25 June 2007

3abratalsabeel محلااها عيشة الحرية



الــــــــــــــــــحـــــــــــــــــــريـــــــــــــــة


------------------------------


لما بفكر فى معنى الحرية بفتكر الحكمة اللى ماما علمتهالى :انت حر ما لم تضر


وحقيقى حكمة مهمة قوى ...وحقيقى ما لقتش حد حر فى اى حاجة الا وليها علاقة بالناس والناس بتتاثر بحريته دى مهما حصل


...................................................................................................................................................




عصافير الجيران


---------------


جارتنا راحت تصيف وسابتلنا عصافيرها ...شهر بحاله عصافيرها عندنا ....كنت مبسوطة بيهم قوى فى الاول ....بس زعلت بعديها ...تصوروا العصافير تقتل عيالها؟!!!انا ما كنتش اتصور ان المخلوقات البريئة دى تقتل عيالها ..وقعدت افكر كتييييييير ليه العصافير قتلت عيالها ...ولسه عارفة دلوقتى .....العصافير كانت حاسة انها مسجونة خايفة وقتلت ولادها عشان ما يتسجنوش زيها


.........................................................................................................................................................




تملكّنى ولكن ملكّنى العالم بعد ذلك


-------------------------


فى مرة قاعدة فى امان الله بتفرج على التليفزيون ...وفى نص ساعة الاعلانات قلت اغير اتفرج على حاجة تانية...لقيت مسلسل الف ليلة وليلة ،قلت يللا اهى تصبيرة والسلام ...كان شهريار بيقول لشهرزاد :انت ملكى ...فردت عليه بكل تناكة وسزاجة ومسكنة الممثلات العربى بتوعنا :تملكنى ولكن ملكنى العالم بعد ذلك


شدتنى الكلمة دى قوى .... يعنى ايه حد يتملك حد ويملكه الدنيا بحالها فى نفس الوقت ؟


ازاى يعنى؟ طول عمرى بقول مش ممكن حد يتملكنى وعاشت عابرة السبيل حرة مستقلة ،والاستقلال التام او الموت الزئام.....هى زئام بتتكتب كدا برضه ؟!!!مش عارفة .....المهم


لما سمعت الكلمة دى عجبتنى ....فعلا شهرزاد كان عندها حق ...ممكن الواحد يبقى مملوك لكن مالك الدنيا بحالها


كوكوكوكوووووووووووووووووو


........................................................................................................................................................................




عندما تعشق الشيكولاتة


-------------------


عارفين طبعا اعلان شيكولاتة جالكسى .....ما تعرفهوش؟ طيب تعرفوا اعلان كادبرى؟....كمان دى ما تعرفوهاش؟...ايه ما بتتفرجوش على الاعلاانات؟طيب اقولكم انا ...فى لما يحطوا كوباية لبن على شكولاتة تطلع بقدرة القادر قالب شيكولاتة شكله جميييييييييل ...


اهو ...باسم الحرية احنا بنفتكر اننا بقينا احنا والغرب كده ...بنمتزج بيهم زى امتزاج اللبن بالشيكولاتة


بس الحقيقة...اننا عشقنا الغرب بس ما اتمزجناش فيه ...احنا حبينا حريتهم فخدنا لون الشيكوتة وهما ما خدوش مننا حاجة....بقينا لون من غير طعم ولا معنى ...مابقيناش لا كادبرى ولا جالكسى...بقينا شكولاتة من اللى بربع جنيه اللى مش شكيولاتة خالص....


سلام عليكم ...




26 comments:

عابر سبيل said...

فعلا محلاها عيشه الحريه
بس يعنى ايه حريه
الحرية هي حالة التحرر من القيود التي تكبل طاقات الإنسان و إنتاجه سواء كانت قيودا مادية أو قيودا معنوية ، فهي تشمل التخلص من العبودية لشخص ، التخلص من الضغوط المفروضة على شخص ما لتنفيذ غرض ما ، أو التخلص من الإجبار و الفرض .

عموما ومن غير كلام فلسفى انا متفق معاكى ان الحريه هى من اهم متتطلبات الانسان
وبرضه متفق جدا جدا مع كلام الاخت شهر زاد
بس ايه بقه علاقه الموضوع بالشوكولاته؟؟؟؟؟؟؟؟؟
يريت توضحىىىىىىىىىى
وربنا يزيدك حريه فى بلد ما فيها ريحه الحريه

3abratalsabeel said...

انا كتبت النهاردة عن موضوع الحرية عموما ...يعنى هى ايه علاقة عصافير الجيران بشهرزاد؟
انا بتكلم فى الشيكولاتة عن الحرية الللى العرب بدأو يتحججوا بيها ويقلدوا الغرب من خلالها

بس كده ..سلام عليكم

3abratalsabeel said...

