16 December 2008

اخرج برة الدايرة

الموضوع ده مكتوب على ورق بقاله تقريبا سنة
ولسه مش عارفة اعرضه عليكم ولا لا

المهم انه موضوع مكلكع وكبير وانا مش فاضية بقى او مش فايقة
المهم ندخل فى الموضوع على طول

لما تكون عندك مشكلة ما تحصرش نفسك جواها
اخرج برة دايرتها
بص عليها كانك واحد غريب
وهتدى لنفسك نصيحة

لو انت مش راضى عن حياتك
اخرج براها ،كانك ماسك كاميرا وبتصور حياتك
شوف ايه الحلو فيها وايه الوحش
وبعدين حط نفسك مكان اول واحد يجى على بالك حتى ولو كان البواب
كنت تتمنى تكون انت هو وتعيش حياته ؟
ولا حياتك افضل

هو بصراحة انا حاولت اخرج برة الدايرة فى مشكلة حصلتلى قبل كده
لاقيت الموضوع صعب فى الاول ودماغى رافضة تكون حيادية
لكن حاولت وقدرت على الاقل افكر بهدوء واحاول الاقى حل

اقولكم
سيبكم من كل اللى قلته ده
اللى فهم كلامى فهم واللى الكلام مش واضح ليه مش مشكلة خالص

سلام عليكم

06 November 2008

انّى لى ان اكتب ؟

انى لى ان اكتب
او ان اخبرك شيئا قد توارى

انى لى ان اكتب او ان امسك قلما بعد اليوم؟
بعد ان تمزقت الاوراق ...وتكسرت الاقلام
لم يعد هناك ما يمكن كتابته او قوله

لم تعد الطرق تحمل مشاعرى
ولم تعد الاوراق تتحمل ثقل كلماتى
ولم تبق من حروفى سوا اشلاء
ولن يسمع احد سوى اصداء صوت


فأنّى لى ان اكتب
؟؟؟؟؟؟؟؟؟؟؟؟؟

29 September 2008

كلاكيت تانى مرة -العيد فرخة

كل سنة وانتم طيبين
والله وحشانى المدونة بكل ركن فيها وكل كلمة فيها
معلش ما عنديش وقت اكتب بوست جديد بس انا بقدملكم البوست ده تانى والله حلو صح ؟
صح
ادخلو على اللينك ده اظرف بكتير وبالصور للى بيحب الصور
كل سنة وانتم طيبين العيد جه خلاص اهوبصراحة ما قدرتش استنى ليوم العيد علشان انزل البوست الجديدقلت الحق اكون اول واحدة تهنيكم بالعيدالعيد فرخة..ايوة العيد فرخة مش فرحةهو طبعا فرحة ..بس انا عايزاه السنادى يكون فرخةكل سنة اقعد اقول لنفسىاشمعنا فى العيد لازم ناكل رنجة وفسيخوبصلوكل سنة اقول انا مش هاكل الاكل ده..رغم انى بحب الرنجة بس اقول انا هاكل الكحك بس ...ماله الكحك ..جميييييييييييييل ..
كل سنة اكل رنجة وبصل وكحك وماكلش الفرخة ... الناس معظمها بتقول انها بتطلع من رمضان زهقانة من الاكل الدسم ماشى ..عندهم حق يللا.... نتفق مع الناس فى حاجة ..مش وقت فلسفة ولا نصايح ده وقت فرحة وعيد بس برضه هاكل فرخة فى العيد ..ولو حتى تانى يوم ..
حد جاب صواريخ وبمب ؟ ايوة ..اللى بنزعج بيها الجيران وبنخضهم ...طيب حد جاب بلالين؟نفسى فى مرة وانا كبيرة كده امشى ببالونة فى الشارع ..اشمعنى العيال يعنى ؟هما احسن منى ؟ولا هو العيد بتاع الصغيرين بس ؟كل سنة وانتم بخير وربنا يبلغنا رمضان الجاى ويبلغنا ليلة القدر فيه ما حدش ينسى ...اللى بيقيم ليلة العيد ولو بركعتين ليه ثواب كبير قوى عند ربنا واول حاجة تفطروا عليها الصبح مش كحك ..اصبروا شوية ..افطروا على تمر..سنة عن الرسول صلى الله عليه وسلميللا اسيبكم بقى تكملوا رمضان على خير
ونتقابل ان شاء الله فى العيد
سلام عليكم

27 June 2008

الحمد لله


تم بحمد الله عقد قران
المدونة عابرة السبيل على المدون عابر السبيل
وذلك فى يوم الثلاثاء الماضى بحضور الاقارب والمأذون طبعا



وسمعونى اغنية :
وما تحسبوش يا بنات ان الجواز راحة
وما تزعلوش يا بنات ان قلنا بصراحة
ان الجواز عمره عمره ما كان راحة



والعروسة للعريس والكل بيجرى على لقمة العيش
ادعولنا ربنا يتمم لنا على خير وتكمل فرحتنا
بس خلاص

عقبال عندك يا ام حسييييييييييييييييييين
ملحوظة صغيورة:البوست اللى فات اعتبروه مش موجود ...ايام وعدت الحمد لله

