17 August 2007

3abratalsabeel

بضع ازرار ....عصفور كنارى احمر وجلاجل جرس ...رموز بيضاء صماء وباب اخضر مغلق
ينتظرون ...صامتون ....حتى العصفور صامت وجلاجله لم اعد اسمعها ولا استمتع بصوتها
ومربع قاتم مظلم ....
يوم ملىء بالفراغ ....اصوات ساكنة وحديث صامت .....وغياب رنين انتظره منذ البارحة ....رنين جعلته فى اعلى درجاته حتى اسمعه من بعيد ...ولم يأتينى حتى الان ....رموز بيضاء تناشدنى بان اطرق الباب الاخضر .....فألبى طلبها ...اتامل الحروف ...لاول مرة لا اجد اسم كان يملا الذاكرة .....تخوننى دمعة
2
ثم اطرق الباب الاخضر مرة اخرى
ياتنيى صوت ...انصت ...فاذا هى تقول لى
لقد قرب رصيدكم على النفاذ ...يرجى اعادة شحن البطاقة
انتظر حتى اسمع صوت جرز هاتفك ....
ولا ياتينى الرد
اضع هاتفى جانبا ....اتامل صورتك ....اكاد اقرر ان اضيفها لكلامى هذا لتكون انسا لى فى غيابك
اتذكر رفضى السابق بان تضع صورتك فى المدونة ... وتعجبك من رفضى
ابتسم واتراجع عن قرارى
تاتى على ذاكرتى اغنية ..لام كلثوم ...ادندن منها بضع كلمات لا اعرف سواها
ابحث عنها وسط شرائط الكاسيت القديمة التى تمتلكها امى ...
لم اجدها ...
افتح صندوق بريدى ...لا جديد ..رسالة او اثنين من زملائى فى الكلية ....اتذكر ايام امتحاناتى ...واتجول فى مدونات صديقة كتبت عن هذه الايام ....يصيبنى الملل ...واغلق الكمبيوتر ...وما البث ان افتحه حتى اكتب هذه التدوينة
اراجع اوراق كتبت فيها مسبقا ..اجد بضع سطور كنت قد تناسيتها ...ولكنى اكتبها الان
-----------------------------------------------------------------------------------------------
قمرى
-----------------
كل ليلة كنت ادنو من النافذة القى بنظرى فى السماء ...اتامل نجومها المتلألأة (اللى نفدت من السحابة السودة
اسالها ...اين غاب القمر ...فيجيبنى شهاب :لم يحن وقت ظهوره بعد ظللت اسالها ..وان غابت احداها (مهما معدودين اصلهم يجى خمسة ستة بالكتير )اشعر بالوحدة ...اسال صحيباتها عن سر غيابها ...فتخبرنى همسا بانها ذهبت تبحث لكى عن القمر....فيزداد املى فى اقتراب مجيئه
...
اتناسى انتظار القمر وتمر الايام وتنقضى الليالى .....
اسير فى شوارع مدينتى ...بعد ان غربت شمس نهارى ....اتامل رصيف المترو ....واذ بحبيبات الزجاج المتناثرة على رصيف المترو (اللى معرفش بتيجى منين )تضيىء ....وتنير السماء...وينجلى من وسط السحاب نور ...ارفع راسى للسماء فاجد القمر قد هل بدرا ...تتراقص حوله النجوم احتفالا بقدومه ...
ابتسم لقمرى عتابا ...تاخرت قمرى طويلا وطال معك انتظارى ...لكنك جئت اخيرا
------------------------------------------------------------------------------------------------
بس خلاص
انا عارفة انى غلست وكتبت بوست قبل عابر السبيل .....
سلام عليكم

13 comments:

عابر سبيل said...

