19 November 2007

اسرارنا فى درج المكتب المفتوح


لماذا يترك البعض منا اسراره فى ادراج المكتب المفتوحة ؟
وربما نتركها دون انتباه الى ان ان هناك اياد قد تمتد لتقراها او اعين تراها
او ربما ونحن نضعها فى مكاتبنا نكن مدركين بانها عرضة لان تكشف
ورغم ذلك لا نحرص على اغلاق الادراج جيدا


هل هذا بدافع رغبة خفية داخلنا بان يكتشف الاخرون اسرارنا ؟
ام هو عدم اهتمام بهذه الاسرار؟

ام هى ثقة زائدة بمن حولنا فى محيط حياتنا؟
ام اننا من يسىء اختيار ادراج المكتب ..فيضع اسراره فى ادراج لا توجد عليها اقفال ؟

لربما تركناها عن عمد فى الادراج المفتوحة ليكتشفها الاخرون ويعرفوا ما لا نستطيع البوح به لهم بطريقة مباشرة
ومن المحتمل ان هناك من يفعل ذلك حتى لايلفت الانتباه الى اسراره ..فهى ليست موجودة فى كانون الاسرار او الخزنة وانما هى موضوعة ضمن باقى الاوراق والملفات ...تفاديا لغريزة البشر فى ما يلخص بالمقولة الشهيرة :
الممنوع مرغوب

يمر على عينى الان مشهد فى فيلم اجنبى شاهدته فى الصيف الماضى عن لص كان يدخر امواله فى ادراج الثلاجة ..لاعتقاده بان الخزنة تجزب السارقين للمنازل
وفى النهاية اختفت ثلاجته من قبل سارق للاجهزة الكهربائية
وبالطبع سرقت معها الاموال

بعض منا ..وهم فئة قليلة تسعى بان تكون هى محور الاحاديث بيننا ..وفى سبيل ذلك قد تكشف عن بعض اسرارها عن عمد ولكن بطريقة غير مباشرة ربما تبدو لنا بانهم قالوها عن طريق الخطأ او زلة لسان
وهى بذلك تدفع العقول دفعا نحو استنتاج بقية الاسرار

وهناك فئة من البشر بيننا ايضا ..تكن معروفة للجميع بانها مثل الادراج المفتوحة او ربما المثقوبة
(ما بيتبلش فى بقها فولة)
وهى فئة ربما لسذاجتها يستخدمها البعض فى نشر معلومات غير صحيحة او استغلالها فى نشر الاخبار اذا ما ارادوا نشرها بسرعة البرق

وعلى النقيض تماما ..هناك اشخاص يتمتعون بالقدرة على حفظ الاسرار و كتمها ولا يملك احد ان ينتزعها منهم ابدا وعلى الرغم من ذلك ..لا يجدون من ياتمنهم على اسراره.....رغم انهم قد يعلنوها صراحة بانهم بئر للكتمان
ويكونو مدركين بانها كالموهبة التى يجدون فيها متعتهم
وهم فى ثقتهم هذه مثل سيدنا يوسف عليه السلام عندما قال لملك مصر فى سورة يوسف
:
بسم الله الرحمن الرحيم :
قال اجعلنى على خزائن الارض انى حفيظ عليم

ولكن هناك مقولات اخرى ضد ما اقول (شايفين الحياد والموضوعية )..فهناك حكمة تقول :
اذا ضاق صدرك بسرك فصدر غيرك به اضيق
وهى تحارب كل ما اقوله من بداية حديثى فهى مقولة خاطئة ولابد من نفيها خارج قاموس الحكم
(اوعى حد يصدق ..انا لسه ملتزمة بالحياد) وهناك مقولة اخرى تقول
السر لو خرج برة اتنين ما يبقاش سر

خلاصة القول
-------------
بان ادراج المكتب ليست هى السبب فى كتم الاسرار من افشائها
بل نحن من يكون له الاختيار من بين الادراج ومن بين الاشخاص
فطبيعة البشر هى البوح والكلام ولكن مع من نتحدث ومع من نكتم اسرارنا
وفى اى الادراج نضعها

هذه هى المشكلة
فى الدرج ولا برة الدرج
هذه ليست مشكلة
:)



10 comments:

عصفور المدينة said...

