :هو احنا ليه لما حد يجى يسالنا عن راينا فى حاجة بنعمل نفسنا فلاحيس(يعنى فالحين) ونفضل هاتك يا نصايح وتعليمات واراء فلسفية خطيرة ....ولما نيجى احنا بقة ناخد قرار فى ابسط امورنا تلاقينا عاملين زى الغرقان فى شبر مية ،مش عارفين حتى نفكر ....


ده انا حتى رحت اشترى جيبة اقعدت افكر فى اللون والشكل والموديل وهتناسبنى ولا لا ؟ وبعدين روحت من غير ما اشترى حاجة ....


يمكن فى ناس بتقدر تقرر بسرعة ...لكن فى ناس اعرفهم كتير وانا منهم لما اجى اختار حاجة بقعد افكر افكر افكرافكر افكر من هنا للسنة الجاية....ويمكن بقعد اسراااااااااااااااااااااح واافوق الاقى نفسى ما وصلتش لقرار


حقيقى حاسة انى بغرق فى شبر مية ...مش قادرة اتنفس انا بتخنق ....انا بمووووووووووووووووووووووووووت




ايه حيلكم ...انتوا صدقتوا ولا ايه ؟ لما انا اموت يعنى مين اللى هيكمل حملة مقاطعة النيسكافيه !!!!!...ده انا زعلانة قوى انا اجى اقاطع النيسكافيه يجيلنا ناس ولاد حلال يشربوا نيسكافيه ؟ يرضيكوا انتوا كده ؟ رغم انى مانعة الحاجات دى تخش البيت ...ماما صممت تشربهم نيسكافيه وهما ماقالوش لا!!!!!يلا بالهنا والشفا بقى ...بس انا برضه مش هشرب نيسكافيه


سلام عليكم ...ادعولى اخرج من شبر المية












19 April 2007

يــــــــــــــارب

يارب ..ساعدنى
عندما أشعر أننى أتألم فوق طاقتى
أو أرى ظروف الناس أفضل من ظروفى
أو أعتقد أن الفشل يطاردنى
أو أصدم لأن أحلامى تتبخر بعيدا عنى
أو أرتعب لأن اليأس يلوح فى أفقى
أو أخاف لأن الشر ينتشر
من حولى
يارب ساعدنى
أن آتى إليك بضعفى
وحيرتى وألمى
وأدرك أنك - رغم عدم استحقاقى -تحبنى
وتهتم بى
وتدبر كل الأمور لخيرى
يارب ساعدنى
أن استعيد ثقتى بنفسى
وأن يمتلىء بالرضا قلبى
ويلهج بشكرك لسانى
يارب

15 April 2007

3abratalsabeel لما شربت شوب النسكافيه

لما شربت شوب النسكافيه ...لقيت دماغى صهللت ...وعنية فنجلت ....وايدية اتوترت ...ورجلية لقيتها بتجرى لوحدها ....قمت اجبلى كام ورقة اكتب كام كلمة فى كام سطر واقدمهم بحث حلو كده فى قاعة بحث المراة والسياسة...مهو كله طلقسة والسلام ....لما جبت الورقة والقلم ..لقيتنى بكتب كلام غريب ...لا ليه دعوة بالسياسة ولا المراة ....قلت مش مشكلة ماحدش هياخد باله.....وبعدين لقيتنى بكتب حكيات قبل النوم بتعة ابلة فضيلة اللى بتيجى عشرة الصبح فى الراديو....قلت لا كده ما ينفعش اقوم اتفرج على التليفزيون احسن ...ولو انى كنت عارفة انه هيبقى فى ضرب نار من البيت ...والحمد لله لسه بقوم من هنا زن جرز الباب من هنا ..
الحمد لله ...خالو جه يعنى مافيش مزاركة النهاردة .......

على غير العادة خالو لاقانى عمالة الف فى الشقة زى النحلة ...زهق وطق من جنابه (بعد الشر )وقالى :ما تهمدى بقة ....انت كلتى ايه الناهردة ؟....قلتله: لسه شاربة شوب نسكافيه علشان اصحى ....قالى: اااااااه انا عرفت

اتارى بقة يا جماعة النسكافيه اللى احنا بنشربه ده طلع مضر جدا ....لدرجة ان الدكاترة بيقولوا ان الافضل اننا نشرب قهوة بداله ....ده طلع بياثر تاثير خطير على الخلايا العصبية ....خلى بقة الكام برج اللى فاضلين فى دماغنا ما يبوظوش ...لحد بس ما نخلص كلية....لذا انا قررت انى مش هشرب نسكافيه تانى ابدا ...حد يحب ينضم لقافلة مقاطعة النسكافيه؟

انا خلصت كلام النهاردة ...مش هطول عليكم، سلام عليكم

14 April 2007

3abratalsabeel ماشى ...شكرا

سلام عليكم ،شكرا ليكم جدا يا جماعة والله انتو كمان وحشتونى خالص....حقيقى مش مصدقة كم الرسائل والايميلاات اللى وصلتنى منكم ،كل ده عشان اتاخرت فى الكتابة؟!!! ماكنتش اعرف انى ليا قراء كتير قوى كده ...ماشاء الله لا قوة الا بالله....لحسن احسد نفسى