شكرا على التعليق يا عابر السبيل عقبال بقيت الناس
لما يردوا علينا

م/أبراهيم said...

السلام عليكم ورحمة الله
عابرة سبيل,بجد عجبنى جدا أسلوبك فى الكتابه فأنتقالك من احداث الواقعه القصيره التى غالبا ماتكون مختلقه الى شمولية الموضوع اللى عايزه تتكلمى فيه فيها أبهار واعجاز تخلى القارىء يستمتع وهوه بيقرا, كمان وجه الشبه بين القصه المختلقه والموضوع الاساسى بتسيبيه للقارىء اللى المفروض يكون زكى عشان يستنتجه,واضح جدا ميولك الادبيه ,كما أن مستقبلك فى كتابة القصه القصيره باهر جدا,أعتبرينى بكتشفك.ا

توضيح:الزؤام بتتكتب كده على ما أتعتقد
:ردا على تعليق د/عابر سبيل عن الحريه المفقوده فى بلدنا عايز أفكرك بس أن فيه فمجلسى الشعب والشورى يجى تلتين أربعين عابر سبيل زيك أليست هذه حريه.؟
شكرا على أتاحة الفرصه واتمنى من الله ان لا نأخذ من الشيكولاته لونهاالداكن فقط بل نأخذ الطعم أيضا وتكون الشيكولاته بتاعتنا بنص جنيه مش بربع بس
سلام عليكم

صباح الخير said...

عابرة السبيل رجعتلنا بدمها الخفيف ومواضيعها الذيذه
الله على مامتك دى فعلا انت حر مالم تضر
انا حر بس اوعى تضر نفسك
فكرتينى وانا بلعب بالكبريت من 40 سنه ساعتها ماما ضربتنى وقالتلى هاتضرى نفسك كده وبعدين تأزينا كلنا فعلا الام مدرسه
اما حكاية الشكولاته دىفدى بتثبت ان خيالك واااااسع وتنفعى فيلسوفه احنا فعلا لا حصلنا الغرب فى جمال صناعته ولا اتمسكنا باصلنا الابيض اللى زى اللبن فى نقاوته وبذلك اصبحنا شىء بلا طعم
بس ااقولك يا عابرة انها سحابة صيف وهاتعدى والعربى هايفضل عربى حر اصيل بس اما يلاقى حد يشحذ همته (حلوة يشحذ دى) اشمعنى انت تكتبى الزؤام يعنى
ابقى زورينى

sendbad said...

كل فقرة بوست لوحدة وعايز تعليق لوحده انما الخلاصة اننا فقدنا الحرية من زمن حتي الحرية في اختيار الحرية فقدت من ايدنا بس ياتري مين السبب احنا ولا الزمن ولا هما مين هما اللي علي راسة بطحة
تحياتي

feeling said...

كلامك بسيط وعميق جدآ
بما انى بعشق الشكولاته راح اعلق على
الموضوع دا
........
كلامك فيه جزء من الحقيقة
بس من قال ان الغرب مااخذو مننا اي شىء على العكس تمامآ هما اخذو اجمل ماعندناوبشكل عملى مش زينا احتفظنا فيه داخل كتب و فضلنا واقفين على اطلال الماضى ولمافوقنا للاسف اخذنا منهم توافه الامور
...........
ممكن تقولى عنى انى مبالغه فى كلامى
والله فى ناس منهم ناقصهم الشهاده بس

3abratalsabeel said...

هااااااا ..اتنين جداد اتنين جداد ...اهلا وسهلا ومرحبا ...ايه النور ده ..سندباد وفيلينج وكمان م/ابراهيم ...بجد شرفتونا قدام الاجانب -------------------------------
سندباد
----------
اوعى تكون جاى على سيرة شهريار ..اه ما انا عارفة كمان شوية هلاقى على بابا والاربعين حرامى ...نورت المدونة وشكرا على تعليقك واعتقد ان العيب فينا احنا( نعيب زماننا والعيب فينا وما لزماننا عيب سوانا)
---------------------------
فيلينج
---------
مش انتى سمسمة برضه ؟ اهلا بيكى يا فيلينج ..طبعا منورة
يمكن بحكم عشرتك للغرب فاهماهم اكتر مننا اكيد
شكرا على التعليق مرة تانية
-----------------------------
م/ابراهيم
----------
والله انا مش عارفة اقول لحضرتك ايه ..اخجلتم تواضعنا ،وده شرف ليا انك تكتشف موهبتى ..دا اذا كنت موهوبة فعلا
وشكرا على تصحيح كلمة زؤام
مجاملتك رقيقة ..شكرا على تعليقك ويارب نشوف تعليقاتك على طول فى المدونة
----------------------------------
صباح الخير
---------
يا صباح النور ...شكرا ليكى على زوقك بعتزر انى لسه ما علقتش فى مدونتك ..اوعدك عن قريب ان شاء الله
مش قلنا بلاش لعب بالكبريت ،وحلوة يشحذ فعلا
والله انا لا فيلسوفة ولا حاجة ده انا بس بعبر عن راييى وتفكيرى
اكيد العربى هيفضل عربى ..ومصر بتتقدم بينا وهى دى مصر يا عبلة ..ااقصد يا صباح
لسه فى امل ..
-----------------------------------
سلام عليكم

The Terminator said...

