21 July 2007

abratalsabeel عالم المدونات

عرفت عالم المدونات عالم كبير مليان امنيات

قلت اكتب عنها قبل ماالاقى الوقت فات

فيها ناس بتشكى همها وناس فيها بتسمع الاهات

واللى بيضيع فى قرايتها وقتنا واللى عايش وقته مخنوق بالساعات

واللى بيكتب عن حبيب جرحه وبالدموع بيملا بوستات

وبلوج اسود كله حزن وبلوج بمبى دمه شربات

وبلوج اخضر فيه الامل وبلوج اصفر ملين انتقادات

واللى ماسك قلم للحكومة بيكتبلها مخالفات

وشعر هنا ونثر هناك وفصحى دايبة فى كتابات

مواهب شابة عايزة تتسمع تتقرى او قابلة تتفات

صور كتير روعة او كئيبة لفنانين وفنانات

مسكوا ريشة رسموا حلم او كابوس او ممات

بنات بتكسر حاجز صمتها وبالكلام تملا صفحات

وشباب بيمّوت فراغه وينشغل عن خد وهات

تكنولويجا وحاجة تهوس وشات بوكس وفلاشات

وعروسة مستنية العدل وشباب غاوى افتكاسات

وحرب دايرة بين حقوق ضايعة ودموع وسجون وتنهيدات

مدونات تجيبك وتوديك واللى يقرا ما يمّلش ويقراها بالساعات


نعتزر عن العطل الفنى فى القافية والوزن .......ماليش فيهم ...المهم المعنى ..الاحساس ...السينسينج
:)
سلام عليكم

25 comments:

صوت الشعب said...

عسل انتى عسل
وكلامك سكر وشربات
والمدونات دى عامله زى بيت جحا
اللى يدخلها يتوه جوه

عابرة السبيل said...

سلام عليكم
تصدق يا صوت الشعب ...انت الوحيد اللى كتبلى تعليق ...
شكرا ليك جدا ...والله انا لو كنت اعرفك شخصيا كنت كتبتلك بوست ليك لوحدك
احنا فيها ....اعتبر البوست ده اهداء منى ليك ....
-------------------------
سلام عليكم

mo'men mohamed said...

أختى عابرة سبيل
المدونات أصلا اتعملت عشان كده
كل واحد يكتب اللى هو عايزة واللى حاسس بيه
جزاك الله كل خير
بس عجبتنى اوى حتتة السينسيج دى
السلام عليكم

عابر سبسل said...

السلام عليكم
والله معاكى حق فعلا عالم المدونات ده عالم غريييييييييييب جدا
دنيا تنيه
فيها كل الالوان والاشكال
وكتير الواحد بيتعلم منها
موضوع رائع
وبالنسبه للقفيه والحجات دى انا شايف انها مش وقعه اوى يعنى

عابرة السبيل said...

سلام عليكم
---------
مؤمن محمد
----------
جزانا واياك ان شاء الله ...علشان انت عندك سينسينج عجبتك
شكرا
-------------------------
عااااااابر السبيل
------------------
ربنا يعمر بيتك ...رافع معنوياتى ..

Ahmed Moghazy said...

المواهب بدأت تطلع اهى
بس ربنا يستر على الاوزان والقوافى
محاولة حلوة وجديدة

بس المدونة عايزة شغل اكتر من كده انا خرجت صحيح بس شدو حيلكو شوية

HoNdA said...

ماشاء الله لاقوة الا بالله بجد تحفه تحفه اوى يعنى ياريت تحاولى تكبريها هتبقا روعه عارفه المدونات دى زى عالم وكل عالم مختلف عن التانى وده الى بيميزة ربنا يوفقك حولى تكبيرها بجد

sendbad said...

المدونات فرصة للي عايز يتكلم للي عايز يقول
بس المهم نقول ايه ونتكلم في ايه
تحياتي

م/كونكورد said...