22 June 2008

مخنووووووووووووووووووووووووقة

من كل حاجة
ومن كل الناس

مخنووووووووووووقة

لما تبقى على اخرك والمفروض تراعى اللى حواليك وتحاول ما تبينش تعبك وتفضل تحاول
وبعدين على حاجة هايفة الناس تعاتبك وتلومك وما يعجبهاش اى حاجة بتعملها ،وتنسى كل اللى بتعمله
لازم تتخنق

لما تبقى نفسك تفرح ...نفسك تحس ان اللى حواليك مبسوطين علشانك ،وتلاقيهم بيعملوا الحاجة كانها واجب عليهم وخلاص
لازم تتخنق

لما ما حدش يفهمك،ولما تحس ان حبايبك وناسك مش فاضينلك فى عز ما انت عايزهم حتى معاك معنويا
لازم تتخنق

لما تكون بتحاول تعمل كل اللى عليك ،وتعبان ومتضايق ،وكلمة قلتها غصب عنك ما تقصدش بيها حاجة تقوم الدنيا بسببها
لازم تتخنق

لازم تتخنق ،وتفكر تنتحر وتخلص من حياتك دى لانك بتحس ساعتها انك تاعب اللى حواليك ،وحمل زايد عليهم
وفى نفس الوقت مش عايز تزعل حد منك وفى نفس الوقت عايزهم يشاركوك فى كل حاجة

يبقى لازم تتخنق

اهو انا بقى مخنوووووووووووقة
ومخنوقة منكم انتو كمان ،ومش عايزة حد يعلق على كلامى
ولو اعرف ازاى اقفل التعليقات هقفلها

تحديث
فتحت التعليقات تانى
يمكن حد يحب يخلص عليا ...فيقول كلمتين يخنقوقنى زيادة
اتفضلوا

20 June 2008

شخبط شخابيط



عادى بقى
خلصنا امتحانات
ولا مزاكرة ولا وجع دماغ

مش لاقية حاجة اكتبها كان كل الافكار اللى فى دماغى خلصت

هو ده البوست الجديد
لسه مناقشة مشروع التخرج الاسبوع الجاى

مش عارفة مين اللى هيناقشنى وهتبقى هيصه
قريت فى المشروع شوية وحاسة انه حاجة ملخبطة كده ولا ليها اى لازمة مع ان كل اللى حواليا بيقولوا حلو ...لكن حاسة انه سلق بيض ومش هعرف اقول حاجة فى المناقشة

علشان ما اطولش عليكم
دانا قلت اكتب اى حاجة جديدة كده تغير شكل المدونة اللى ما بيتغيرش ده

هو انا عاملة المدونة دى اصلا ليه ؟
علشان اتكلم فيها
طيب هو الكلام راح فين؟
اتبخر ...بالمعنى الحرفى للكلمة

حاسة ان المدونة مابقاش ليها طعم كده
عايزة اعمل نيولوك ...بس هى عاجبانى كده
اخضر فى اخضر

هشقلبها
هلخبطها


واعمل زى الاغنية بقى
شخبط ولخبط على اللى فات وابدا وظبط من جديد

اسيبكم بقى علشان التفانين
سلااااااااااااااااام

12 June 2008

كل قدر الله جميل

عارفة انكم داخلين فاكرين بقى هتلاقوا حاجة ممتعة
خلصنا الامتحانات وافراج الحمد لله

لكن لان الحياة هى اللى بتمشينا
البوست جه النهاردة غير اللى توقعت انى اكتبه ،وغير اللى قعدت افكر فيه كتير واحلم بيه بقالى 24 ساعة

فيلسوفى العظيم اول كلمة سمعتها منه ودخلت دماغى هى :
كل قدر الله جميل

كلمة جميلة قوى ،تخلى الواحد يرضى بقضاء الله وقدره مهما كان ومهما حصل

النهاردة حصلت حاجة غيرت مجرى اليوم تماما ،وثبتت الكلمة دى فى دماغى اكتر،من يومين كنت بحلم باخر يوم امتحانات ،وبخططله هيكون عامل ازاى ،وبعدين ما نفعش التخطيط ده،وبدل ما كنت ناوية اخرج مع صحابى ونقضى اليوم كله بره ،ما نفعش ،وكنت زعلانة قوى ...زعلانة لانى سبتهم فجأة كده ومشيت وهما بيتحايلوا عليا استنى شوية ،

بس قلت كفاية انى هقضى اليوم مع اسرتى ،هو حد ليه غير اسرته برضه ،وسبحان الله ،يشاء ربنا انى اروح علشان الحق اقعد شوية معاهم قبل ما يجى خبر وفاة ابن اخت عابر السبيل

انا لله وانا اليه راجعون
طبعا ما يتوصفش الحزن والزعل
ابن اخت عابر السبيل كان لسه طفل عمره ما يكملش الاربع سنين ،طفل بريء جدا،هادى خالص ،ومامته فى غاية الطيبة
ولكن هو كده ربنا ما بيبتليش غير اللى بيحبهم