لو مفيش حرية
يبقى مش هايكون فيه ابتكار أو ابداع
لأن الانسان اللي مش حر مش هايقدر يكتشف مواهبه وامكانياته
ومش هايكون فيه نجاح
لأنه دايماً باله مشغول بحريته المسلوبة
عشان كده عايزين دايماً نكون أحرار
ده أكيد هيوصلنا لحياة أفضل ونجاح مستمر

عجبني البوست ... تحياتي

Ahmed Moghazy said...

ولا ونى مش عارف اية علاقة الحرية بالعصافير بالشكولاتة , لكن عجبنى موضوع الشوكولاتة

والله انا شايف رغم كل شىء اننا بردو لسة شوكولاتة من اللى بمليون جنيه
لسة فينا حاجات حلوة كتير
والغرب فيه حاجات كتير علشلنها تغور عيشة الحرية اذا كانت هتكون بالشكل ده

والحمد لله على نعمة الاسلام
ونعمة الحلال والحرام
ونعمة الادب والخجل
ونعمة التعلق بالسماء
ونعمة صلة الارحام
والنعم كتير بس بلاش نجلد نفسنا اكتر من اللزوم

Dody said...

بوست رائع جداااا ويحمل معانى جميله
وعجبتنى اووووى الحته بتاعت عصافير الجيران

ابراهيم عز الدين said...

بجد كلام رائعوفيه احساس عالي
انا اول مرة كون هنا بس بجد فرحان علشان عرفت مدونة عالية اوي كده

Sharm said...

الحرية اجمل شئ في الوجود

عابرة السبيل said...

سلام عليكم
:مغازى
--------
انا ماقلتش اننا وحشين قوى كده ...فينا الكويس طبعا بس فينا اللى اتغيروا للاسوا ...ودول هما اللى خدوا من الغرب حاجات باسم الحرية اللى انت بتقول عليهاتغور ...عندك حق مافيش جلد ولا حاجة ...ده مجرد هزة راس من اللى بيحصل...مش محتاج شكر طبعافالبيت بيتك ..بس شكرا على التعليق
-----------------------------------
دودى
----------
اهلا بيكى يا دودى والله حاسة انك زى اختى الصغيرة ...وهى كده القلوب البريئة بتحب اللاشياء البريئة علشان كده عجبك موضوع العصافير...
شكرا على زيارتك لمدونتى ودايما اشوف تعليقك على كلامنا ..
-----------------------------------
ابراهيم عز الدين
-----------------
ادام الله فرحكم ...وشكرا ليك على الزيارة وعلى الكلام الحلو ده..وبجد لولا عابر السبيل ومغازى ومى المدونة عمرها ماكانت هتبقى حلوة زى مانت بتقول ...الابداع الجماعى حلو ..مش كده ؟
-----------------------------------
شارم
-----
اهلا بيك فى المدونة ...انت بخيل ولا ايه؟سطر واحد بس تعليق هو انت من انصار (خير الكلام ما قل ودل)ولا ايه؟
...شكرا لزيارتك وتنورنا دائما
-----------------------------------
انا كنت بقول برضه الناس هتيجى فى الاجازة عندنا ...منورين فى القاعدة تملى ان شاء الله
سلام عليكم

علاء said...

أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

feeling said...

بصراحة ياعابرة وبدون مبالغه
انتى لك حس جميل فى المدونه
ومش زي مابتقولى انا
الناس بدات تجى عشان الاجازة
من اول مرة دخلت فيها
كلامك واسلوبك شدونى
مع تقديري لكل اللى معاكى

م/كونكورد said...

عاوز اقلكم حاجه مهمه الغرب بيقوم بدوره علي اكمل وجه وهو محاربة كل من يقول لا اله الا الله محمد رسول الله فهل نحن نقوم بدورنا انا عارف ان تعليقي بعيد عن الموضوع سمحوني واختم كلامي ببيت قاله الشيخ محمد حسان انا لا ألوم الغرب في تخطيطه ولكني ألوم المسلم المفتون

المهاجر said...