مش هقدر اقول الا برافو /ده وصف دقيق جدا جدا للمدونات والمترددين عليها ومش كده وبس لا ده وصف دقيق مصاغ بطريقه جميله /اقدر اقول ان ده ناتج عن حس مرهف/تحياتي

عابرة السبيل said...

سلام عليكم
---------
مغازى
-----
الشدة بالله ...شكرا
---------------------
هوندا
-------
اول زيارة ليكى هنا ...يا رب تفضلى متابعانا على طول
اكبرها؟ !!! انا مش هعرف اكبرها والله يا هوندا لان الكلام ده طلع فى ساعة روقان ...اللى هى بتيجى قليل قوى
شكرا لزوقك ولردك المميز
------------------------------
sindbad
---------
...تحياتى ليك برضه اهلين بيك
----------------------------
م/كونكورد
-----------
الحمد لله ..انك رديت علينا يا كونكورد ..هما دول المصريين ..اخوات ومابيزعلوش من بعض
احييك

ربنا يخليك يارب ..
من يقرا هو من يعطى للكاتب الشهرة والقيمة الادبية
شكرا ليك

احلام ضايعة said...

احساسك عالى ومش مهم القافيه زى ما قلت

المهم انه وصلنى يا ترى عارف ايه وصلنى ؟

ليك منى ابتسامه :)

Sharm said...

ولا عطل فني ولا حاجة

كله زي الفل

إنـســانـة said...

حنخبط فى الحلل بقا .. ايه مدونة سودا وكلها حزن دى؟؟؟؟
اومال عم كاميكاز بيهبب ايه فى المدونة يعنى؟؟؟؟؟؟؟

ما علينا

الله يبارك فيكى ياستى ... مش عارفة انتى اتخرجتى ولا لأ .. حاسة انه لأ .. يلا نحن السابقون وانتم اللاحقون بإذن الله

على فكرة انا عرفت مدونتك فى قاعة 10 كانت مكتوبة على البنش .. كتبتها فى ورقة وكتبت اللينك بتاع البلوج بتاعتى جمبها ع البنش بردو هههههههههه


المهم
ألف مبروووووووووووووووك ع الخطوبة والشبكة انا عارفة انى متأخرة اوىىىىى بس معلش لسة عارفة دلوقتى والله

ربنا يتمملك على ألف خير يااااااارب
آمييييييين

Abeer said...

جامدة جداااا

وحلوة أوي الوان المدونات

والسينسينج عالي جدااااااا

:)

keda-sponser said...

أنا أول ما دخلت عالم المدونات بلمت

كل واحد بيتكلم عن حاجه و بيغني في على حاجه ....ما كنتش عارف أقول كده إزاي ... بس أنت ما شاء الله عبرتي عن كل ده بطريقه تحفه و الله ... و ممكن تقبليني ضيف دائم على المدونه ؟

سلاااااام

3abratalsabeel said...

سلام عليكم
-----------
احلام ضايعة
----------
والله مش عارفة ..ممكن تقولى
وشكرا على الابتسامة
واهلا بيك فى المدونة يا رب تفضل عندنا على طول
---------------------------------
sharm
------
شكرا انا بقول كده برضه ...بس مش غرور يعنى

----------------------------
انسااااااااانة
----------------
---------------
اهلا اهلا اهلا
تعبتينى يا شيخة على ما عرفتينى
ايوة طبعا قاعة عشرة هى دى تتنسى
وبعدين بقى ايه نشرناها عالميا اننا بنكتب بالقلم على البنشات ...ناس منظمة :)

حقيقى انا مش عارفة مين عم كاميكاز ده غير انه وش ابيض فى المدونة
وانا ما اقصدش مدونتك او اى مدونة لونها اسود
انا عبرت بالالوان عن طابع المدونة
حلل ايه بس احنا دلوقتى بنستخدم الصوانى علشان اكبر

الله يبارك فيكى ...عقبالك ده اذا ما كنتيش سبقانى يعنى

اااااااااامين
---------------------------------
abeer
----------
ربنا يخليكى يا عبير ...هما البنات بس اللى بيحسو بالسينسيج ده
--------------------------------
keda_sponser
-------------
طبعا اكيد فور شور ابسلوتلى ...ضيف دائم ومستمر ان شاء الله
ميرسى على زوقك
-------------------------------
سلام عليكم

ياسمين said...