كل قدر الله جميل
،طبعا لا شك فى كده ،واول ما عرفت الخبر جه فى دماغى على طول الاية اللى فى سورة الكهف اللى هى :
بسم الله الرحمن الرحيم :
(فاردنا ان يُبدلهما ربهما خيرا منه زكوة واقرب رُحما)81
اكيد ربنا عمل كده لحكمة عنده ،واكيد ان ده الخير لامه ولابوه
ربنا يصبرها ويرضيهاويعوضها خير عن ابنها


ربنا ما بيعملش فى حد حاجة وحشة
كنت وانا صغيرة لما ابقى عايزة اروح رحلة مثلا وما ينفعش اطلعها لان ورايا امتحان او انا اللى تعبت وما رحتش،كنت ببقى زعلانة قوى ،لكن ماما كانت تقولى:ماتعرفيش الخير فين ربنا اكيد مش عايز يزعلك ،ربنا ما بعملش فى حد حاجة وحشة، وفعلا كنت اروح تانى يوم المدرسة الاقى البنات بتشتكى من ان الرحلة كانت وحشة او الجو ما كانش حلو اوحصلت مشكلة

كل حياتنا كده ،ربنا بيقدرلنا الخير
المهم احنا اللى نرضى بيه

معلش اذا كان البوست ملخبط ،لكن هو بيعكس اللخبطة اللى جوايا،كان نفسى يكون البوست مختلف النهاردة لكن :
كل قدر الله جميل


13 May 2008

اهداء لكل سنة رابعة....مشروع التخرج

يا لذيذ يا رايق
لسه بااااااااااااااااااااااااااادرى

الله ؟ ايه ده ؟هو البحث بيكبر كده ليه؟

ايه ؟امتى؟ اول خمسة ؟ازااااااااااااااااااااااااااااااااااااااااااااااااى ؟


الوقت مش مقضى ،مش كفاية، حراااااااام

فين عُلا ؟ فين اللى هيسهر الليالى؟.لازم اخلص النهاردة ..............خخخخخخخخخخخخ

البحث ده صعب قوى ،اعمل ايه ...اعمل ايه ؟

لاااااااااااااااااااااااااااااااااااااااااا ....كل اللى اتكتب راااااااااااااااااااااح

انا هموت نفسى .....،الله يخرب بيت اللى كان السبب ....مش عاملة حاجة تانى مش مقدمة البحث خالص



انا هكسرك ،هولع فيك ،انت كمبيوتر تستاهل الحرق ،انا لازم ادمرك زى ما دمرت مستقبلى


الامر لله ،خلينا نخلص ،ال يعنى حد هيقرا حاجة


واخيراااااااااااااااااااااااااااااااااااااااا

16 April 2008

اسف ....مش هتقدر تجرح كرامتى

اسف ....مش هتقدر تجرح كرامتى
















الغريب ان يكون اللى قدامنا ...اللى بنتعامل معاه هو اللى ما يحافظش على كرامتنا
ساعات الواحد ممكن يقعد يجيب للناس اعذار ....واحد وسبعين عذر عملا بحديث الرسول صلى الله عليه وسلم
ويفضل يتحمل ...ويصبر ..ويقول لا الناس بتهزر ..لا يمكن مش قصدها ...اكيد هو يقصد حاجة تانية ...مش معقول تكون عارفة ان ده هيجرحنى وتقول كده ...لغاية ما الواحد يوصل للمرحلة اللى يقول فيها :
لاااااااااا
ااااااااااااااا كفاية كده
thats it
ما ينفعش اسيبهم يتعاملوا معايا بالطريقة دى


كنت دايما بسمع مقولة كده بتقول:
حب نفسك علشان تقدر تحب الناس
...رغم انها مقولة غريبة شوية ورغم انى ما كنتش بفهمها على بعضها كده ... لكن فهمتها اخيرا ما ينفعش حد يكون مش عارف قيمة نفسه ويحب اللى حواليه ..هيقعد يقول الناس دى بتحبنى ليه ؟ ولو غلطوا فيه هيقول طيب هعملهم ايه ...ويبدا يكلكع ويتعقد ويكره الناس...ويسيبهم والاصل ان هو اللى غلطان .......لان لو هو واثق من نفسه مش هيخلى اى حد يغلط فيه ...ولا يجرح كرامته ...هيحب نفسه ويقدر حب الناس ليه ...ويعرف يتعامل مع كل واحد على الاساس الصح.... فى واحد قال مثل غريب كده سمعته على الاذاعة الشهيرة اللى كل ما اسمعها اقرر انى ما اسمعهاش تانى وهى نجوم اف ام
المثل قال ايه :
حب البنت تلبك ...لب البنت تحبك يعنى من الاخر بهدلها هتحبك
...ايه العبط ده!!!!!!!!! اكيد اللى بيتعامل بالمثل ده انسان لا يفقه شىء فى الدنيا ...لان ابسط حاجة معروفة عن المراة اهم حاجة عندها كرامتها ...اذا اتهانت كرامتها بتهون عندها كل حاجة ...ممكن تبيع اى حد واى حاجة الا كرامتها
دى المراة السوية ...اللى عارفة قيمة نفسها ...

