10 July 2007

3abratalsabeel حد يقول مبروك

صلوا على النبى ...طيب قولوا ماشاء الله ...حد يسمعنى زغروتة ......مش عارفين ليه؟


احنا اتشبكنااااااااااااااااااااا....هااااااااااااااااااااااااااااااااااااااااااااااا

ا


!!!!!!!!!!!!!!!!!....مش عارفين احنا مين؟ انا وعابر السبيل اللى بنكتب هنا


ايوة انتو اكيد كنتم عارفين او بتشكوا فى الموضوع ...انا وعابر السبيل مخطوبين ...امال يعنى اسامينا زى بعض ليه؟عياقة يعنى؟ ...من قبل الامتحانات ...قرينا الفاتحة ولبسنا الدبل ودلوقتى من يومين تلاتة كانت الشبكة....الحمد لله





عارفة هتقولو ندلة وما عزمتيناش.......والله يا جماعة انا ماكنتش فاضية خالص حتى افتح الكمبيوتر ..وبعدين الحفلة كانت عائلية خالص ...يعنى يجى خمسين واحد بس ...خمسين هه وكانت يوم الخميس، خمسة سبعة...الحفلة كانت عائلية وحقيقى كانت زحمة وما كنتش شايفة قدامى



ما سمعتش ولا زغروتة لغاية دلوقتى ..ولا واحد قال مبروك ...ايه ده ؟وكمان عايزين حاجة ساقعة وجاتوه؟...مافيش هدايا يبقى مافيش حاجة ساقعة ولا جاتوه ولا حتى سندوتش جبنة ...بس هه...


مافيش صور طبعا للشبكة ...اللى يعرفونى من الكلية يستنوا لغاية ما نرجع وان شاء الله تكون الصور معايا ..اما اللى يعرفونى من المدونة بس ....مش هينفع احط صور ..كانوا يطخونى فى البلد

اه يا بنات عندى نصيحة ليكم ...ان شاء الله عن قريب فى خطوبتكم او فى فرحكم ...لازم تكونى نايمة كويس وشبعانة نوم ..عشان تقدرى تكونى مركزة فى الحفلة مين اللى بيغمس عليكى ومين اللى بيتريق عليكى او على خطيبك ...وسجلى فى دماغك كله وطلعيه عليهم


وكمان اهم حاجة ....لازم تكونى واكلة كويس قوى من اليوم اللى قبليه لانك يوم الحفلة مش هتعرفى تاكلى اى حاجة بكتيرك هتشربى ميا ...ما تعمليش زيى جعت وعطشت ونمت وماكنتش شايفة ولا سامعة حاجة


انا كتبت البوست ده صحيح لكن عارفة ان عابر السبيل كان عايز يقولكم :نحن السابقون وانتم اللاحقون وبيقول للشباب بالذات ...كلنا لها ...عقبالكم


انا اسفة على تاخير الرد على تعليقاتكم فى اخر بوست ...هرد دلوقتى على كل الكلام


سلام عليكم ...ادعولنا ربنا يتمم لنا على خير....


عـــــــــــــقــــــــــــــبـــــــــــــــالــــــــــــــــكــــــــــــــــم ...




29 comments:

عابر سبيل said...

السلام عليكم
طبعا اكيد انا اول واحد اكون رديت على البوست ده لان انا كنت مستنيه من
زمااااااااااااان
طبعا انتم ياشباب مستنين منى نصيحه
بجد بجد زي ما رسلنا قال خير متاع الدنيا زوجه صالحه
هى صحيح عابره السبيل لسه مبقتش زوجتى بس ان شاء الله فى القريب العاجل
المهم الى انا عايز اقوله ان الموضوع جمييييييييييل اوى اوى وكمان اوى
اول متحس انك قادر عل الموضوع متستناش لحظه بس خلى بالك وانت بتختار
عموما فعلا فعلا انا ربنا رزقنى بخطبتى دى وعرفت ان الله عز وجل بيحبنى
وكفايه كده بقه
سلام عليكم

صوت الشعب said...

الف الف مبروك
ولا نخليها خمس الاف مبروك..........عشان الحسد

مبروك يا عابر السبيل..وعقبالى انا كمان

ماما said...