سيبكم من كلمتين الفشر دول ،انا هكتب بس شوية كده لما افضى ....هو انتوا فاضيين؟

07 April 2007

لو بطلنا نحلم ....نفوق MAY


الشعب المصرى شعب له طموح بلا حدود يحلم دائما بالافضل و الاجمل ، و مالة بس لحد امتى هانفضل نحلم عايزين نصحى عايزين نفوق عايزين نشوف الواقع اللى بنحلم ان احنا نغيره ، لكن لو فضلنا نحلم ف الخيال كدة مش هانقدر نحقق احلامنا انا ما بقولش اننا نبطل نحلم خالص بس احنا خدنا وقت طويل اقوى ف الاحلام يعنى مثلا المصريين بيحلموا بالحرية من ساعة الاحتلال الانجليزى و لحد دلوقتى لسة ماخدنهاش رغم ان الانجليز مشيوا من 55 سنة و اذا كان حلم الحرية اخد مننا 125 سنة امال هايتحقق ف كام سنة و بخصوص الموضوع دة فى جملة مهمة جدا اتقالت ف فيلم "فتح عينيك " على لسان الفنان خالد زكى الذى كان يمثل شخصية اجنبية شريرة :احنا بنحلم عشان نحقق الاحلام اما انتو بتحلموا عشان تهربوا م الحقيقة
عايزين نبقى واقعيين شوية لا شويات و شويات ، بس الخوف كل الخوف اننا ما نبقاش نايمين الخوف اننا نكون متنا و مش حاسين زى فيلم the others و دى بقى مالهاش عندى حل
النداء الاخير ع الشعب المصرى : اصحى احسنلك لحسن مش هايكفينى فيك مية النيل كلها عشان افوقك
اصحى قبل ما يفوتك المدرسة قصدى القطر

02 April 2007

MAY احنا عايزين اية ؟


المشهد التمثيلى : الاسرة على وشك الانهيار و الضياع ،الاب سيترك المنزل و يتخلى عن زوجتة و اولادة

الاخ المثقف يسال : احنا عايزين اية فى المصيبة اللى احنا فيها ؟

الاخ الكبير الفاشل : انا عايز ربع جنية و اتكل على الله

الاخ الصغير السلبى : انا عايو صندل و جلبية

المشهد الواقعي : مصرنا المحروسة تنحدر و تهوى و تتعثر و تغلى و حالتها بالبلة

شخص عاقل -مش انا طبعا- يسال : احنا عايزين اية فى المصيبة دي ؟

اجابة : انا عاوزة اتجوز و اقعد فى البيت

اجابة : انا عايز اسافر برة

اجابة :انا عايز اطمن ع العيال

كل واحد بيفكر فى نفسة ما حدش بيفكر فى مصر مع انها اهم حاجة فى حياتنا و لو ضاعت كلنا هنضيع كل واحد بيحلم باحلام خاصة ينفع يحققها اوحدة انما مصر مش هاينصلح حالها من غير ال75 مليون

الحل التمثيلى : اجتمع البناء من اجل منع انهيار البيت و ضياع الاسرة لانهم عرفوا اخيرا همة عايزين اية عايزين البيت و الاسرة و الامان .

الحل الواقعى : لازم نعرف احنا عايزين اية ؟ عايزينها ديمقراطية ولا اسلامية ولا مهلبية عايزين مبارك ولا حد تانى

فى رايي المتواضع مصر مش هاتتصلح الااذا كان كل واحد عارف هوة عايز اية زى ما هوة عارف اسمة

و السلام عليكم

01 April 2007

3abratalsabeel هو انتى اللى كاتبه الكلام ده ؟!!!!!!!!

السؤ ال دهاتسألته لغاية دلوقتى ييجى اربع خمس مرات وكل مرة اسمعه بطريقة واسلوب مختلف رغم انه بيتكون من نفس الحروف والكلمات ............اخر مرة كان السؤال بالطريقة دى : هو انتى اللى كاتبة الكلام ده ؟ ولا ده
يعنى قص ولزق copy&paste نظام
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

سؤال استفزنى جدا .... بس لما قعدت افكر مع نفسى ،لقيت ان اللى سألوه معزورين برضه، مهو رغم انهم يعرفونى من سنتين وتلاتة لكن ما حدش فيهم قدر يفهمنى صح ولو مرة واحدة وده مش زنبهم لكن احنا بقينا فى زمن ما حدش فاضى يفهم حد

مش عيب ولا غريب ان الواحد مايقدرش يوصل افكاره بالكلام ، لكن الغريب ان الواحد لما يقدر يوصل افكاره بالكتابه الناس تستغرب وتسال : هى دى عابرة السبيل اللى نعرفها ؟ او انهم يشكوا ان الكتابة دى مش كتابتى
حقيقى انا اللى استغربت
:(

السؤال ده عامل بالظبط زى ما حد يجى يقدم ولاده لواحد صاحبه ما شفهوش من زمان ويقوم صاحبه ده يسأله : ويا ترى انت متجوز بقى ؟

واللى يخلى الواحد يضحك ان فى ناس كانت عجباها المدونة قبل ما يعرفوا من اللى بتكتب فيها .......بس بعد ما عرفوا اختفوا ولا بقوا يقولوا اى حاجى عن المدونة ........ حاجة غريييييييييييييييييبة

وصلت من هنا ان دايما الناس بتبنى رايها عن الشخص بالشكل بس ....وصلت للتفسير ده من انى رحت فى مرة وانا فى الكلية بصيت لنفسى فى المرايا وعرفت السبب ......
يا جماعة ان كان شكلى يوحى بانى شايله طاجن البامية بتاع تيته فوق راسى فده شكلى .... انا كده ...خلقتى كده ... وبصراحة مش عارفة انتوا ليه استغربتوا لما قريتوا كلامى فى المدونة !!!!!!!!! حد جريء كده يرد على سؤالى ده بس من غير ما يعرفنى هو مين ......
انا مش زى حكومتنا الشفافة اوافق ان يبقى فى معارضة مسموعه فى البلد .... انا يا دوبك ممكن اعرف ان فى حد بيعارضنى بس احسنله مايقولش هو مين عشان انا بقة زعلى وحش ....

سلام عليكم