بجد حاجة بتستفزنى قوى فى الشارع ...ان الراجل يكون ماشى مع مراته ..ويقعد يبص يمين وشمال على اللى رايحة واللى جاية ...وممكن تكون مراته حلوة وامورة وكل حاجة ...لكن هو يعمل كده .... مش عارفة ليه مراته بتسكت على حاجة زى دى ...رغم ان ده اكيد بيجرح كرامتها ...ليه ما توقفوش عند حده وتقوله ما تحترم نفسك ..هو انا مش مالية عينك ؟....ما تخلى فى عينك حصوة ملح وتحترم انى ماشية معاك بصراحة انا ببقى عايزة اقوله كده ...واقولها انتى ازاى قابله انه يهين كرامتك كده ...بس بقول وانا مالى اخرب عليهم ليه
لان اكيد هى لو هتهتم بكرامتها ...مش هتقبل تكمل معاه حياتها بالطريقة دى

اكيد ان الخيانة هى اكبر جرح للكرامة .....ودى شرحها يطول ...
يجى بعد الخيانة ...احساس الواحد ان الانسان اللى بيحبه قلبه مش كله ليه .....بتتجرح كرامة الانسان لما يحس ان الشخص اللى بيحبه بيفكر فى حد غيره ..او بيقارن بين اللى بيحبه وحد تانى ...ملاحظين انى بقول ان الاتنين بيحبوا بعض ؟...طيب تيجى ازاى ان واحد فيهم يكون قلبه مشغول بحد تانى ..او بيفكر فى حبه القديم .....هو ما اجرمش لحد كده ...لكن ده دليل على ان حبه للطرف لتانى ده مش كافى انه يملا قلبه ..ومن القلب للقلب رسول... ازاى الواحد او الواحدة يفضل يحب انسان لسه متمسك بماضيه ...لسه فاكره ...بيقارن بين حبه الجديد والقديم
ما ينفعش

طول عمرى بكره انى اعايب على حد ...او اتريق على حد حتى لو بالهزار ....بعتبر ان اللى بيعمل كده ده ...مش بيتريق على اللى قدامه قد ما هو بيعترض على خلق الله ...بعتبرها جرح لكرامة الانسان ...ذنبه ايه اللى ربنا خلقه مش جميل ..او قصير ..او اسمر قوى ...اوتخين ...او رفيع ..او او او ..هل فى ايد الانسان انه يغير شكله؟؟...طبعا لا ...يبقى ليه الناس تتريق على بعضها ؟...
ممكن الواحد لانه واثق من نفسه يسيب الناس تتريق وتهزر عليه ويقول مش مهم ..مش فاهمين حاجة مساكين ...لكن لما يزيد الامر للتجريح يبقى الامر مختلف
يعنى مثلا بنتين طلعوا المترو النهاردة وواحدة منهم هاتك يا تريقة على صاحبتها ...حقيقى انا اضايقت ...يعنى هى شايفة كل العيوب دى فى صاحبتها ....... طيب مصحباها ليه ؟وبعدين البنت مافيهاش حاجة فعلا ..معرفش سكتت عليها ليه ..ما تقولها ما تبصى لنفسك انتى اللى ملكة جمال الكون يعنى !!!!!!!!

لازم كل واحد فينا يفهم ان زى ما هو ما بيقبلش ان حد يجرح كرامته هو كمان لازم يحترم كرامة الاخرين ...نفكر قبل ما نتكلم ...هل اللى هنقوله ده هيزعل اللى قدامى ولا لا ...هيضايقه ولا اهزر عادى ...حتى الهزار لازم يكون بعيد عن جرح الكرامة
ما حدش يسمح لاى شخص انه يجرح كرامته او يقلل من شانه
والا مايلومش الا نفسه بعد كده

اسف ...مش هتقدر تجرح كرامتى
دى حملتى الجديدة بعد حملة مقاطعة النسكافيه اللى نشرتها السنة اللى فاتت وما حدش عمل بيها برضه
مش هحط اللينك بتاعها واللى عايز يدور عليها يروح يشوف الارشيف

بس خلاص
سلام عليكم








09 April 2008

الهموووووووم














ليه بنكون مهمومين؟
يعنى ليه بنشيل الهم

رغم اننا مؤمنين وعرفين ان كل شى بامر الله
بس برضه بنشيل الهم ؟
وهل كل الناس كده برضه بتشيل الهم مع اختلاف الهموم يعنى ؟

الماجستير عايز يخلص السفر اتاخر الشقه لازم تتوضب العفش لابد يخلص اوعا تنسى السكاشن الى وراك لازم تتصل بابوك وامك ولو متصلتش !!!!! نهيك بقه عن فلان اتجوز لازم تبركله وعلان عنده حاله وفاه لازم تعزيه وصحبك عنده حاله اكتئاب لازم تخلصو منها



ده مثال لواحد من الى بيشيلو الهم ؟
بس اكتر حاجه بتخفف الهموم دى انك تلاقى ناس حاسه بيك وبتعزرك وعلى النقيض انك تلاقى ناس مش كده ده بيزود الهموم اكتر واكتر


الى انا عايز اوصله هل هى دى الحياه ولا احنا الى فهمنها غلط ؟؟؟؟؟؟
هل الصحابه كانو كده ؟ولا احنا الى مدين الدنيا اكبر من حجمها ؟؟؟

