15 April 2007

3abratalsabeel لما شربت شوب النسكافيه

لما شربت شوب النسكافيه ...لقيت دماغى صهللت ...وعنية فنجلت ....وايدية اتوترت ...ورجلية لقيتها بتجرى لوحدها ....قمت اجبلى كام ورقة اكتب كام كلمة فى كام سطر واقدمهم بحث حلو كده فى قاعة بحث المراة والسياسة...مهو كله طلقسة والسلام ....لما جبت الورقة والقلم ..لقيتنى بكتب كلام غريب ...لا ليه دعوة بالسياسة ولا المراة ....قلت مش مشكلة ماحدش هياخد باله.....وبعدين لقيتنى بكتب حكيات قبل النوم بتعة ابلة فضيلة اللى بتيجى عشرة الصبح فى الراديو....قلت لا كده ما ينفعش اقوم اتفرج على التليفزيون احسن ...ولو انى كنت عارفة انه هيبقى فى ضرب نار من البيت ...والحمد لله لسه بقوم من هنا زن جرز الباب من هنا ..
الحمد لله ...خالو جه يعنى مافيش مزاركة النهاردة .......

على غير العادة خالو لاقانى عمالة الف فى الشقة زى النحلة ...زهق وطق من جنابه (بعد الشر )وقالى :ما تهمدى بقة ....انت كلتى ايه الناهردة ؟....قلتله: لسه شاربة شوب نسكافيه علشان اصحى ....قالى: اااااااه انا عرفت

اتارى بقة يا جماعة النسكافيه اللى احنا بنشربه ده طلع مضر جدا ....لدرجة ان الدكاترة بيقولوا ان الافضل اننا نشرب قهوة بداله ....ده طلع بياثر تاثير خطير على الخلايا العصبية ....خلى بقة الكام برج اللى فاضلين فى دماغنا ما يبوظوش ...لحد بس ما نخلص كلية....لذا انا قررت انى مش هشرب نسكافيه تانى ابدا ...حد يحب ينضم لقافلة مقاطعة النسكافيه؟

انا خلصت كلام النهاردة ...مش هطول عليكم، سلام عليكم

13 comments:

may said...

السلام عليكم
اتاري بقى الموضوع في نيسكافية و انا برضة بقول هية عابرة السبيل بتهيس كتير لية كل ما اشوفها طب الحمد لله انك عرفتى المشكلة جاية منين اصل انا بهيس ف الابحاث مع اني ما بشربش نيسكافية ولا حاجة ، و بعدين اية حكاية حواديت قبل النوم اللي الساعة عشرة الصبح و الله شكلك لسة مابطلتيش نيسكافية ولا حاجة ياما بقي المشكلة مش ف النيسكافية
والسلام عليكم

Ahmed Moghazy said...

اولا حمد الله على السلامة , المدونة من غيرك مكنلهاش طعم ولا شكل , شكلك كدة رجعتى زى زمان والحمد الله , بس الواحد لو مشى ورا الدكاترة والله ماهياكل ولا يشرب ولا يتنفس كمان , فجأة كدة بقى النسكافيه مضر؟
طاب خالو جاب الكلام ده منين ؟ مصدر موثوق فيه ولا...؟
طاب اية اخبار الشاى ؟ انا مدمن شاى وهزعل جدا لو طلع هو كمان من الممنوعات

Ahmed Moghazy said...

اية يا مى ؟ اية اللى لاحظتيه على عابرة السبيل؟ قولى يمكن اعرف السبب , بتهيس بتقول اية؟
دا الحكاية كبيرة بقى , ربنا يستر , انت بتشربى اللى يتحلرق ده من زمان يا عابرة السبيل؟
على العموم متخافيش المدونة فى ايد
امينة وهنعمل حملة دولية ضد النسكافيه

ولا اقولك خليكى معايا فى الشاى, مننا وعلينا

3abratalsabeel said...

سلام عليكم

شكلنا كده هنقعد نكتب ونرد على نفسنا
احنا عاملين زى مثلث برمودا

وايه حكايتكم انتم الاتنين ،هتتسلوا عليا ولا ايه؟ الحق عليا انى بقولكم حاجة مفيدة ،وانا بزمتك يا مى بهيس ؟انا بهييص بس

طبعا خالو كلامه مظبوط وموثوق فيه جدا حتى روح اسال بتاع البن هيقولك طبعا البن ارحم على الاقل مغشوش واخف فى التاثير من النسكافيه

اما الشاى فهو لسه تحت وطاة التحقيقات لما يخلصوا كلام عليه ابقى اقولك ....

