22 April 2007

3abratalsabeel غرقان فى شبر مية

سلام عليكم ....يلا سلام انا ماشية بقة




طيب ما فيش ماتخليكى شوية؟ ايه ده ؟دى معاملة ضيوف برضه؟




ما علينا ،خلينا فى اللى عايزة ااقوله النهاردة.......ايه بقة حكاية غرقان فى شبر مية دى ؟......




هو حاجة كده لما تقع فيها تبقى كانك غرقان فى شبر مية مش عارف تفلفص منه ....




مخكوا مايروحش بعيد .....اه ما انا عارفة ...فى ناس نيتها وحشة.....انا افهمكم عشان عارفة ان فى ناس سايببينه فى البيت:)...يلا بينا :-




جالى سؤال فى راسى كده :هو احنا ليه لما حد يجى يسالنا عن راينا فى حاجة بنعمل نفسنا فلاحيس(يعنى فالحين) ونفضل هاتك يا نصايح وتعليمات واراء فلسفية خطيرة ....ولما نيجى احنا بقة ناخد قرار فى ابسط امورنا تلاقينا عاملين زى الغرقان فى شبر مية ،مش عارفين حتى نفكر ....


ده انا حتى رحت اشترى جيبة اقعدت افكر فى اللون والشكل والموديل وهتناسبنى ولا لا ؟ وبعدين روحت من غير ما اشترى حاجة ....


يمكن فى ناس بتقدر تقرر بسرعة ...لكن فى ناس اعرفهم كتير وانا منهم لما اجى اختار حاجة بقعد افكر افكر افكرافكر افكر من هنا للسنة الجاية....ويمكن بقعد اسراااااااااااااااااااااح واافوق الاقى نفسى ما وصلتش لقرار


حقيقى حاسة انى بغرق فى شبر مية ...مش قادرة اتنفس انا بتخنق ....انا بمووووووووووووووووووووووووووت




ايه حيلكم ...انتوا صدقتوا ولا ايه ؟ لما انا اموت يعنى مين اللى هيكمل حملة مقاطعة النيسكافيه !!!!!...ده انا زعلانة قوى انا اجى اقاطع النيسكافيه يجيلنا ناس ولاد حلال يشربوا نيسكافيه ؟ يرضيكوا انتوا كده ؟ رغم انى مانعة الحاجات دى تخش البيت ...ماما صممت تشربهم نيسكافيه وهما ماقالوش لا!!!!!يلا بالهنا والشفا بقى ...بس انا برضه مش هشرب نيسكافيه


سلام عليكم ...ادعولى اخرج من شبر المية












7 comments:

Ahmed Moghazy said...

على حد علمى والله اعلم انك ياعابرة السبيل مش غرقانة فى شبر مية , انت فى قاع المحيط الهادى يا ماما
دا لو كان اللى فى بالى صحيح
فعلا اعطاء النصائح سهل جدا , لكن التطبيق على النفس بيكون صعب
يمن لان اللى ايده فى شبر المية مش زى اللى ايده فى جوة جيبه
بس ممكن وانت نازلة تشترى الجيبة, تاخدى واحدة صحبتك معاكى وتشوروا على بعض
علشان لما تطلع مش كويسة تطلعى غلك فيها

على فكلرة انا زيك بالظبط
لو نزلت اشترى الى شىء
افضل الف الف الف والاخر اروح من غير ولا حاجة

قوليلى بقى بصراحة مين اللى وحاكى على النسكافيه؟؟؟؟
قولى متتكسفيش
خدتى كام منهم؟
بالنص بقى

may said...

السلام عليكم
يا بنتي الموضوع بسيط اقوي انتي ماعرفتيش تجيبي الجيبة عشان ما خدتينيش معاكي دة انا كنت هانقيلك و ابسطك اوي
بس بالنسبالى انا عمري ما باغرق في شبر مية مع اني ما بعرفش اعوم لكني صريحة مع الناس و عمري ما انصح حد بحاجة انا ما اكونش راضية بيها لنفسي و في حكاية شرا اللبس دي انا مجننة امى و اختي عشان رايي اني اشتري اي حاجة معقولة و خلاص يعني هية هاتفضل علطول و اي حاجة تحصلي و ماكنتش اخترتها بقول ان الخيرة فيما اختارة الله
و خدى اى جيبة و متعقديهاش
و السلام عليكم

Anonymous said...

انا بقه مشكلتى انى بكسل انى انزل اشترى اصلا ..بس لما ربنا يريد..بروح اشترى وساعتها بقه مش بحتار لا ساعتها مش بيعجبنى اى حاجه لانى بحب اشترى حاجه مميزه


وكان الله فى عون الجميع

Anonymous said...

السلام عليكم
انا اول مره ارد على حد فى المدونات
وبسراحه مش عارف هو اصلا كده انا برد صح ولا لا
المهم
بالنسبه لشبر المياء الى عابرت سبيل غرقانه فيه عادى كلنا بنغرق فى الشبر ده بس المهم الواحد يحاول ينقظ نفسه الزاى هو ده المهم وبعدين كثره التفكير فى الامور دى بيتعب

عابرة السبيل said...

والله مش عارفة اشكركم ازاى ،ربنا يخليكم ويحققلكم اللى نفسكم فيه
الحمد لله بدعائكم خرجت من شبر المية
بس شكلى هغرق بجد فى المحيط الهادى ،على راى مغازى ،بس مش عشان مش عارفة اشترى الجيبة ،لا علشان الابحاث اللى لسه ماخلصتهاش

ادعولى تانى ،شكلكم سركم باتع

شكرا شكرا شكرا وجزاكم الله كل خير

عابرة السبيل said...

يا مغازى انا ماليش فى النسكافيه ومش هقولك ليه ومش هقولك كمان على اسم الشركة ،ايه الناس القطاعين للارزاق دول

سلام عليكم

Ahmed Moghazy said...

الحمد لله على الخروج من الشبر اللى كنتى فيه

بس انا معرفتش لسه الشبر كان اية؟
بس هعرف يعنى هعرف

ومش بس الشبر
لا هعرف اسم الشركة اللى بتدفعلك
وتمولك الحملة الشرسة ضد المجنى عليه النسكافيه

Moghazy is coming
كدا من غير ما تشورينى؟
ماشى مردودالك يا عابرة السبيل
انتا بقى طول الصيف هتشيلى الحمل لوحدك