الف الف مبروك ليكى وليك يا عابرى السبيل بس ماينفعش كدا لازم انت كمان تكتبلنا بوست جميل يا عابر السبيل بس عموما احنا كمان كسبنا انسان متميز وربنا ان شاء الله يتمم بخير ونشفكوا فى بيتكم قريبا

آمنة said...

مبــــــــــــــــــــــــــــــــــــــــــــروك :)
وانا كنت أحسسبكم إخوان!!
ألف مبروك

safa7_karmooz said...

مبروووووووووووووووووووووووووك

الف مبروووووووووووووووووووووك ليكم بجد فرحت اوىىىىىىىىىىىىىىىىىىىىىىىىىىىى

والبلوجرية زادوا اتنين

يلا عقبال ناس تانية كمان شهر ونص ان شاء الله ...:)

فين الساقع

ولا تتخطبوا وتاكلوا واحنا نتفرج

لا لا ...لن ارضى بأأقل من محل توينكى فرع الهرم :p

م/كونكورد said...

بما أني لسه طالب وزي كل الطلاب مستني النتيجه لكن فرحتي بالخبر الجميل ده نستني القلق الف الف الف مبروك وربنا يتمم ليكم بخير وعلي فكره احسن حاجه عجبتني في الموضوع ده انه كان في طي الكتمان /ويشهد لهذا قول النبي صلى الله عليه وسلم : ( استعينوا على إنجاح الحوائج بالكتمان ، فإن كل ذي نعمةٍ محسود ) رواه الطبراني وصححه الألباني في صحيح الجامع (943) .

وهذا ليس خاصاًّ بالخطبة ، بل ينبغي للإنسان أن لا يظهر نعمة الله عليه أمام من يحسده عليها / محدش يفهمني غلط انا عارف ان كل الناس هنا تتمني الخير لبعض لكن اللي زعلان مني يقرأالحديث اللي فوق .

سندباد said...

مليون مبروووووك...ربنا يوفقكم و يجعل حياتكم سعيدة
بوست عسل وخبر مفرح..حاجة تفتح الشهية لإرتباط

كل الأمنيات الطيبة

Anonymous said...
This comment has been removed by a blog administrator.
م/أبراهيم said...

السلام عليكم ورحمة الله
عابرى السبيل الف الف مبروك من كل قلبى ويارب يتمم بخير
بس المره اللى جايه متنسوناش بالجاتوه
عشان منزعلش منكم
كمان مره الف مبروك ياأحلى اتنين مشبوكين فى العالم العربى كله , متشكر قوى ياعبر على النصيحه ,بس خلى بالك باللى انته عملته ده الكويسين زادوا واحد عقبالى ياكنكورد انا وانته لما ننضم لقائمة الكويسين , قريب ان شاء الله
سلام عليكم

sendbad said...

مبروك وربنا يتمم بخير انشاء الله كل المدنون بيدعوا ليكم بالسعادة الدائمة

مغغازى وسمسمة said...

الف الف الف مبروك يا عابرى السبيل

طبعا ببارك بنفسى ونيابة عن سمسمة لاحلى عريس واحلى عروسة وان شاء الله كده نشوفكم فى بيت الزوجية
ونشوف اولاكم علشان ينورو مدونةابوهم وامهم

والف مبروك ليكى يا ماما
وعقبال الدكتورة
وببلغك سلام وتحية سمسمة

والله فرحنالكم كتير
وادعولنا ربنا يكرمنا احنا كمان

يارب يبارك فيكم ويبارك فى ذريتكم ويرزقكم رزق حلال

علاء said...

ألف مبروووكجعلكم الله زوجين صالحين
و جمعكم على خير في الدنيا و في الآخرة

mo'men mohamed said...

من الواضح انى جيت متأخر
معلش انا أسف
ألف مبروك عليكم انتم الإتنين
وربنا يوفقكم يا ب لما يحبه و يرضاه
ويهديكم سواء السبيل
والله الواحد لما بيشوف كده كل يوم ناس عمالة تتخطب وناس بتتجوز بيتحسر على نفسه
أمتىىىىىىىىىىىىىىىىى
امتى بقة يجيلى يوم أحط انا كمان بوست زى ده
ههههههههههههههه
مبروك كمان مره
السلام عليكم

3abratalsabeel said...