لقد تكلمتى بما احلم به
الحرية
السلام عليكم ارجو مساعدتكم هذه فكرة ممكن تكون تحوير لفكرة ياسمين مش مهم مين صاحب الفكرة المهم نكسر القيود و صوتنا يهز الغول
الفكرة مطروحة على مدونتى فارجو المشاركة او ابداء الراي
http://eg-migrator.blogspot.com/

mo'men mohamed said...

فعلا اختى صدقت احنا بقينا مناظر وبس من بره هلا هلا و من جوة يعلم الله
بس بالنسبة لموضوع العصافير ده
انت فسرتيها تفسير عاطفى شويه
هههههه
كل الحكايه ان اللى حصل من العصافير دى حاجه عندنا فى الطب البيطرى بنسميها
canabalism
بتبقى نتيجه الضوضاء أو سوء التهويه و الرطوبه العالية أو درجة الحرار العاليه وممكن تكون نتيجه لنقص البعض العناصر الأساسية زى الكالسيوم أو يكون فى عيب اصلا فى البيض
او ممكن انت من كتر حبك ليه بتقعدى معاهم على طول فخافوا منك فعملوا كده
موضوع جميل
السلام عليكم

!!! الراس الكبيرة منة said...

الحرية ان الواحد يبقى قلبه حر
بيفكر بحرية من غير قيود ولا يشيل هم

بوست رائع بجد
سلام

ياسمين said...

كل جزء هو بوست لوحده
كنت افضل لو كتب كل منهم على حدى

كمان ارجو الغاء شباك التعليقات عشان بيعوق قراءة تعليقات باقى الزملاء

طلباتى كتير مش كدة

أكثر جزء عجبنى بتاع العصافير

مافيش أم تحب ان ولادها يعيشوا ظروفها الصعبة

انا أم وعارفة دة كويس

ممكن تتحمل قمة الألم علشان ولادها ما يحسوش بلحظة ألم
تحياتى

Lemonada said...

كلام الوالدة جميل خالص
والشكولاتة والشرح والدعاية وترابط الافكار عسل وجامد جدا
احييك على هذا العرض

safa7_karmooz said...

طب انا كده ارد على انهى جزء بقىىىى :D

3abratalsabeel said...

سلام عليكم ...اسفة على تاخير الرد يا جماعة اكيد عرفتوا السبب
----------------
ارد بقى على تعليق تعليق
------------------------
علاء
-------
شكرا على الزيارة وانا كتبت تعليق عندك فى المدونة
-------------------------
فيلينج
-------
شكرا على الكلام الحلو ده ....رفعتى معنوياتى ...بس ما فيش شك ان الاجازة ليها مفعول برضه
---------------------------

3abratalsabeel said...

المهاجر
--------
زيارتك تهمنا ...هاجرت ليه بس ؟يعنى هى مصر مافيهاش مكان ليك ...
شكرا على الزيارة ....موضوعك هتتم دراسته ان شاء الله ربنا يسهل
---------------------------
مؤمن
-------
الله يسامحك ....العصافير ما كانتش خايفة منى ولا حاجة لانى كنت ساعتها عصفورة زيهم ..
شكرا على المعلومة يا دكتور ...العلم نور برضه
-----------------------------
الراس الكبيرة منة
--------------------
نورتى المدونة ...طبعا واضح انى متحيزة للبنات هنا ...
الحرية ليها معانى كتير قوى ...انتى عارفة ان ممكن الواحد يكون مسجون بس حاسس بحريته ...لما يكون الانسان ليه صلة قوية بالله ...قلبه متعلق بالله ...ساعتها ولا اى قيد هيقدر يسجنه --------------------------------

3abratalsabeel said...

ياسمين
------
هو ده كان قصدى يا ياسمين ...وانتى حسيتى بيه فعلا لانك ام ربنا يخليلك اولادك ...طلبك انا مش فاهماه ...يعنى ايه اشيل الشباك ؟امال اشم هوا منين ؟
موضوع ان كل موضوع عايز بوست لوحده ده ...مش عارفة فى ناس قالت كده برضه ..بس يعنى اكتبلكم بالقطارة؟
-----------------------
شفتوا يا شباب البنات فاهمة اهو معنى كلامى
---------------------------
ليمونادة
---------
شكرا يا ليمونادة على الزيارة...وشكرا على الرد هنيجى جنبكم ايه بس؟
-----------------------------
سفاح كرموز
-----------
هو جر شكل يعنى ولا ايه؟
ما تكتب اى حاجة ....ولا انت مش فاضى وراك قتيل تدفنه؟
---------------------------------
بجد يا جماعة منورين ويارب تفضلوا عندنا على طول
اكيد هزور مدوناتكم كلها ان شاء الله
سلام عليكم