السلام عليكم طيب حد يقلى ارد ازاى على البوست ده بجد انا جالس امام الجهاز لا استطيع ان اقول شىء
لقد هربت منى الكلمات وخانتنى التعبيرات
ولكن
عن الرنات فلعل من تنتظري رناته هو الاخر بشوق الى ان يرى جهازه وهو يرقص عندما يعرف ان من يرسل له اشاره اتصال هو تليفونك
ولكنك اكثر الناس معرفه بسبب عدم رناته وياريت تقللنا!!!!
اما عن تاخر ظهور قمرك فاعتقد انه كان حائرا فى البحث عن هذا الشباك ليراكى
فقد قرب ان يفقد الامل فى ان يجدك ولكن لسان حاله الان يقول الحمد لله انه وجد هذه السماء التى وجد فيها حياته التى كان يتمناها

concord said...

بوست جميل ينم عن حاجات كتيييييييييييير
ورد من عابر السبيل جميل وينم عن حاجات كتيييييييييير
مش هقدر أقول أكتر من
ما شاء الله لا قوة الا بالله
ويا رب يكون ليه انا كمان حد يقف يستناني في الشباك
للأسف المهندس أبراهيم اللي كان بيستناني في الشباك
لكنه باعني بثمن زهيد
وأفهموا ليه بقي أنتوا

keda-sponser said...

البوست ده مش مكتوب للقراء

البوست ده صاروخ موجه ... وأنا بقراه حسيت أني عامل زي عواجيز الفرح

بس قلت أنكد عليكي و أخش أكتب أي حاجه

أنا الوحيد إللي بيستاني في الشباك .... بتاع الفول .... أصلي بجيب منه كل يوم

هههههههه

سلاااااااااااام

الطائر الحزين said...

ممكن اصحح الخطأ
ذاكرتى وليس زاكرتى

كل منا يرى الاشياء من منظورة
فالبدر نراه اذا اقترب انتصاف الشهر العربى ومنا من يراه دوما بدر
ومنا من يرى تلألأ النجوم حتى ولو تلبدت السماء بالغيوم


تحياتى

عابرة السبيل said...

سلام عليكم
---------
عابر السبيل ...اهلا حمدالله على السلامة ايه عبقرية الرد دى ؟...
--------------------------
كونكورد
-----------
حقيقى انا مش فاهمة حاجة ..بس شكرا على التعليق الحلو ده
----------------------------
keda_sponser
------------
صاروخ ايه بس؟اسكتى لحسن يجوا يفتشوا المدونة
ده انتى نورتى المدونة بتعليقك وفرحتينى مش نكدتى عليا ..معلش النهاردة بتاع الفول بكرة يجى صاحب مطعم الفول بنفسه
خليكى عندنا على طول
---------------------------------
الطائر الحزين
--------------
تصدق وانا بكتبها كنت شاكه انها بتتكتب زى ما انت بتقول بس حبيت اكون مختلفة فكتبتها كده...هو ايه الفرق يعنى ؟
زاكرتى وذاكرتى؟
شكلها احلى كده:زاكرتى بس علشان خاطرك هصلحها
شكرا
طبعا طبعا مع انى مش عارفة ازاى الناس ممكن تشوف القمر دايما بدر ..دى ناس متفائلة قوى على كده
شكرا مرة تانية

لست ادرى من أنا said...