حلو البوست وبيشرح عالم التدوين فعلا

بس يا ريت تلغى الشباك بتاع التعليقات دة لأنه خنيق قوى وبيبقى بطىء لما احب اقرا التعليقات بتاعة الناس التانية
تحياتى

lonlysmily said...

كلامك لذيذ اوى علشان صريح ومن غير تزويق.مدونتك عجبتنى وهاخد فيها جوله كل شويه
على فكرةانا لقيت اسم المدونه بتعتك على ديسك عندى فى الكليه وعجبنى اسمه اوى انتى فى فيبس ولا ايه يا كتكوته؟؟

تخاريف دكتور said...

كله ات ات ات
وتقولى القافية عطلانة
اومال لو مش عطلانة

بوست ف الجون ربنا يكرمك

الطائر الحزين said...

مثلما نبحث عما يتفق معنا قراءتنا لمن يختلفون افادة لنا من ناحية جهلنا بعوالم لم نطرقها
تحياتى

م/ابراهيم said...

سلام عليكم ورحمة الله ,أنا آسف جدا يا أخت عابره على التاخير كنت مشغول شويه, وصدقينى مش هتاخر تانى ,موضوعك جميل والشعر وسيله جميله فى توصيل المعنى انا بحب المعنى يوصلى عن طريق ابيات شعر ,ناس تانيه بتحب المعنى عن طريق رسم أو حتى قصه او .....أو...او الى آخره ,عالم المدونات غريب وجميل
وفى احيان كتيره مفيد ,كمان مره آسف على التاخير
سلام عليكم

عابرة السبيل said...

ياسمين
-------
شكرا ...تصدقى انا مش فاهمة قصدك ...لو لغيته يعنى الناس تكتب ازاى ؟
------------------------------
lonly smily
-------------
البيت بيتك ....تتجولى فى اى وقت وياريت تيجى يوم الخميس بنبقى عاملين اوبن بوفيه
:)
ايوة يا سمايلى انا من فيبس الموقرة ...اهلا بيكى
--------------------------------
تخاريف دكتور
-------------
اهلا دكتور
ميرسى
انا عارفة طبعا انى كاتبة شعر عبقرى
بس متواضعة
-----------------------------------
الطائر الحزين
------------
احم احم
قريت كلمتك تلات اربع مرات على ما فهمتها ...حلوة وفلسفية
اكيد مدونتك كلها كده
شكرا
----------------------------------
م/ابراهيم
-----------
اهلا بيك ...ولا يهمك ...كل تاخيرة وفيها خيرة ....
شكرا
------------------------------------
انا كتبت البوست ده بعد ما حسيت ان المدونات فيها كل حاجة ممكن تخطر على بال حد
وحسيت انى عايزة اعبر عن اعجابى بالنعمة دى اللى خلتنى اعبر عن نفسى واقرا اللى كنت بتمنى اقراه من زمان
سلام عليكم

momken said...

جميل اوى الكلام وجميل فكره البوست انك تشرحى وتسجلى يعنى ايه تدوين
كمان اسلوبك دمه خفيف
وكلامك ظريف
بيفكرنى بالموليحى فى سيره ابن هشام

تحياتى

البنت الشلبية said...

بوست دمه خفيف وانا بعتبر ان البلوج بتاعتك لونها بمبى ودمها خفيف

سلام

عابرة السبيل said...

سلام عليكم
----------
momken
--------
شكرا على الكومبيليمو الظريف ده ...اشمعنا انت تقولى الموليحى ....هو مين ده صحيح؟
-------------------------------
البنت شلبية
------------
اهلا يا شلبية عاش من شافك .....ربنا يخليكى ده من زوقك ....