03 April 2008

اضراب 6 ابريل




مش هنتكلم كتير
لان مش اهدافى انى اتكلم فى السياسة هنا
ولان اللى احنا فيه ده مش سياسة ده اقتصاد نتكلم
ومش هقول غير ان فى اضراب يا جماعة هيتعمل يوم 6 ابريل

ابسط حاجة علشان تعرفوا ايه الاضراب ....ده لو فعلا ما كانش حد لسه سمع حاجة عنه يبقى احسن حاجة ادخل على جوجل حالا واكتب كلمة :
اضراب 6 ابريل
هتلاقى كذا موقع وكذا جهة كاتبة عن الاضراب ده

الغريبة ان الناس رغم انها مطحونة على الاخر من الاسعار اللى كل يوم بتغلى عن اللى قبله ورغم العيش اللى مش عارفين ناكله واحنا مرتاحين
ورغم كل حاجة متعبة بتحصل ...فى ناس كتير انا متاكده انها مش هتضرب اليوم ده وهيمشى يومهم عادى خالص ...ومش معزورين ولا اليوم ده هيفرق فى رزقهم ولا اى حاجة غير انهم بيقولوا مافيش فايدة ....اضراب ايه وابتاع ايه .....برضه قاعدين ومش هيحصل حاجة








هو يا جماعة يوم هيفرق فى حياتكم قوى كده لو غبتم عن شغلكم ...لو ما روحتوش مدارسكم ...لو ما نزلتوش تشتروا حاجة من السوق ولا حتى المحل اللى جنبكم

فين همة المصريين ؟ولا خلاص قضوا عليها ؟
يا جماعة ده مجرد اضراب سلمى للغاية ...لا فيه مظارهات ولا حاجة
ده تكملة لمسيرة الاضراب اللى حصل الاسبوع اللى فات واللى اتقال عليهفى التليفزيون
مافيش اضراب ولا حاجة
النهاردة بالصور لاقيت ان الاضراب حصل فعلا
والحمد لله فى صور من كليتنا الحبيبة

بنطالب فيه بس انهم يرحمونا يحسنوا التعليم ويخفضوا الاسعار شوية
رغم ان المشكلة كبيرة لان داخل فيها سياسة الحكومة فى الحرية الاقتصادية واحرية السوق ...يعنى لازم الدعم يتلغى ...لكن ممكن نقول ببساطة :
الليبرالية اللاقتصادية وحرية السوق لازم يكون جنبها تكافؤ فرص ونزاهة .....مش كوسة ورشوة وفساد ادارى وحكومى
علشان كده احنا فى ازمة
ما حدش هيخرجنا منها غير احنا ...لانهم هما غرقانين كافيار وعيش فينو وجمبرى ...مش حاسين باللى احنا فيه
طيب ما تخلونا نجرب





يا جماعة والله ده مجرد اضراب سلمى ...يعنى تقعد فى بيتك ما تخرجش ولا تنزل تشترى حاجة ولا تعمل اى حاجة خالص ...كانك تعبان يعنى ...عندك برد ومش قادر تتحرك ...ما صادفش انك ما رحتش شغلك فى يوم كان مهم جدا ؟

انا ما رضتش حتى احط صور وشعارات تانية تدل على العنف ...لان الاضراب فعلا لطيف خالص ...وكفاية اننا هنقعد فى البيت ...




يا جماعة هيبقى شكلنا وحش قوى لو ما اضربناش اليوم ده والمصريين فى لندن هيتضامنوا معانا وهيروحوا يقفوا قدام السفارة تعبيرا عن مشاركتهم



حتى لما نكون بنقول نضرب علشان الحكومة تعرف اننا لسه عايشين وبنطالب بحقوقنا ولو بشكل سلبى ...يبقى كمان مش قادرين نعمل كده؟

يبقى اخر حاجة هتتقال :
يا حسرة علينا

10 March 2008

عيد ميلاد سعيد يا سوسو







مش عارفة اكتب من الفرحة
مش مصدقة بجد ان فاتت سنة على حاجة مهمة قوى بالنسبالى
يعنى مش قادرة اعبر لاول مرة عن فر
حتى
وكمان مش قادرة اوصف قد ايه انا مبسوطة بالمناسبة دى اللى كنت
بشك انها هتعدى عليا
من سنة واحدة فى نفس المكان فى نفس الكرسى
اللى انا قاعدة عليه ده
من سنة واحدة فى نفس الساعة فى نفس اليوم
من سنة واحدة ...يوم11مارس 2007كنت فى حالة تانية خالص
مليانة حماس ونشاط وخوف وقلق وحاسة انى مالكة الدنيا دى كلها فى ايدى
يوم 11مارس2007كان ولازال يوم مهم جدا
اليوم ده عيد ميلاد مدونتى دى
مدونتى حبيبتى ....مدونة صوت عالى
كل سنة وانتى طيبة يا سوسو..يا صوت عالى يا جميلة ..يا سكر انتى


سوسواللى عاشت معايا ايام حلوة وايام حزينة وايام زى العسل
وبعد ربنا سبحانه وتعالى كانت المدونة دى ليها دور مهم قوى فى تغيير حياتى للاحسن الحمد لله
كمان شهر مارس بالنسبالى شهر مهم
شهر مارس فيه عيد الام كل سنة وانتم طيبين

