09 May 2007

3abratalsabeel كلنا بنغلط

سلام عليكم الاول ...الله يبارك فيكم ....وانتوا عارفين ليه من غير كلام كتير

الناس طفشت ولا ايه؟ فين البشر اللى كانوا بينورونا هنا ؟
يللا مش مهم انا عارفة ان كله مش فاضى ....
_______________________________________________

ايوة كلنا بنغلط ومعرضين اننا نغلط فى حق نفسنا او غيرنا ....
زماااااااان وانا صغير ...كنت بحلم ابقى كبير ابقى كبير ....
لا ده عطل فنى بسبب الراديو اللى جنبى ...ما تخدوش فى بالكم
زمان بقة وانا صغيرة كده من اربعين سنة ...كنت لما بغلط بزعل من نفسى قوى ..واقعد اتاثر اتاثرلغاية ما بقيت شبر ونص ،وازاى انا غلطت وازاى عملت كده ...وشوشو بقة الله ما يرحمه يقعد يكبرلى فى المواضيع وينسينى ان حل الغلط ده هو الاستغفار اوالأسف للى غلطت فى حقه،
فضلت كده لغاية ما سمعت من احد الدعاة -مش عمر خالد علشان بس فى ناس بتمسك على الواحدة -سمعت حديث قدسى فيما معناها :ان ربنا خلقنا علشان نعبده ونغلط ويغفر لنا لانه هو الغفور ...ولو احنا البشر فى الدنيا دى ما غلطناش ...الله سبحانه وتعالى هيموتنا ويخلق بشر اخرين يغلطوا ويستغفروا علشان ربنا يغفر لهم

شفتوا بقة ربنا -سبحانه وتعالى - رحيم بينا ازاى.....بس هى مش هيصة بقة، يعنى مش نغلط ونقول ربنا هيغفر ...لا طبعا ...لان ده يعتبر أمن من مكر الله سبحانه وتعالى وده معناه اننا لانؤمن بالاخرة ولاان فى حساب تقيل مستنينا-ربنا يسترها معانا
احنا مفروض نجاهد نفسنا علشان ما نغلطش ....لكن اذا غلطنا ولو حتى بذنب صغير لازم نسرع للتوبة والاستغفار علشان ربنا سبحانه وتعالى يجنبنا الوقوع فى الذنوب الكبيرة

خلاص خلاص ...انا عارفة زمانكوا بتقولوا ايه الشيخة اللى بتتكلم دى ...والله انا لاشيخة ولا حاجة ...انا بس لو تفتكروا ، عاملة المودنة اصلا لينا كلنا علشان ااقدر اعمل اى حاجة تفيدنا فى دنيتنا دى
واحنا كلنا معرضين للغلط ايا ما كان ...الحق عليا يعنى ؟...طيب مع السلامة
سلام عليكم
اللهم اغفر لى ولوالدى وللمؤمنين والمؤمنات والمسلمين والمسلمات ولمن دخل بيتى مسلما الاحياء منهم والاموات ....آآآآآآآآآمين
ما تقولوا امين

11 comments:

Ahmed Moghazy said...

آميييييييييييييين

ألف مبروك يل عابرة وعقبال زمايلك فى المدونة ان شاء الله
بس فين الشربات والذى منه؟
ولا الشربات بدعة وكل بدعة ضلالة وكل ضلالة فى النار؟

الانسان لو ما خطأش ميبقاش انسان , يكون ملك من السماء
والحمد لله ان احنا لينا رب بيفرح بتوبتنا
ويغفر لنا الذنوب
ويعاملنا بفضله , لا بعدله
هو ربنا الذى خلقنا , ويعرف كم نحن ضعفاء
بس يلريت تركزى شوية يا عابرة فى الكتابة علشان انا ملاحظ ان المذاكرة بوظت دماغك
وسلميلى على اللى بالى بالك
وخالتو اميمة بتسلم عليكى

may said...

السلام عليكم
سبحانك يا رب عابرة السبيل بقت شيخة فعلا الامتحانات تعمل كدة و اكتر من كدة بس فعلا الموضوع جميل صحيح كلنا بنغلط ناس بتعترف بخطأها و تتوب و ناس لا ارزاق بقى اهم حاجة تبعدى عن شوشو خالص و مبروك يا ستى يعنى هوة اشمعنى انا بس انا بقى عايزة اعرف حكاية اللى بالى بالك بتاعة مغازى دى لا مانا مش .....احم احم ع المدونة فيها لاخفيها
و السلام عليكم

عابرة السبيل said...

