30 April 2007

3abratalsabeel ويبقى الشعر

والله يا جماعة انا من فترة عايزة احط كام بيت شعر كده للشاعر فاروق جويدة ....بس كنت كل ماجى احطهم الاقى الوقت مش مناسب لا سياسيا ولا دراسيا
ففضلت ااجل لغاية النهاردة وقلت احطهم بقة فى وقت الروقان ده ....قبل ما مغازى يكتبلنا حاجة جديدة
بعد الكام بيت دول هتلاقوا شعر ملخبط كده ....ده شوية تخاريف قبل النوم ...مش تخاريف امتحانات يعنى زى بتاعة مى
سلام عليكم

ويبقى الشعر
------------------------



الفارس المخدوع القى راسه فوق الجدار

وكل شىء فى جوانحه همد

هربت خيولك من صقيع الياس

فالشطان حاصرها الزبد

وعلى امتداد الافق تنتحب الماذن

والكنائس ...والقباب

وصوت مسجون سجد

هذى الخيول ترهلت
ومواكب الفرسان ينقصها مع الطهر ...الجلد

هذا الزمــــــــــــــــــــان تعفنت فيه الرءوس

وكل شىء فى ضمائرها فسد

ان كان هذا العصر قد قطع الايادى والرقاب


فكيف تامن سخط بركان خمد

فاروق جويدة
------------------------------------------------------------------------------------------------



مــــــــــــــــزاد
------------------------------------

وقفوا يبايعوا عليها فى المزاد

واحد قال خمسة .....التانى فى صمتــه زاد

وقفوا يتقاسموا غنايم حرب كاسدة

غنايم حرب...ماعرفولـــــــــهاش ميـــــــعاد

ويتشاورا لمين هيدفع المهزوم

ومين فى الاخر هيضحــــــــــك على مين

ونسيوا ان الجيوش مابينهاش حروب

وان القلوب اتوحدت على دعاء ياســــين

الدنيا جرى فيها ايه ياولاد الحلال ؟

الحرام يتشرى والحلال يتبـــــــــــــاع

وكله عشان قرش فانى المآل

ولقمة زايلة ...ويموت الجيـــــــــــــاع

سلام عليكم

10 comments:

Anonymous said...

حبيبتى عابرة السبيل
المال جزء من سعادة الانسان وقد قال سبحانه وتعالى/المال والبنون زينة الحياة الدنيا........وهذا يقودناالىانه فعلانعيم زائل ولكنه نعيمونعمه من ربنا
وسواء زايدوا عليها او لا كل واحد بياخدنصيبه
والنصيب بيجى لغاية صاحبه بالحرب بالضرب االمهم بيجى بغير حول لنا ولا قوه اما الصراعات التى تحدث بين اصحاب المال ويضيع فيها من لاناقة له ولا يد فدى ارادة الله وتصريفه وفى النهايه محدش واخد اكتر من نصيبه لان الدنيا دار عمل والجزاء يوم الحساب والصبر جميل

ثانوى عام said...

على فكره انا مش فاهم اى حاجه من الشعر بتاعك يا عابرة السبيل

بس اللى واضح ...بما اننا فى ايام الثانويه العامه والمذاكره والعربى والبلاغه.. اقدر اقولك انه مافيهوش اي ترابط ولا وحده الموضوع ولا حتى سجع مظبوط

بس ماتزعليش منى

عابرة السبيل said...