فيه عيد ميلاد ناس بحبها قوى كل سنة وهما طيبين





وفيها اتعرفت على ناس كتير ...كان اهمهم...نفسى
ايوة انا اتعرفت على نفسى بجد فى المدونة دى فى شهر مارس ده
عرفتها كويس قوى وقدرت افهمها واتعامل معاها
فى المدونة دى كتبت كل اللى نفسى اقوله ....م
ش كله قوى يعنى ...كتبت فيها عن نفسى وواجهت فيها روحى .....
.....غيرت فيا حاجات كتير...وغيرت فيها حاجات كتير


كان اهمها انى حطيت اتنين شات بوكس


صحيح مضايقين ناس كتير بس انا بحب اكتب وارغى براحتى واتكلم من القلب براحتى
وحطيت فيها اللعبة اللى انا مش عارفة لغاية دلوقتى اكسب فيها مرة
واحدة








طبعا عدى على المدونة دى ناس كتير ....ناس جت و
مشيت وناس

لسه موجودة وناس اختفت خالص
بس اهم حاجة انها فيها حياتى...وكلامى ...ومواهبى المدفونة اللى لسه ما ظهرتش
طبعا لسه ما ظهرتش
ده انا حتى عندى كلام كتير لسه عايزة اقوله .
..بخصوص طابورالعيش
اصل طابور العيش ده بنشوف فيه البدع
طابور عيش ايه؟ده وقت طابور عيش ؟خلينا فى اللى احنا فيه





طبعا عشتوا معايا مناسبات كتير
فى السنة دى الانتخابات وتعديل الدستور وطبعا كان اهمها واجملها
خطوبة عابرى السبيل

!!!!!!!!!!!!!!!!!!!!!!مين عابرى
السبيل دول؟



ولسه قاعدين بتقروا المدونة لاول مرة ...حرام عليكم
اتكلم انت يا عابر السبيل
قولهم انت ...قولهم انت لحسن انا خلاص قربت اعيط من الانبساط والفرحة بمدونتى المشهورة .....المشهورة جدااااااااااااااا



سبحان الله

فعلا شهر مارس ده اتولد فيه ناس عظام قوى اولهم انا

طبعا فيه ناس عظام وفيه ناس باطنة وناس جلديه وباقى اقسام كليه الطب !!


وفيه ناس علوم سياسية ...عادى يعنى
.......ما علينا ..فعلا انا اتولدت مرتين فى الشهر ده ايوه ايه الغريب فى كده....


ما غريب الا الشيطان ...كمّل

مره 20-3-1982 وده كان من بطوله ماما
والله عملت عمل جبار ماما ربنا يخليهالنا...وهى يعنى امى ما عملتش عمل جبار؟ ..ماهى اللى شجعتنى اعمل المدونة دى ربنا يخليهالنا هى كمان ...

اما الثانى برضه كان فى نفس الشهر بس بعدها بخمسه وعشرين سنه

لما اتعرفت على .....من وصفها الرسول صلى الله عليه وسلم خير متاع الدنيا

وهى زوجتى ان شاء الله

عابرة السبيل
ربنا يسمع منك يا اخويا ...


المهم
سبحان الله...شهر فعلا يستحق انه يكون شهر الميلاد بالنسبالى

اكتر حاجه بتمناها دلوقتى فعلا ان الله عز وجل يحينى الى ان اعيش فى مصر فى ظل رئيس اخر مش من العيله المباركه


معلش معلش ...هى الدنيا كده ما بتديش للواحد كل حاجة...ده انا ؟...خلاص خلاص مش هقاطعك تانى

..الصبر يارب ...اصلى يا جماعه من يوم ما جيت على الدنيا وهو ريس واحد بسسسسسسسسسسسس

وخايف اموت فى ظل نفس الريس

دى اسما امانينا بعد الموت فى سبيل الله طبعا


ربنا يديك ويدينا طولة العمر ..ما حدش عارف ....ربنا قادر على كل شىء...هو انا كده قاطعتك برضه ..
طيب استنى يا عابر ..استنى بس ..رايح فين ؟
...



هذا وقد اعلنت وكالات الانباء عن اختفاء عابرى السبيل وذلك فى ظروف غامضة
وتشير التحقيقات انه تقرر ان تاخذ عابرة السبيل استراحة قصيرة لفترة ما لحين الانتهاء من بعض الابحاث..ولحين ظهور النتيجة ...والى ان يعود عابر السبيل ....حيث انه خرج ولم يعد..
دمتم فى رعاية الله وامنه ...
تحيا جمهورية مصر العربية ...