سلام عليكم
الله يبارك فيكم كلكم...انا بشكركم كلكم وعقبالكم كلكم ان شاء الله
-------------------------
صوت الشعب
---------
الله يبارك فيك وعقبالك يا سيدى
------------------------------
ماما
----------
تعليقك منور المدونة والله ...يارب تكتبيلنا تعليق على طول هنا
-----------------------------
امنة
-----
اهلا بيكى يا امنة،زيارة دائمة ان شاء الله ....كلنا اخوات فى الله ...
-------------------------------
سفاح كرموز
------------
الله يباااااااااااارك فييييييييك عقباااااااالك
مين الناس التانية دى ؟
فين الهدية الاول ؟ ومعلش يعنى فين محل توينكى ده ..انا من القاهرة مش من الجيزة ...روح انت خد المحل وقولهم على حساب عابر السبيل وعابرة السبيل
-----------------------------------
م/كونكورد
----------
يا باشمهندس احنا ما كتمناش حاجة بس مش كنا فاضيين نقول بس ...
والله خير حارس ..وكنا عايزين نعلن الخطوبة بعد الامتحانات بس قلنا نخليها فى مناسبة حلوة ...كنا هنعلنها لما النتيجة تطلع ...بس هى اتاخرت شوية
...عقبالك يا كونكورد
-----------------------------------

3abratalsabeel said...

سندباد
-------
انا ما كنتش اعرف ان فى اتنين سندباد ..دى اول زيارة ليك للمدونة ...اهلا بيك
ربنا يفتح شهية الشباب كلهم على الارتباط ويسهلهم الصعب
عقبالك
----------------------------------
م/ابراهيم
----------
بقى كده يا باشمهندس ؟...ماشى ...نشيلك نصيبك ..
عقبالك
-----------------------------------
sindbad
--------
انا كده هتلخبط بينكم ...بس حلو ان فى سندباد عربى وانجليزى
الله يبارك فيك ...وعلشان المدونين يفرحوا احنا فكرنا نكتب البوست ده
عقبالك
----------------------------------
مغازى وسمسة
----------
تصدقوا ...انتو لو ما كتبتوش بوست زى ده قريب ..انا هاجى اكتبهولكم
امين يارب احلى دعوة قريتها وسمعتها ..ربنا يجعلكم نصيب منها
بس انا عايزة سمسمة تنور المدونة هى فين؟
-----------------------------------
علاء
----------
الله يبارك فيك وامين يارب نجتمع كلنا على خير الدنيا وخير الاخرة

---------------------------------

مؤمن
---------
مش متاخر ولا حاجة ...اهلا بيك منور
كفاية انك رديت علينا
امين يارب
وما تتحسرش ولا حاجة ..بكرة ان شاءالله تلاقى نصيبك وربنا يسهلك وتتجوز وتقول ياريت اللى جرى ما كان
كله بيقول كده
الله يبارك فيك
--------------------------------
بجد يا جماعة انا مبسوطة وفرحانة انكم رديتم علينا بالسرعة دى ..عرفت بجد مين اللى بيحب مدونتناوبيتابعها على طول
سلام عليكم

Mohamed Hamdy said...

الف مبروك وعقبال الزواج ان شاء الله

صباح الخير said...

ايه الحلاوه دى
وايه الطعامه دى
عابر وعابره ما شاء الله لايقيين على بعض بجد فرحتلكوا
ياريت كنتم عزمتونى كنت نفسى افرح معاكم ،الف الف الف مبروك كنت مسافره ولسه راجعه علشان كدا التهنئه متاخره ولو ان الفرح يارب دايما معاكو والف مبروك خاصه لعابر السبيل اللى عرف ينقى وعقبال الجميع تمنياتى بالسعاده

عابرة السبيل said...

