07 April 2007

لو بطلنا نحلم ....نفوق MAY


الشعب المصرى شعب له طموح بلا حدود يحلم دائما بالافضل و الاجمل ، و مالة بس لحد امتى هانفضل نحلم عايزين نصحى عايزين نفوق عايزين نشوف الواقع اللى بنحلم ان احنا نغيره ، لكن لو فضلنا نحلم ف الخيال كدة مش هانقدر نحقق احلامنا انا ما بقولش اننا نبطل نحلم خالص بس احنا خدنا وقت طويل اقوى ف الاحلام يعنى مثلا المصريين بيحلموا بالحرية من ساعة الاحتلال الانجليزى و لحد دلوقتى لسة ماخدنهاش رغم ان الانجليز مشيوا من 55 سنة و اذا كان حلم الحرية اخد مننا 125 سنة امال هايتحقق ف كام سنة و بخصوص الموضوع دة فى جملة مهمة جدا اتقالت ف فيلم "فتح عينيك " على لسان الفنان خالد زكى الذى كان يمثل شخصية اجنبية شريرة :احنا بنحلم عشان نحقق الاحلام اما انتو بتحلموا عشان تهربوا م الحقيقة
عايزين نبقى واقعيين شوية لا شويات و شويات ، بس الخوف كل الخوف اننا ما نبقاش نايمين الخوف اننا نكون متنا و مش حاسين زى فيلم the others و دى بقى مالهاش عندى حل
النداء الاخير ع الشعب المصرى : اصحى احسنلك لحسن مش هايكفينى فيك مية النيل كلها عشان افوقك
اصحى قبل ما يفوتك المدرسة قصدى القطر

2 comments:

Ahmed Moghazy said...

والله عندك حق ,احنا كلامنا أكتر بكتير من افعالنا ولما بنحلم بنشطح فى الاحلام لأبعد الحدود من غير ما نعرف هنحقق الاحلام دى ازاى؟ ووقت الجد بنتغير

وحتى لما نبدأ نشتغل فى اى حاجة مابنخلصهاش للنهاية , كل شىء ناقص , ولما ننجح دقيقة نقعد نهلل عشرين دقيقة , ونقول كدة الحمد لله ,احنا كنا فين وبقينا فين؟

فعلا ثقافة لازم تتغير علشان نتغير

safa7_karmooz said...

شعب زيااااط مووت...نرغى وخلاص ...واهو اكبر دليل اننا بندون هنا ..هههههههههه

مش قصدى بهزر طبعا...بس اللى ااقصده ان الناس بقت تهرب من الواقع بانها تقعد فى عالمهاالخيالى ...وتحلم مع نفسها ...بحاجات فى الواقع مش هتحققها...من قد ايه واحنا بنحلم بوطن حر...او حتى بعرب دماغهم عدلة...بس للاسف احلامنا مش اتحققت ...او حتى مالهاش مجال انها تتحقق الا لما الاسباب تزول...

الى حين زوال الاسباب ...زى ما القاضى بيقول...يبقى الوضوع كما هو عليه ..:)

---------------------
ملحوظة...حلوة البلوج على فكرة..:)