31 May 2007

3abratalsabeel انتخابات مجلس الشورى

سلام عليكم ....بصوا بقى ...اايوة انتوا كلكم ...ياللى بتكتبوا هنا
زى ما انتوا عارفين او مش عارفين ..انا كنت قايلة فى مشروع فى دماغى عايزة اعمله وانتو تشاركوا فيه
وبماانى مش قادرة اصبر على ما الامتحانات تخلص قلت استغل ان فى انتخابات دلوقتى وانفذ المشروع وبالمرة اخد رايكم

طبعا انا مدير الادارة هنا او الرئيس :) لذلك هقدملكم اقتراح بقانون ولازم توافقوا عليه
مبادرة السيد الرئيس عابرة السبيل :
اقترح عليكم ايها الاعضاء المبجلين ان يتم عمل انتخابات لمجلس الشورى للمدونة بتاعتنا ...للمصلحة العليا للمدونة
يعنى ايه الكلام ده؟ يعنى انا احترت...مين اللى يبقى المدير هنا ...وقلت طيب ما نبقى كلنا مديرين للمدونة
انا وعابر السبيل ومى ومغازى بما اننا كلنا بقينا اصحاب المدونة مش ضيوف
وفعلا لو دخلتم على المدونة بالاكونت بتاعكم هتلاقيكم كلكم بقيتم مديرين ليها
بس مش عارفة هل انتم موافقين ولا لا ...تامشيا مع روح الديمقراضطيةاللى سايدة البلد دلوقتى قلت نعمل انتخابات اللى عايز يبقى المدير معايا بيتفضل بتقديم طلب عليه عشر طوابع بوسطة ويقدم ورقة فيها امضاء خمسين الف واحد من الشعب على انهم مؤيدين ليه
وانا هنظر فى الطلبات وهقرر مين ممكن يشارك فى الانتخابات

بعد ما تقولولى رايكم فى الاقتراح ده هنشوف مين عايز يبقى المدير ونكمل الانتخابات ان شاء الله
حد هيسالنى سؤال ...ايوة باين اهو السؤال فى عنيكم ...طيب خلتينا كلنا مديرين ليه دلوقتى ؟
هقولكم علشان يبقى عندكم فكرة بمسؤليات الادارة وتحسوا قد ايه انا بتعب وومش عارفة انام من تانيب الضمير انى مقصرة فى حقكم وحق المدونة ...

حد هيسالنى سؤال تانى ...اشمعنا انتخابات مجلس شورى ؟
هقولكم لانى هفضل المدير هنا ...يعنى كلمتى فى الاخر هى اللى هتمشى ...وطبعا لازم اكون انا صاحبة المبادرة دى علشان اضمن تاييد الناس ليا ..امال ايه ...كله علشان المصلحة العليا للمدونة

اسيبكم تفكروا بقة وانتو احرار ...بس اى تغيير ولا تخريب فى المدونة هيبقى ليه رد جامد قوى ...اه انتوافاكرين انى علشان اديتكم الادارة دلوقتى يبقى هسيبلكم المدونة كده تعملوا فيها اللى انتوا عايزين ...لااااااااااااااااااا مش انا

سلام عليكم

5 comments:

Ahmed Moghazy said...

فايقة ورايقة يا بت
انتخابات اية الايام دى؟
مش المفروض ان حضرتك عندك امتحانات ولا انا بيتهيالى؟

على العموم هى فكرة كويسة فعلا
لازم نوزع المسئوليات على بعض وكل واحد يعرف هو عليه اية يعمله ويلتزم بيه

يعنى يكون فيه مجلس ادارة وده طبعا برئاسة حضرتك لانك الصاحب الاصيل للمدونة
ويتكون من عضوية الاخوة كلهم اللى بيكتبوا هنا
وهو المسئول عن مناقشة كل شىء يخص المدونة

وكمان يكون فيه مسئول دعائى او اعلامى مسئول عن زيارة المدونات الاخرى وزيادة عدد زوار المدونة بشتى الوسائل

وكمان يكون واحد مسئول عن الامور الفنية وتطوير المدونة وتحسين صورتها وشكلها وادخال كل ماهو جديد فى عالم المدونات

ويكون فيه واحد مسئول عن المحتوى وتصيح الاخطاء الاملائية واللغوية والتاريخية والامور دى

بس كل ده من غير انتخابات علشان محدش يقول زورا الانتخابات
حضرتك توزعى المسئوليات دى بشكل توافقى وبالتراضى بينا

وروحى ذاكرى دلوقتى

may said...

السلام عليكم
هوة فية اية منين خلتينا كلنا مديرين و منين الدعوة بتاعتى خلصت دة كلام و لا دة وقتة اصلا ع العموم انا موافقة على كل كلمة قولتيها انتى و مغازى بس انا شايفة ان في حد ناقص الا وهو الشعب و عشان كدة انا قررت اكون بمثابة الشعب يغنى م الاخر مش هاعمل حاجة عشان انا ندلة ف موضوع
المسئوليات دة
هههههههههههههههههه

صوت الشعب الحر said...

عند حق يا مى
انا زعلان ازاى انا مش مترشح فى الانتخابات دى

كده برضه يا عابره السبيل تنسينى وانا العضو الشرفى فى هذه المدونه

Anonymous said...

العضو الشرفى؟؟؟؟؟؟؟؟؟؟

ليه هو انت مين؟ متكنش انت شيماء ؟
هعرفك يعنى هعرفك

مغازى

...........................
اية يا مى ؟
انت عايزة على الجاهز؟
دا هناك مش هنا



انت وعابرة طول الصيف هتشيلو المسئولية كلها

مغازى

عابرة السبيل said...

انا غيرت رايى ....مافيش انتخابات
وكلنا مديرين مع بعض مش نافعة
والناس بتغير فى المدونة براحتها ..طيب مش يمكن حد مش عاجبه التغيير ؟يبقى هتحصل خناقة كده
....اعمل ايه????انا مش عارفة
مى وقالت مش عايزة ابقى مديرة
وعابر السبيل لسه مقالش رايه
ومغازى قال رايه ومش عاجبنى ...عشان هو دايما بينسى حرف النون من كلمة بنت
-------------------
صوت الشعب الحر ...طبعا عضو شرفى ومنورنا رغم الناس مصممة تعرف انت مين !!!مش عارفة هو انت فعلا حد يعرفنا ولا لا عموما كفاية مشاركتك معانا
-----------------
سلام عليكم