والسلام عليكم ورحمة الله وبركاته





شششششششششششششششششششششششششششششش

20 February 2008

مجرد خواطر:ما حدش هنا


بناء على رغبة الجماهير :كلاكيت تانى مرة
ههههههه حلوة الكلمة دى
نفسى اقولها كده على اى بوست عندى
المهم :
بناء على طلب الجماهير اللى مش عارفين ايه علاقة البوست ده بيا
البوست ده مجرد خواطر

مالوش علاقة بيا خااااااااااااااااااااااااالص
وطبعا المعنى فى بطن الشاعر
اتفضلوا بالهنا والشفا
---------------------------------------------
ما حدش هنا
-----------------
النهاردة لوحده هنا
وسط الصحاب والحبايب

حاسس ان روحه شريدة
مش لاقي مرسى لسفينته الوحيدة

قلبه ينادى على اللى كانوامعاه هنا
عايز يشكى ويحكى وحد يسمعله الندا

عايز يلاقى زهن صافى
وقلب وافى وحضن دافى

لوحده هنا وسط الوشوش والابتسامة
لوحده هنا معكوس على وشه الملامة

قال كتير اسمعونى وافهموا
لكن فى زمنا ده
يظهر الضعف على انه ذلة وندامة

قلب قال بحب ..بنية صافية
وعقل ..مليان بافكار وعافية

فجأة حس انه وحيد
وان الشمس نار بتحرق من بعيد
والقمر دخان من دوبان جليد

لولا غروره وكبرياء بيه اتولد
ولولا الرجاء ..والامل
كانت مياه البحر هى دموع الولد


16 February 2008

الحمد لله

الحمد لله الحمد لله الحمد لله
بجد فعلا الحمد لله
انا كنت اول انبارح فى جامعه القاهره ولقيت الناس كلها لبسه احمر
او شيله حجات حمره او دهنه على وشها نص كيلو بوهيا برضه حمره
انا قلت يواد انت متابع كوره بس اكيد انت معرفتش ان الاهلى هيلعب فى الجامعه النهرده ؟؟؟؟
حبيت اسال هو فيه ايه هل كل الناس دى فرحانه بابو تريكه ؟ .........امال فيه ايه ؟
المهم سالت الى كان معايه سعتها هو فيه ايه ؟ طبعا هو بصلى باستغراب وقلى انت متعرفش ؟؟؟
قلت يبقه ده اكيد يوم الاحمرار العالمى او مثلا شركه يوتين بتحتفل بعيد ميلاد اللون الاحمر ؟
المهم طلع اييييييييييييييييييييه ؟
عيد الحب !!!!!
جه فى بالى سعتها اغنيه الاستاذ عبد الحميد حافظ
حب ايه الى انتا جى تقول عليه انت عارف فبلا معنا الحب ايه
طبعا انا استنتجت سعتها على طول معنى الحب هو اللون الاحمر
بجد انا فضلت اقول حسبي الله ونعم الوكيل
على الطلبه والطالبات
بجد الموضوع بقى حاجه وحشه اوى
احنا كنا طلبه ومش من زمان اوى بس مكناش بالهيافه دى
الطلبه تحس انهم ريحين الجامعه مخصوص عشان يتعلمو الهيافه
عيد حب ايه ؟؟؟؟ هو الحب يعنى فى اليوم ده بس
فعلا الحمد لله
انا قلت الحمد لله كتير اوى اليوم ده على انه رزقنى الفهم على الاقل مكنتش هايف وانا فى الجامعه
والله فعلا حسبي الله ونعم الوكيل على كل الى ساعد فى ان الطلبه تكون كده

13 February 2008

وبعديييييييييييييييييين ؟

وبعدين فى الدنيا اللى بتعاند دى؟
نجيبها يمين نجيبها شمال ما بتعملش اللى على مزاجنا
عارفة كلامى مش هيعجب ناس كتير
هيقولولى ارضى بامر الله وتوكلى على الله وسلمى امرك لله
ونعم بالله يا جماعة انا ماقلتش حاجة
بس يعنى لو شوية راحة ..لو شوية هدوء ..شوية اطمئنان ..
مش كل ما الواحد يجى يطمن يلاقى حاجات بتحصل حواليه ..يحس ان الدنيا مافيهاش امان
وبعدييييييييييييييييييييييييييييين؟
عارفة ان الدنيا من غير ابتلاء ما تبقاش دنيا
بس الحمد لله فى النهاية
كل شىء بامر الله
وربنا يقدر للجميع الخير

28 January 2008

الاختلاف يفسد للود قضية

بما ان عابر لسه ما حلمش الحلم التانى
قلت ادخلكم انا بكابوس فى النص

الاختلاف يفسد للود قضية
اه والله
وبيفسد بيفسد فعلا
سواء اختلاف فى الراى او العقيدة او الدين او حتى اسلوب الحياة
ابسط مثال ..الجدل اللى كان داير على جروب الكلية بتاعتى ..بحث اتعمل من طالبة وكان بحث متميز اتقرر علينا دراسته ومزاكرته لانه جاى فى الامتحان (قال يعنى احنا ناقصين )الجدل ده كان حول عدم رجوع البنت دى للمصادر الاصلية للبحث
بغض النظر عن التفاصيل
الموضوع اتقلب من كونه نقاش علمى الى دفاع عن البنت اللى عملت البحث، الود لو ما كانش فسد فهو على اقل تقدير حمض

الاختلاف يفسد للود قضية ..
روح كده قول لصاحبك انت غلطت فى كذا ...هتلاقيه بصلك من فوق لتحت وسابلك الشارع كله مش البيت بس

جرب تانى تدخل فى نقاش علمى عن بحث هتعمله مع زمايلك .. هتلاقيهم كل واحد عايز رايه هو اللى يمشى ..وهتندم انك عملت بحث معاهم(الحمد لله انا جنبت نفسى الحكاية دى السنادى وكنت مع جروب زى العسل )وهتتجنب انك تشارك تانى معاهم فى بحث او اى عمل جماعى

معلش جرب كمان مرة تدخل فى نقاش مع اى حد فى اى حتة فى اى بلد فى الدنيا ..عن حاجة انتو الاتنين مختلفين فيها ..وظهر الاختلاف ده ...النقاش كانى هادى جدا ومحترم ..وكل واحد له رايه ..لو هو مش مقتنع برايك ..ولا عرف يقنعك ،هتحس انك عايز تنهى النقاش وخلاص ..اصله ما فيش فايده فيه ...