الله يبارك فيكم
وايه حكاية الشربات دى يا مغازى شكلها فيها تريقة
ويا مى مانتى عارفة احنا بنتكلم عن مين ما على رايك احنا دفنينه سوا

بس يا جماعة مش ملاحظين ان مافيش غيرنا هنا فى المدونة دى ...قليل الناس اللى بترد على كلامنا ويتعدوا على الصوابع ...سفاح كرموز واحنا وسبيدر مان بيجيلنا كل فين وفين ....والثانوية العامة اختفى، فين ال200 طالب وطالبة بتوع قسم السياسة؟ ولا اعرف
سلام عليكم

Anonymous said...

Wanna Be

Anonymous said...

السلام عليكم يا عابره سبيل
انا بس ليه تعليق بسيط هو ليه كل الى يتكلم فى الدين بيخاف يكون شيخ
مع ان المفروض اننا كلنا نكون عرفين القضايا البسيطه دى ده الحاجه الى هدخلنا الجنه يعنلى الموضوع مهم
فمنخجلش اننا نتكلم ونعرف ونكون شيوخ كمان ايه المشكله
بس فعلا موضوع جميل
قل يا ايها الذين امنو لا تقنطو من رحمه الله ان الله يغفر الذنوب جميعا

عابرة السبيل said...

سلام عليكم ...ده الواحد كده يدعى بمليون جنيه ...اهلا وسهلا بيك ايها المجهول
رايك مظبوط بس الواحد فعلا بيخاف على الكام زبون اللى فى المدونة ليتضايقوا بس ...فبكتب وكانى انا اللى هقرا
اهلا بيك مرة اخرى وياريت تكتب تعليقات على طول منورنا والله
سلام عليكم

Ahmed Moghazy said...

روحو ذاكرو

والله انتو باين عليكم انتو الاتنين بتدخلو المدونة لما تزهقو شوية من بنت عبد الناصر وابراهيم درويش والراجل ده اللى مهوش عارف حاجة اصلا بتاع التنمية الغبائية , قصدى التنمية السياسية
صح؟
هم يطلعو عنكو وانتو تيجو تطلعو تخاريفكم عليا
ههههههههههههههههههههههههههه
خلاص يا عابرة مش عايزين شربات هوزع انا من معايا , هى بدات بالبخل؟

عقبالك يا مى
بس لازم تعزمينا مش زى جماعة
وتوزعى شربات وتفاح كمان
ومتسأليش ياما عن اللى بالى بالها

safa7_karmooz said...

ههههههههههههههه

عابرة السبيل بتسال عن الزوار

طب انتوا اللى فين يعنى ؟؟؟
مش عارف

شكلى هغير رايى واحطكم فى لستة اخر الشهر بجد

وقد بربر من تبعذر

SaTaN said...

Bgad I feel pitty For You
Get A life PPl bgad get a Life

عبدو بن خلدون said...


الحكيكة
اللي إنت بتقوليه ده مش كلام شيوخ ولا حاجة
ده يعتبر -في رأيي- من المعروف من معرفة الله بالضرورة
يعني لازم الواحد/ ة ت/ يبقى عارف/ ة إن إحنا بشر
وإننا لازم هنغلط، ونعمل إيه لما نغلط
ولعلمكم فيه ناس الذنوب بالنسبة لها بتقربها من ربنا أكتر من الطاعة
!
مش فزورة، بس هي لما بتغلط في حق نفسها وفي حق ربنا
بترجعله تاني وتحبه أكتر وتشتغل أكتر
وورد في الأثر
"يا ابن آدم: ذنب تذل به إلينا، أحب إلينا من طاعة تدل بها علينا"
يعني ذنب يخليك مسكين وخايف وقريب مننا أحسن من طاعة تخليك تأمن مكر ربنا
لأ وكمان ترائي بالطاعة دي
!

عابرة السبيل said...

السلام عليكم .....بجد هحسدنى جامد ....ايه النور ده ....
ايها السفاح الكرموزى لقد جئت فى وقتك الملائم تماما ....ليه يا ابنى تستنى لاخر الشهر ....خلص يا عم من دلوقتى قبل الامتحانات عشان تبقى فاضى
وابن خلدون اهلا بيك على مدونة الصوت العالى ....من غير كلام كتير ولا كبير ....كل كلامكم صح
اما ساتان ...انا حقيقى ضعيفة فى قواعد اللغة الانجليزية ....يعنى مش فاهمة يعنى ايه جيت الايف!!!!!يعنى نحب الحياة يعنى ولا احنا فاضين فنروح نشترى حياة ؟...حد يعمل فيا ثواب ويفهمنى
سلام عليكم