28 April 2007

MAY تخاريف الامتحانات

يااااااااااااااااااااااااااااااااه خلاص بيقولو فاضل تلات اسابيع و الدراسه تقف و فاضل اقل من شهر ع الامتحان اية دة التعليم بقى فية خم يا جدعان هوة احنا لحقنا ، اتذكر اول يوم ليا ف الكلية كانة امبارح معقول تلات سنين عدت و فاضل سنة واحدة
مش عارفة لية تواردت علية كل الافكار دى دلوقتى تقريبا تخاريف الامتحانات ايا كان انا عندى دلوقتى نوبة صراحة و شجاعة كافية للاعتراف بنعم ربنا الكتييييييير قوي ماهو الواحد لازم يفتكر ربنا وقت الزنقة
من اول لحظة لية بعد مجموع الثانوية العامة الكبير افتكرت انى حظى وحش عشان مادخلتش اعلام زى ماكنت عاوزة لكن قضاء ربنا نفد و الحمد لله لكن بعد كدة عرفت اد اية انا محظوظة
اولا اول يوم دخلت الكلية لقيت كل اصحابي بتوع فصل المتفوقين بتوع المدرسة الثانوي و كان الواحد في المدرسة خصوصا ان عدد الولاد قليل فلم اشعر اني تحولت من مدرسة بنات لكلية مختلطة
ثانيا الكلية قريبة جدا من بيتي بتاع تلت ساعة و مواصلة واحدة كمان
ثالثا اكتشفت انى انفع اشتغل اعلام برضة و انا خريجة سياسة
رابعا وجدت جو اسري جميل داخل الكلية دكاترة محترمين و ديمقراطيين و بيتعاملو مع الطلبة على انهم ولادهم مش اعدائهم زى باقي الكليا
خامسا اتعلمت حاجات كتييييير قوي وفهمت حاجات مهمة هاتساعدني في حياتي اتعلمت ازاي اسمع و افهم و بعدين اتكلم ازاي اكون موضوعية و محايدة و ابطل الحفظ و الصم بتاع ثانوي
وسادسا و قبل ماعابرة السبيل و مغازي يزعلو اتعرفت على اجمل و اطيب ناس في حياتى وبقيت بكتب في مدونة اصل التعليم بيروح و ييجي لكن الصحبة الحلوة ماتتعوضش
في النهاية انا هدفي م اللت اللى انا لتيتة كلة مش انى اغيظ الناس بتوع المدينة الجامعية اللى متشحططين او اللى ماقدروش يحبو الكلية لانهم دخلوها غصب عنهم زيى لكن هدفي انى اقول انه مش مهم دخلت بمزاجك ولا لأ المهم تفكر لية ممكن يكون ربنا دخلك الكلية دى بالذات اية الدور اللى لازم تلعبة في الكلية دى و اية المميزات اللى حصلت عليها ولسة ممكن تحصل عليها ماتبصوش للنص الفاضى م الكوباية بصو للنص المليان و اذا مافهمتوش حاجة م العك دة او كنتو مش متفقين معايا يبقوا تعالو على نفسكو و سامحونى مانا قولتلكو بقى تخاريف امتحانات وربنا مايوريكو
و السلام ختام

10 comments:

Ahmed Moghazy said...

أخــــــــيرااااااااا يا مى

حمدالله على السلامة
والله نورتى المدونة
بس اية الكلام والشعر ده؟
كدة دكتورة منى البرادعى ممكن تعينك معيدة فى الكلية
طبعا يا بنتى لازم تكون كليتنا مميزة
امال اية ؟
هى الدنيا باظت ولا اية؟


والبعدين مالهم بقى بتوع المدينة الجامعية؟
متنسيش ان أخوكىبردوا كان ساكن فيها 4سنين
وفليها احلى ايام حياتى
وعرفت فيها اغلى ناس فى حياتى

ومش كلهم دخلوا غصب عنهم
مين قال كده؟
انا عن نفسى
كنت بفكر فيها وانا فى 3اعدادى والله صحيح

على العموم انا حابب نبرة التعصب للكلية اللى انا شايفها فى كلامك

فعلا الايام بتعدى بسرعة جدا وخصوصا فى الكلية
من كثرة الانشطة والامتحانات والابحاث
بتخلى الوقت يعدى من غير الواحد ما يحس
يعنى انا مثلا لما كنت فلى سنة تالتة زى حالاتك كنتى انت لسه فى الاعدادى
هههههههههههههههههههه
ههههههههههههههههههه
ودلوقتى بقيتى عروسة فاضلك سنة وتتخرجى
عموما ركزى شوية فى الامتحانات وسيبك من تخاريف الامتحانات خليها للصيف
واستغطى كويس

Ahmed Moghazy said...

نسيتى اعلق على حكاية فصل المتفوقين دى؟

اية الحكاية انت هتعيرينا ولا اية؟
انا مدخلتش فصل المتفوقين فعلا
بس بكيفى
لانى مكنتش حاطط المجموع والحاجات فى دماغى اصلا
ولما بقى ركزت شوية صغيرين
جبت مجموع لحد النهاردة انا مش عارف جبته ازاى؟

مش هقولك عليه علشان متقوليش انى بكذب او انى بتفاخر بيه
بس هو فعلا مجموع عالى جدا جدا
محدش بيجيبه فى الادبى خالص

والبعدين
انت ساكنة فين بقى؟
كدا انا ممكن اعمل تحريات واعرف
متنسيش ان المخابرات بتاعتنا شغالة كويس
يعنى تلت ساعة من عند الجامعة
يبقى انت اما من ميدان الجيزة
او من فيصل
او من الدقى
او من شارع مصر والسودان
او من المنيل واللى حوليه

قولى انت احسن
انت عارفة
الدستور اتعدل
والامور بقت مية مية
روحى ذاكرى
قومى بطلى لكاعة

عابرة السبيل said...