اذا الاختلاف يفسد للود قضية
دى نظريتى الجديدة ..مش لازم الاختلاف يبقى معناه اننا هنتخانق ونضرب بعض ومش لازم يكون الاختلاف فى الراى نهايته الخصام او الزعل ..بس بتكون نهايته نوع من تجنب المناقشة ...او الزهق من الطرف التانى ده ولو لساعة ..ربع ساعة ..دقيقة
حسب الموقف المختلف عليه

فما حدش يجى يقولى بقى الاختلاف لا يفسد للود قضية ...لا،يفسد بس على حسب احنا مستعدين ومتقبلين اد ايه الطرف التانى المختلف معانا فى الراى وعلى حسب اهمية القضية ...

انا ما بقولش ان ده صح ..انا بوصف الواقع اللى بيحصل ....انا كما بحاول استخدم عبارة الاختلاف لا يفسد للود قضية تجنبا لمجادلات او خناقة على وشك الحدوث ..لكن بيفضل جوايا لبعض الوقت كلام زى:
طيب ليه انا ما يتسمعش كلامى ؟
ليه ما يتاخدش برايى ؟
هو انا مش زيهم يعنى ؟
او مثلا :
هما اكيد غلطانين وبكرة يعرفوا انى انا اللى صح
او :هما حرين انا عملت اللى عليا

وهكذا ...
عرفتوا بقى انا بقول ليه الاختلاف فى الراى يفسد للود قضية

حد عنده راى مخالف لرايى علشان يقوله ؟
انا مستنية ..ها ؟ ..ما تتكلموا ...خايفين ليه ؟
انا سامعاكوا اهو ....

سلام عليكم

14 January 2008

سبت نفسى مره تحلم -عابر سبيل


سبت نفسى مره تحلم
المهم
حلمت انى بقيت كبيييييييييييييييير
والمهم كمان وزير
والاهم وزير كبير

قمت داخل على اللى تحتى من كبيرهم حتى الغفير
شلت ده .. وعينت ده
ابن خالتى من غفير يمسك مدير
والواد حميده ايوه جارنا عملت منه قائد مرور
والواد صميده ابن احمد
اديته منصب كبير
اما صابر قلتلو نهارك طويل
رحت رفده قالو احسن رحت حبسه

المهم
حضرت اول اجتماع
كان معانا كام وزير على كام بتاع
قالو انت المهم تكون مصحصح للجماعه
وانت عارف مين بنقصد بالجماعه
قلت خير ... هو فيه حد منكم حاسس بحاجه
قالو طبعا
قلت سهله نقبض عليهم
وكمان زويهم
ونداريهم
ونحاكمهم حكم عادل
دى المحاكم العسكريه ميه ميه
حكمها جاهز ونافز
المهم
قالو خلصنا اجتماع
نفذ انت الاتفاق
اديت اوامر للعساكر
هاتو كل حقود مغامر
هاتو امه هاتو بنته هاتو كل عجوز وراجل
هتلاقوهم فى المساجد
والمحاكم عسكريه
والقضايا هيه هيه
والتهم زى ماهيه
ونكمل المره الجايه

02 January 2008

كان ياما كان

كان ياما كان ... فى سالف العصر والاوان

السنة اللى فاتت مش زى دلوقتى لا على شهر خمسة كده كان هنا فى ناس كتيييييييييير فى المدونة

كانت الناس دى بتكتب بوستات وبتعلق على كلامى والدنيا كانت زحمة قوى

منهم
مى اللى كتبتلنا بوست اسمه :

وافتكرتها النهاردة لما لاقيت ان النت جه تانى الحمد لله بعد فترة انقطاع وطول انتظار

والنهاردة بكتب انا هنا
عن الامتحانات وقسوتها
والاوراق وضخامتها
والاقلام وشخبطتها
وعن المحاضرات ولخبطتها
وعن عنيا اللى مش عارفة تفتح


....من كتر الفرجة على التليفزيون ....مش من المزاكرة يعنى لحسن حد يفتكر انى بزاكر ودحيحة ولا حاجة



ماشى يا زباين ...ما حدش بيدخل المدونة ولا بيسال عليا ولا على عابر السبيل
حتى صوت الشعب اختفى ..
وواحد من الشعب نوره انطفى ....
وسفاح كرموز راح واتنفى
...
وما عدش غير طائر حزين وعصفور المدينة وعلاء هما اللى بيكتبولنا هنا
ربنا يخليهم للمدونة


كل سنة وانتم كلكم طيبين وبعد الامتحانت نتقبال واحنا فايقين
وتوتة توتة فرغت الحدوتة