أحييكي على هذه التدوينة المتميزة

النوع اللي هو مشهور بافشاء الأسرار ده أنا باحبه جدا لأنه واضح ولا نتعامل معه إلا لما نكون عايزين نستخدم الخاصية دي في مصلحة ما

ماما said...

بصى ياستى انا مثلا بعمل كدا مخصوص مع ولادى ليه علشان هما غاليين عليا جدا بل واحب الناس الى قلبى فى الدنيا دى بس ساعات بيزعلونى قوى ااقوم اعمل ايه يصعب عليا نفسى انى اشكى ليهم وهما سبب حزنى اروح رايحه كاتبه كلمتين فى مزكراتى واخليهم يشوفونى وانا بكتب وهما عارفين انى لما بزعل بجرى افضفض مع نفسى بس وبكدا هما عارفين انى زعلانه واعمل مش اخده بالى وهما بيقروا الاسرار الحربيه بتاعتى وانا الكسبانه لانهم حبايبى ومايرضوش بزعلى وفى نفس الوقت ماعدش زعلانه منهم كتير لانى نفست عن غضبى ونسيت انا كنت زعلانه منهم ليه عرفتى ليه بنختار درج مفتوح لوضع اسرارنا


دى عموما وجهة نظر فرديه من وجهة واحده وخلاص بقى مالناش دعوه باسرار الناس

عابر سبيل said...

اولا السلام عليكم
ثانيا بجد انا من زمان لم اقراء كلام فى هذا الجمال ولا الحكمه بجد تدوينه رائعه بالضبط مثل تدوينه( الخوف من المجهول)اللى انتى عرفه عملت فيا ايه
اما عن فحوى الموضوع فعلا انا متفق معاكى فى الكلام
بس انا من النوع اللى لازم يكون فيه شخص على الاقل عارف عنى كل حاجه وده اللى خلانى اخطب بجد لانى حسيت انى محتاج حد احكيله عن حجات مش بعرف احكيها للى كان محل ثقتى لذالك قررت ان اجد لنفسى بديل بسرعه احكيله كل الى فى نفسى طبعا ده مش السبب الوحيد انى اخطب !!!

The Groom said...


:)

فالإنسان إما درج مفتوح أو مغلق

:)

تحياتي من ماناساس البلد

HoNdA said...

السلام عليكم
عجبتنى الفكرة اوى بتاعه البوست والموضوع جميل بردو واهم حاجة الخلاصة الى انت قولتيها وانا معاكى فيها ان دى طبيعه النفس البشرية
المهم مين نختار يفتح ادراجنا

safa7_karmooz said...

كله بيندرج تحت باب الفضول والشهرة

بس

alaa salim said...

السلام عليكم

أظن ان الأسرار نفسها ليها أقسام
يعني فيه أسرار الواحد بيحطها في الدرج المفتوح وأسرار الواحد بيعلقها على الحيطه
وأسرار الواحد بيكتبها في ورقه ويبلعها
ههههههههههههه

الطائر الحزين said...

الاهم
من نختار الشخص- والوقت للبوح بالاسرار

كيف نعرف وقت الامتناع وكيف نعرف وقت البوح

اللهم اجعلنا للسر حافظين


بارك الله فيك

عابرة السبيل said...

عصفور المدينة
------------
والله انا ساعات بحبه وساعات لا
شكرا على التحية
------------------------------
ماما
--------
والله دى فكرة حلوة قوى ...هبقى اجربها انا كمان ان شاء الله
ايوة صح ...مالناش دعوة بادراج ..قصدى باسرار الناس
-----------------------------------
عابر السبيل
-----------
ربنا يخليك ...بجد اخجلت تواضعنا الجم ..
شكرا على الثقة ..
----------------------------------
the groom
----------
والله خير الكلام ما قل ودل فعلا
-----------------------------------
Honda
--------
انتى فينك يا بنتى من بدرى
وحشتينى
-----------------------------------
سفاح كرمووز
------------
نزلت سهلا وحللت اهلا
---------------------------------
alaa salim
-----------
اعتقد اللى بنبلعها دى ورق البرشام بعد ما بنخرج من الامتحان ..صح؟
----------------------------------
الطائر الحزين
------------
وبارك الله فيك يا ايها الطائر الحزين
اتمنى تكون سعيد عن قريب
باذن الله

CresceNet said...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. If is possible add the CresceNet(www.provedorcrescenet.com) in your blogroll, I thank. Good bye friend.