سلام عليكم
اولا :اشكر من نادتنى بحبيبتى فانا اشعر انها فتاة او سيدة واحسست بقربها الشديد منى بسبب هذه الكلمة واحسست بمدى تاثير الكلمة فى النفوس

بعد ازنك مش هرد دلوقتى على كلامك لانى عايزة اقرا كلام وتعليق الناس اكتر

ويا ثانوية عامة ....معلش اعزرنى ...انا قايلة فى الاول انى كاتبة شعر ملخبط ....وهى الثانوية العامة كده...ما بتجيش على الواحد الا بالخسارة ...ترابط ايه ووحدة موضوع ايه يا عم سيبك وروح زاكر انجليزى ولا فيزياء ولا تاريخ دول اهم ومافومش كلكعة العربى

واوعدك لو فى ناس تانى قالتلى مش فاهمين حاجة هشيل الشعر ده خالص ...انت بس خلص ثانوية عامة وهتلاقى الكلام واضح وجميل

سلام عليكم

عابرة السبيل said...

وشكرا لحضرتك (مجهول) مرة اخرى على اهتمامك بالرد علي وعلى اللخبطة اللى انا كتباها وان شاء الله هبقى احط ترجمة الكلام قريب ...بس انا بحب اعذب الناس معايا واخليهم يقعدوا يقولوا هى تقصد ايه بكلامها ....وخصوصا مى

ومهى فى ناس قرت الكلام اهو وردت عليه يا ثانوية عامة ...بس انا كفاية عليا انك سبت مزاكرتك وقريت المدونة ...يااااااارب تدخل الكليه اللى نفسك فيها

سلام عليكم

Ahmed Moghazy said...

مساء الخير يا عابرة السبيل
انت عارفة ان انا بحب شعر جويدة جدا
بس بصراحة
شعره عايز واحد
فايق ورايق
لانه فيه تفكير كبير وعميق
طبعا اصله بلدياتى
من كفر الشيخ

بس المزاد اللى انت عملتيه
مش عارف مين اللى بيشترى ومين اللى بيبيع
واية اللى بيتباع
على العموم
هى كده فترة الامتحانات
بتطلع فيها
كل حاجة

بس تخاريفك غطت على تخاريف مى ماشاء الله

Anonymous said...

السلام عليكم
والله الشعر من اجمل الكلام الى بيتكتب انا بتكلم عن الشعر عموما
وانا ليا صديق بيموت فى الشعر يعنى اهم عنده من الاكل والشرب
اما بالنسبه للاخت عابره سبيل هو فعلا ملخبط شويه بس يمكن عشان الامتحانات
بس ده ميمنعش انه ليه معنى كويس جدا

safa7_karmooz said...

على فكرة التخاريف مفهومة ...ومش محتاجه كراك لفك الشفرة ..:)

may said...

السلام عليكم
اسفة يا عابرة السبيل ع التأخير انتى عارفة ظروفي
ادخل ف الموضوع شعر جويدة حاجة حلوة انا بحبة بس هوة لا بلدياتى و لا حاجة اما شعرك انتى فامتيئسيش انا فهمت و عندك حق مال اية و بتاع اية محدش واخد منها حاجة
المال مال و الذهب ذهب و لم تبقى سى الاعمال
انا بحب الشعر جدا بس عمري ماعرفت اكتبة البركة فيكى بقى ماتحريميناش م الحاجات الحلوة دى
و السلام عليكم

Ahmed Moghazy said...

يعنى كلكم طلعتو بتحبو بلديلتى
طيب الحمد لله
وكلكم كمان طلعتو عارفين عابرة السبيل تقصد اية؟ وانا الوحيد اللى طلعت .........فى النص
ماشى يا عابرة ماشى يا مى
مكنش العشم
على فكرة يا عابرة
مى مش فاهمة حاجة
ولا بتحب جويدة اصلا
وانا كمان جى اهدى النفوس

may said...

السلام عليكم
شوف يا مغازى يا بنى هدى النفوس براحتك بس الكلام دة مش معيا انا معابرة السبيل دة احنا دافنينة سوا بس بصراحة انت اتقدمت اقوي ف تهدية النفوس و بفكر اديلك شهادة تقدير و لا اقولك نعملها مسابقة لتهدية النفوس و نوزع الجوايز ف الاخر دة لو المدونة فلت شغالة و مولعتش
و السلام عليكم