وبعدين مالها مى بقة؟ دى حتى كتبت موضوعين حلوين ،ماتزعلهاش منك يا مغازى لحسن هيطلع زعلها عليا انا

سلام عليكم

أحمد المصري said...

نبطل نسكافيه ؟!!!!!
مستحيل طبعا انا لو مش شربت نسكافيه اول ما اقعد على المكتب الصبح احتمال كبير اترفد ست مرات على الاقل من اللي هاعمله
نو واي
تحياتي

3abratalsabeel said...

اخيييييييييييييرنننننننننننننننن

ياااااااااااه الحمد لله ربنا استجاب دعائى وجابلنا حد جديد يرد على كلامنا

اهلا ومرحبا بك يا مصرى والله نورتنا وشرفتنا ،تشرب شاى ،تشرب قهوة ؟ولا اجيبلك نيسكافيه؟

علشان خاطرك انت بس يا مصرى هنسيبك تشرب نيسكافيه

ياللا سلام

لا نيسكافيه بعد اليوم... اعصاب دماغى اهم اهم

safa7_karmooz said...

كل ده من شوب مسكوفيه

انا الحمد الله مافيش حاجه بتأثر فيا ...
ولا مسكوفيه ولا سابووة حتى

كله عندى سواااء زى الميه

افتكر ايام امتحانات اول ترم كنت فى يوم مطبق وشربت ما لا يقل عن 8 مسكوفيه..4 شاى..5 قهوة بن تقيييييل ...ورغم كده...روحت الامتحان حليت فى ساعه...ونمت الساعتيين التانيين ..:)


يلا واحد جديد كمان جه يرد عليكوا :D

Ahmed Moghazy said...

احمدك يارب , ولا تزعلى يا عابرة السبيل , زرغدى يا مى , هللى يا عابرة السبيل , المدونة بدأت تنتشر وتجيب زباين

شكراجدا يا مصرى على الزيارة
وانت كمان يا
safa6
وخلوكو متابغين فيه حاجات كتيرة لسة هتنزل قريب

واشربو النسكافيه,متخافوش , دى اكيد عابرة السبيل جالها اتصال من كبريات الشركات العلمية للشاى , وطلبت منها تستغل المدونة اللى شعبيتها فى كل مكان, علشان تعمل حملة تشوه فيها سمعة النسكافيه المسكين الغلبان

may said...

السلام عليكم
اية دة يا جماعة اية الزحمة دي الظاهر اشتهرنا صحيح زيد و بارك يا رب كمان و كمان
اعتذر يا مغازي مابعرفش ازغرط ينفع اصفر و مرحبتين بالزوار المصري و السفاح
سلام عليكم

Ahmed Moghazy said...

مش مشكلة يامى
صفرى
بس وطى صوتك اصل الجيران تصحى
ولا اقولك
ازرغد انا بدالك
ههههههههههههههههه

3abratalsabeel said...

بلا زغردة بلا كلام فارغ

احنا هنقلب المدونة ملعب كورة ؟

ما تنتبهوا لمزاكرتكوا وشغلكوا

انتوا ايه ما بتصدقوا عابرة السبيل تمشى من هنا انتو تقعدوا تلعبوا من هنا ؟
هو ان غاب القط العب يا فار ولا ايه؟

3abratalsabeel said...

اهلا بكل الناس اللى تيجى عندنا ده احنا نفرشلهم الارض ورد ورمل ودقوا الشماسى دقوا الشماسى

بس برضه مش عندنانيسكافيه

وانت سفاح ليه ؟اكيد انت من كليتنا المصون

may said...

السلام عليكم
اية يا عابرة السبيل مالك داخلة فينا شمال انا و مغازي و بعدين عمالة تدي نصايح و روحوا ذاكروا و ناموا بدري و ماتشربوش نيسكافية و مغرقالنة المدونة مية و احنا ساكتين
و الله لو ماسكتي هاسيبيك غارقانة ف شبر المية و مش هانقذك ياما هاخد شنططي و اعزل عند مغازي
واذا كنتي عاملة نفسك قط بسسسسسسس بقى من هنا
هههههههههههههههههههه
و السلام عليكم