27 October 2007

بعييييييييييييييييدا عن السياسه

بعييييييييدا عن السياسه
احنا مش هنتكلم فى سياسه ولا غيره
انا بس عايز اخد رائيكم فى عده امور بعيييييييييييده كل البعد عن السياسه
من محاكمات عسكريه لناس على الاقل مش ظاهر عنهم حاجه تشين ليهم ولا لاموالهم
من فصل طلاب من الجامعه بحجه انهم لهم اتجاه معارض للحكومه
من دخول بلطجيه على مسمع ومرأى من الامن وقياده الجامعات , على فكره انا شفت الكلام ده بعينى
من عمل اتحادات معينه من قبل اداره الكليات والاسم انتخابات اتحاد
من حبس للصحفين وتكميم الافواه



ورغم ده كله فيه ناس تانيه تستاهل فعلا تتحاكم وتعدم كمان امثال ......و.....و...... لا دول كتيييييير صعب عدهم فى بلدنا
والله انا فعلا بدات اياس رغم ان الياس ليس من شيم المسلمين بس فعلا الوضع الى احنا عليه صعب اوى

والله انا مره قرات تحقيق اتعمل مع طالب من ال بيتفصلو دول كانت التهم الموجهه له بالنص كده توزيع ما يحس الطلاب على عدم التبرج والاختلاط وحثهم على الصلاه فى المسجد والله ده حصل فى كليتنا الموقره فعلا دى كانت التهمه

بس برضه الواحد لازم يفتكر قول الله عز وجل " حتى إذا استيأس الرسل وظنوا أنهم قد كذبوا جاءهم نصرنا فنجي من نشاء ولا يرد بأسنا عن القوم المجرمين "
ياريت الى يقراء يعلق ويقولى يمكن انا الى شايف الدنيا سوده شويه

20 October 2007

مش مشكلة


اهلا اهلا اهلا
رمضان خلص اهو ..والعيد كمان خلص ...
واهلا بالدوشة والزحمة والشمس والخنقة
اهلا بالمحاضرات والمزكرات وكارفن
اهلا بالجامعة وشباب الجامعة وبنات الجامعة
ولبس الجامعة ...اللى يحرق الدم وينرفز ويضحك فى نفس الوقت
بزمتكم شوفتو حاجة زى كده؟

انا مش هتكلم فى اللى ما بفهمش فيه ...مش هتكلم على لبس الشباب انا بتكلم عن لبس البنات اللى ظهر بعد العيد
طيب بس حد يقولى هى دى الموضة السنادى بجد؟
يعنى هى الهدوم بتاعة البنات خلصت مش لاقيين غير اللبس ده؟

طيب بزمتكم برضه ده لبس ينفع بنت محجبة؟
ولا مش محجبة حتى؟
مش مشكلة .....

الجامعة بقت زى النادى

نخرج نتفسح فيها
نلعب شطرنج ...كوتشينة ...ناكل نشرب ..نفرش ملاية ونناااااااااااام .... مش مشكلة
بس بصراحة اكتر حاجة مضايقانى هى انى اطلع من المحاضرة دماغى هتنفجر من الكلام المجعلص اللى بناخده ده واطلع الاقى الطلبة برة
بتضحك وتهزر

بس مش مشكلة كله يمشى
...الامن طول ما هو موافق احنا لازم نوافق ..مش هو ادرى بالصح فى الجامعة
كله يمشى الا حاجة واحدة بس ....المظاهرات ...هى اللى لازم تتوقف بصراحة
لان لما بيكون فى مظاهرة ..احنا اللى بنتطلتع على باب الجامعة
والشمس تضرب فى دماغنا مش مشكلة
والمحاضرة تضيع ..مش مشكلة
لكن لازم يشوفوا كارنيهاتنا واحد واحد وواحدة وواحدة ...طبعا
عشان الامن والنظام يتم



لكن الادب والاحترام ........مش مشلكة بقى
هما هيربونا يعنى ؟
ما اللى عايز ينام ينام واللى عايز يشوف شغله ومحاضراته يشوف
واللى عايز يقعد يتفرج على الرايحة والجاية يقعد
واللى عايزين يقعدو اتنين اتنين ...براحتهم طبعا ...ما الشجر كتير ...والامن ذات نفسه قاعد بيشرب شاى وقهوة براحته برضه
مش بقولكم مش مشكلة

09 October 2007

العيد فرخة

كل سنة وانتم طيبين
العيد جه خلاص اهو
بصراحة ما قدرتش استنى ليوم العيد علشان انزل البوست الجديد
قلت الحق اكون اول واحدة تهنيكم بالعيد

العيد فرخة
..ايوة العيد فرخة مش فرحة
هو طبعا فرحة ..بس انا عايزاه السنادى يكون فرخة
كل سنة اقعد اقول لنفسى
اشمعنا فى العيد لازم ناكل رنجة وفسيخ
وبصل









وكل سنة اقول انا مش هاكل الاكل ده..رغم انى بحب الرنجة بس اقول انا هاكل الكحك بس ...ماله الكحك ..جميييييييييييييل ..






ما علينا ..اللهم انى صاااااااائم

اه وترمس
..صح ..ده العيد ما يبقاش عيد من غير الترمس




المهم انى كل سنة اكل رنجة وبصل وكحك
وماكلش الفرخة
بزمتكم مش شكلها حلو وتفتح النفس ...ياسلاااااااااااااااااااام






الناس معظمها بتقول انها بتطلع من رمضان زهقانة من الاكل الدسم
ماشى ..عندهم حق
يللا.... نتفق مع الناس فى حاجة ..مش وقت فلسفة ولا نصايح
ده وقت فرحة وعيد
بس برضه هاكل فرخة فى العيد ..ولو حتى تانى يوم ..


حد جاب صواريخ وبمب ؟ ايوة ..اللى بنزعج بيها الجيران وبنخضهم ...طيب حد جاب بلالين؟
نفسى فى مرة وانا كبيرة كده امشى ببالونة فى الشارع ..اشمعنى العيال يعنى ؟هما احسن منى ؟ولا هو العيد بتاع الصغيرين بس ؟









كل سنة وانتم بخير وربنا يبلغنا رمضان الجاى ويبلغنا ليلة القدر فيه

ما حدش ينسى ...اللى بيقيم ليلة العيد ولو بركعتين ليه ثواب كبير قوى عند ربنا
واول حاجة تفطروا عليها الصبح مش كحك ..اصبروا شوية ..افطروا على تمر

..سنة عن الرسول صلى الله عليه وسلم




يللا اسيبكم بقى تكملوا رمضان على خير ونتقابل ان شاء الله فى العيد
سلام عليكم