السلام عليكم ورحمة الله
لم اكن مصدقا اننى اقرأ بوستا كتب فى مدونه وأن كاتبته تختبىء تحت اسم مستعار,ظننت عندما قرات الموضوع انى اقرأ قطعه أدبيه لأديب مشهور ,فعلا انا منبهر بهذه الصوره الفنيه المرسومه ووصف الموبايل بدقه وكأنه متعاطف مع حالة البطله النفسيه,,عابرة سبيل :لقد ابدعت فى رسم الصوره ,وانتقالك السريع فى رسم البيئه الحزينه المحيطه بالبطله والتى تبحث عن شخص مهم بالنسبة لها والذى كان يملؤ الذاكره اسمه, جعلتينى اتعاطف مع البطله والتى يبدو ان ليس لديها رصيد كافى للاتصال بهذا ،الشخص الذى كان يملؤ الذاكره اسمه
اما بالنسبه للوحه الفنيه التى رسمتيها للبطله وهى تنظر من النافذه فترى نجيمات يتسامرن وهن يختبئن خلف سحابة خفيفه فما لبثت البطله ان تحدثت اليهن وسألت عن قمرها
فدخل الحوار شهاب كان يمر بالصدفه واجاب(لم يحن وقت ظهوره بعد)ذهبت احدى النجيمات للبحث لكى عن قمرك, استطعتى ان تجعلينى اتعاطف مع البطله وودت ان اعرف القمر هذا لأعاتبه على طول غيابه ,صوره فنيه رائعه ,سماءونافذه ونجوم وانسانه حائره تسأل عن قمرها ؛هذا القمر الذى عاتبته نجوم السماء على طول غيابه
عابرة سبيل لديكى موهبه ادبيه عاليه وصدقينى انا لا ابالغ فى ذلك
اما بالنسبه ل (كدا سبونسر) فهو ينتظر بائع الفول وانتى تنتظرى قمرك وكل يبكى على ليلاه
شكرا لكم
سلام عليكم

keda-sponser said...

مقدرش أسكت ... أنا ولد .... أتكسفت و أنت بتكلميني بصيغه
المؤنث ....عموما ولا يهمك

سلاااااااااااام

أخوكم هيثم said...

يارب اجمعهم وأدم السعادة بينهم
أللهم لا تفرق قلوبا تحابت فيك لترضيك

3abratalsabeel said...

السلام عليكم
-------------
لست ادرى من انا
------------------
شكل اسمك يدى على اسم مدونة ...
اهلا بيك ..اخجلتم تواضعنا
انا كان معايا رصيد لسه بس صاحب الموبايل ما كانش بيرد
شكرا مرة تانية واتمنى تكون زائر دائم للمدونة
--------------------------------
keda_sponser
------------
انا اسفة والله
عطل فنى معلش
انا اتلخبطت لان فى بنت تانية اسمها انا كده
انا اسفة مرة تانية
---------------------------------
سلام عليكم

3abratalsabeel said...

سلام عليكم
-------------
هيثم
--------
اهلا وسهلا بيك
اللهم امين لينا وليك ان شاء الله
شكرا وجزاك الله خيرا

bota said...

السلام عليكم
بجد انا كنت هعيط وانا بقراها لاني بقراها وبسمع اغنيه كئيبه حبتين بالاضافه ان الدنيا الصبح بدري فممكن تخلي الواحد يعيط برضه بس الكلام اللي بين الاقواس خلاني مت على نفسي من الضحك شكرا انك وصلتيني للمرحله دي
وعلى فكره انتي بجد اسلوبك بسم الله ما شاء الله عليه تحفه بجد ربنا يكرمك والقمر ميتاخرش تاني

The Groom said...


صحيح انتم بتكتبوا وبتردوا على بعض وده بيسعدني جدا

لكن اللي بيسعدني أكتر تمسككم ببعض

ادعولي

وانا حدعيلكم ربنا يبارك لكما ويبارك عليكما ويجمع بينكما في خير

تحياتي لكما من ماناساس البلد

عابرة السبيل said...

سلام عليكم
---------
معلش يا جماعة اسفة على تاخير الرد
bota
-----
انا اتلخبطت يا بوتا ..قعدت اقول يعنى انتى عيطتى ولا ضحكتى بس تقريبا كده وصلنى انك ضحكتى فى الاخر الحمد لله
ربنا يخليكى ..اتمنى اشوفك فى المدونة على طول
يارب ما يتاخرش تانى بس هنعمل ايه فى زحمة المواصلات
--------------------------------
the groom
----------
اهلا بيك فى المدونة ...هندعيلك دايما ان شاء الله ..وربنا يجعل لك نصيب من دعائنا
تحياتى لك من القاهرة
سلام عليكم