انا عايزة ساعة بتنور فى الضلمة
يا مغازى وفين صورتك هنا؟ ماتحطها بالمرة

may said...

السلام عليكم
ياااة دة انا كنت ف غربة رهيبة عشان الدعوة بتاعتى كانت خلصت بس الحمد لله عابرة السبيل بعتتلى واحدة تانية و انا من هذا المزنق احب اشكر الاخت عابرة السبيل رئيسة لجنة حموم الانسان على تجديد الثقة و ان شاء الله هابنيلكو جامع و مدرسة و مستشفى و السلام عليكم و رحمة الله و بركاتة

may said...

انا لسة ممامشيتش لسة هارد على التعليقات و اسفة ع التاخير
مغازي
شوف يا سيدى انا كان بودى ارد على كل الكلام بتاعك بس هارد على حاجة واحدة بس بعدها هاتفهم انا لية مارديتش
بالنسبة لحكاية انك خمنت مكان سكنى انا هاسهلهالك شوية مع انك ما قولتش عروستى ، بص يا سيدى العنوان كالتالى
ادخل مدونة صوت عالى هاتلاقى ف وشك تخاريف امتحانات سيبها خش يمين هتلاقى كام اسم كام بنى ادم خش على اسم واحدة اسمها مي تالت جملةجوةهتلاقى فيها تلميح بسيط ممكن تخمن منة عنوانى و سلام بقى
----------------
عابرة السبيل
اية البتر اللى انتى فية دة مش كفاية الراجل واخد بالة م المدونة واحنا راميين كل حاجة علية كمان هتتامرى و عايزة ساعة بتنور كدة تبقى داخلة على طمع و بعدين معلقتيش لية ع التخاريف ع العموم كفاية زيارتك الحلوة ما تبقيش تقطعى الزيارات
و السلام عليكم

Ahmed Moghazy said...

ماشى يا مى
انا اللى غلطان
بس انتوا كده
مش مركزين خالص فى المذاكرة
بس انا فرحان

عابرة السبيل باين بتحب الجو الرومانسى
ممكن احطلك
شمعتين ينوروا فى الضلمة

والبعدين مش عجباكى صورتى ؟
ماشى
بكرة اشوفك

may said...

السلام عليكم
مذاكرة اية يا مغازي اللى عايزنة نذاكرها هوة انا بتاعة مذاكرة لا انا ماحدش يقولى ذاكرى خالص انا بقولوكو اهوة و توقع انى هانطلك ف المدونة كل يوم
وبما اننا ف اليوم المفتوح و كل واحد بيطلب اللى هوة عايزة انا عايزة فازة ورد على باب المدونة مع الشمع مش اى ورد ورد احمر
و السلام عليكم

safa7_karmooz said...

والله انتوا عالم لاسعه...وزى العسل ...

يلا قرار من نقيب السفاحين العرب...باعفاء اصحاب المدونة من قتل اول الشهر ...وارجائهم حتى اخر الشهر...اى خدمة ;)

احمد كان بيسأل انا مين ...ومنين...انا وصلتلكم عن طريق بروفيل مى...كانت عامله كومنت فى بلوج كلام عربى...بتاعت عربى باشا...وهيثم باشا برضه ...

بس ممكن تحولوا التهييس العسل ده فى البوست ...وممكن كمان تنتشروووووووووا فى المدونات التانية عشان الناس تعرفكم اكتر...وتعرف المنتكة هوون

بالنسبة لل3 بلوجات...واحده بطرطش فيها...والتانية بكلم قلبى فيها...والتالته بجرب فيها تيمبلت جديد...ههههههههههههههههه

طوولت عليكم...بس لو مصرين تعرفوا انا مين...خشوا فى طرطشة افكار...جيبوا تالت بوست انا كتبته فى المدونة ...هتلاقوه فى طراطيش سابقه...
معلش عارف هتتعبوا شوية...وهتتربوا شويتين ...وهيجيلكم رعب من كمية الزواحف اللى فى الارشيف...بس برضه لازم نبقى جامدين

يلا ...بسا

may said...

السلام عليكم
ازيك يا سفاح وحشنا و الله لازم هادخل و اعرف انت مين بس انا خايفة اروح مدونتك مارجعش و انا ماما قايلالي ابعدى عن السفاحين ع العموم هقول لعابرة السبيل و مغازى يبلغو البوليس لو مرجعتش ف حدود 3 ايام و هكتب الوصية كمان
اوعى تقطع الزيارات
و السلام عليكم

Ahmed Moghazy said...

واحدة عايز ساعة بتنور
والتانية عايز ورد احمر
ارحمنى يارب
انا آسف يا مى مخدتش بالى من كلمة الهرم خالص
بس على العموم انا بردو كنت قربت جامد , فيصل والهرم ولاد عم
صح؟

....................
شرفتنا يا سفاح كرموز
ان شاء الله هنشرفك على الطراطيش
بس خلى بالك لو انت سفاح
احنا كمان قتالين قتلة
والبت اللى هتروح ومش هترجع بحملك المسئولية كاملة