28 May 2007

اعمل ايه فى الموقف ده-عابر سبيل

بصراحه الواحد مش عارف يقول ايه انا اتحطيت فى موقف صعب جدا
صعب اوى لما تقول كلام انته مكنتش تقصد بيه حاجه وتلاقى اعز الناس ليك يفهم كلامك غلط
همه معزرين لان الكلام ممكن يكون ليه معنى مش كويس
بس برضه انا اعتقد ان المفروض الناس خصوصا الى بنهم معزه خاصه
ديما يفهمو المعنى الحلو
حد يقلى اعمل ايه دلوقتى انا فعلا محتار معنديش استعداد انهم يزعلو منى
همه بيقولو خلاص بس باين عليهم الزعل خالص
حد يفدنى ارجوكم

7 comments:

3abratalsabeel said...

بص يا عابر سبيل ..هديك وصفة سهلاااااااااا خالص علشان تصالح اللى مزعله وهى :
المقادير:اتنين كيلو كباب وكفتة
بجنيه سلطة
بجنيه طرشى
وسلطة طحينة
بربع جنيه عيش
الطريقة :ركز بقى
تروح على اللى مزعله ...وانت بتضحك كده ..وفى نفس الوقت زعلان ..تقولى ازاى اقولك معرفش اهو تعمل كده وخلاص
وبعدين تقوله زعلان ليه ؟...انا ماكنش قصدى حاجة وتروح فاتح كيس الكباب والكفتة وتقعد تاكل قدامه
اعزم عليه عزومة مراكبية
هيقولك لا شكرا طبعا
تقوله انت والله لانت واكل معايا ..هو طبعا مش هيقدر يقاوم الكباب والكفتة وهتلاقيه قعد ياكل معاك وينسى اصلا انه كان زعلان

شفت الطريقة دى ...سيبك منها بقى
اللى زعلان منك كلمه وحاول تتفاهم معاه واعرف ايه اللى مزعله ...وحاول ما تعملوش تانى ...هى دى احسن طريقة
وكله بيطلع فى الغسيل ولا يهمك الناس كلها طيبة ..

سلام عليكم

صباح الخير said...

اسمحلى يا عابر السبيل انى ارد على رد عابرة السبيل
شكلك داخله على طمع......طيب لما تطمعى يا اختى اطمعى فى حاجه ترفع راسنااحنا الجنس المغلوب على امره..... اعلمك امال ايه ...ماحنا اخوات برضه,,,,,احلمى كدا بعربيه ولا بلاش ليطلع غلبان ويجيبها فيات بلاشها احسن.....
احلمى بغويشه الماظ بلاشها سمعت انه مضروب اليومين دول,,لا ورجالتنا مابتروحش رجليهم الا على المحلات المضروبه بالذات,....يكونوش قاصدين هههههههههههههههه
امرك لله اتصالحى بكوزين دره وقرطاس ترمس
نصيحه فى ودنك (اوعى تسمع يا عابر السبيل)احتفظى بالباقى واعزميه انتى على اكلة الكباب لما تزعليه المره الجايه وما تنسينيش اختك جعانه موت هههههههههههه
معلش انا باهدى النفوس
ابقى زورينى

may said...

السلام عليكم
اية يا جماعة الوليمة اللى انتو عاملينها دى انا جوعت
سيبك منهم يا عابر خليك معايا انا لازم تكون رومانسى و ماتسيبش الموضوع يطول و يتطور روح للى مزعله و وضح موقفك و قصدك و لو كان الكلام طالع م القلب هيوصل للقلب على طول و مفيش مانع من شوية ورد كدة خلى الجو يحلو ما تنساش الابتسامة الحلوة
و السلام عليكم

عابر سبيل said...

يسلام يجماعه
انا قلتلكم حد يفدنى مش يخرب بيتى
بالنسبه لعابره السبيل الموضوع كده مكلف اوى اكبر من مستوى الزعل اصلا
والخت صباح الخير الجزء الاخير ممتاز اما الى فوق انا هعتبر نفسى مقراتوش
اما الاخت مى كلمها مظبوط خصوصا ان الناس الى انا مزعلهم ناس رمنسين جدا
وسبحان الله
والله ناس قنوعه جدا
مجرد اتصال فى التليفون
بس كنت باتكلم من نخشيش قلبى بسراحه
لقتهم سمحونى علطول
وقالو حليب يا اشطه بعد ما قلت صافى يا لبن

عابرة السبيل said...

يا رايقيييييييييين
والله مانتو عارفين حاجة ....وبلاش الرومانسية هنا على المدونة دى بالزات انتى عارفانى يا مى كويس ...بلاش الكلام اللى يخلى المدونة كانها فيلم عربى
قال رومانسية قال
ولبن وقشطة وكمان شوية حاجة ساقعة بيبس !!!
احنا هنقلبها سوبر ماركت ولا ايه
وورد كمان ...؟ده عابر سبيل مش راضى بالكباب والكفتة اللى بيتاكل تقوليله ورد يا مى ...هيعمل بيه ايه ده ؟

عابرة السبيل said...

وماحدش يعنى رحب بالضيفة الجديدة صباح
اهلا وسهلا بيكى ونتمنى مشاركتك على طول
شكرا على تهدية النفوس واكيد هزورك واجبلك عيش وحلاوة ...مهى الناس لبعضيها برضه

م/كونكورد said...

غالبا اما حد بيحب حد بياخد علي خطره منه بسرعه وده دليل علي حبه ليه لكن انصحك بالصمت فالايام خير من يثبت