سلام عليكم
-----------
محمد حمدى
--------------
اهلا بيك هنا والله يبارك فيك ...امين يارب ..عقبالك
---------------------------------
صباح الخير
------------
انا قلت برضه اكيد فى حاجة اخرتها عن الرد ..الف حمدالله على السلامة
الله يبارك فيكى ...ربنا يخليكى يارب ...بس مش عارفة اقولك عقبالك ولا عقبال ولادك؟اوضحى لينا ا شوية...
والله انا كان نفسى الناس كلها تبقى معانا بس انتى عارفة بقى الازدحام السكانى ...والعمارات اللى مافيش منها رجى انها توسع فى المناسبات
يارب يديم السعادة على الكل
-----------------------------------
سلام عليكم

أحمد عيسي said...

الف الف مبروك

علاء said...

ده موضوع التجمع ياريت أعرف رأيك

المدوّن خانة

Lemonada said...

مليون وخمسمية مبورك لعابرة السبيل وعابر السبيل
وعقبال ماتيجبو عابرين السبيل
ههههههه
بجد فرحانة ليكم مع اني مش عارفاكم
بس
فرحانة من قلبي
عقبال ما مدة الافي ليمون
ونكون ليموناضة وليمون
ههههههه

عابرة السبيل said...

احمد
------
الله يبارك فيك ...عقبالك
------------------------
علاء
-------
ردى ان شاء الله يوصلك هناك
--------------------------
ليموناضة
----------
عاش من شافك ...انتى كنتى فين ....الله يبارك فيكى ...عقبالك يارب لما تلاقى ليمونك
...بس الحقى اتجوزى قبل العصر ..;)
---------------------------
سلام عليكم

سمسمة said...

مبروك
انا سعيدة جدآ لكم
يارب تكونى اقرب
الناس لقلبه طول العمر
ويكون هوا كل الناس لك
.......
وعقبال الدكتوره انشاءالله

بما ان انا واحمد كل واحد من بلد
اكيد الموضوع راح ياخدوقت
بس بدعاء ماما وكل اللى يحبونا انشاءالله ربى يوفقنا
يارب يسعدك بعابر ويسعد عابر بيكى
بارك الله لكما وفيكما وجمع بينكم فى خير

HoNdA said...

بارك الله لكما وفيكما وجمع بينكم فى خي

تخاريف دكتور said...

لولولولولى
مبروووووووك عليكم
ربنا يتمم بخير

عابر السبيل said...

سلام عليكم
----------
سمسمة
--------
اسفة على تاخير الرد ...ما خدتش بالى غير دلوقتى ان فى ردود هنا
ربنا يخليكى يارب
حقيقى مش عارفة اقولك ايه
ربنا يجعل لكى نصيب من الدعاء ده
وربنا يسهلكم كل صعب
------------------------------
honda
--------
امين يارب ...شكرا
------------------
تخاريف دكتور
-----------
انت الوحيد اللى زغرت هنا ...ليك دستة جاتوه بحالها
:)
على حساب عابر السبيل
------------------------
سلام عليكم

باسم الفارسة said...

قلوبنا .. و تسلل الحب الى قلوبكم .. شبكتم بأيدكم معا .. لتكملوا الحياة جنبا الى جنب ..الف الف مبارك .. بارك الله لكما و عليكما و جمع اللهم بينكم على خير صديقاي ..
أود ان اقول ان الحياة رسم بلا محي .. فاحسنوا رسم حياتكم بما يحب الله و يرضى ..
أود أن أهب لكم كل الايام لتحييوها بحب .. بسعادة .. بأمل .. و غدا تباع الايام بيننا و بين اجمل اللحظات .. فتجيئون الى مذكراتنا نفك معا جدائل الذكريات و نمضي .. و نلعن انكم أميرين .. و تتوجكم مملكة الاحبة
و لكم مني أرق تحياتي النرجسية من قلب فلسطين

أُكتب بالرصاص said...

مبروك
اول مرة اجي هنا واسمع الاخبار الحلوة دي



بابالركة إن شاء الله

The Groom said...


بارك الله لكما وبارك عليكما وجمع بينكما في خير

وألف ألف مبروك ولو انها متأخرة شوية

تحياتي لكما من ماناساس البلد