14 January 2008

سبت نفسى مره تحلم -عابر سبيل


سبت نفسى مره تحلم
المهم
حلمت انى بقيت كبيييييييييييييييير
والمهم كمان وزير
والاهم وزير كبير

قمت داخل على اللى تحتى من كبيرهم حتى الغفير
شلت ده .. وعينت ده
ابن خالتى من غفير يمسك مدير
والواد حميده ايوه جارنا عملت منه قائد مرور
والواد صميده ابن احمد
اديته منصب كبير
اما صابر قلتلو نهارك طويل
رحت رفده قالو احسن رحت حبسه

المهم
حضرت اول اجتماع
كان معانا كام وزير على كام بتاع
قالو انت المهم تكون مصحصح للجماعه
وانت عارف مين بنقصد بالجماعه
قلت خير ... هو فيه حد منكم حاسس بحاجه
قالو طبعا
قلت سهله نقبض عليهم
وكمان زويهم
ونداريهم
ونحاكمهم حكم عادل
دى المحاكم العسكريه ميه ميه
حكمها جاهز ونافز
المهم
قالو خلصنا اجتماع
نفذ انت الاتفاق
اديت اوامر للعساكر
هاتو كل حقود مغامر
هاتو امه هاتو بنته هاتو كل عجوز وراجل
هتلاقوهم فى المساجد
والمحاكم عسكريه
والقضايا هيه هيه
والتهم زى ماهيه
ونكمل المره الجايه

4 comments:

عصفور المدينة said...

وضعتها تدوينتي المختارة

عابرة السبيل said...

امممممممممم
ده كلام كبييييييييير
-----------------------
مش هو حلم؟ سالنا الشيخ سيد بقى وقالنا :
..خير للهم اجعله خير
صاحب الحلم ده :
عمره طويل ما بيخلصش ولا بالطبل البلدى ...والناس فاكرينه ليل نهار
وليه نصيب كبير من دعواتهم
بالخير بقى ولا الشر الله اعلم
دعاء ليه ولا عليه... انت اعلم

ده تفسير الحلم
------------------
ايه العبقرية دى ؟
ايه الجمال ده؟
احلم كمان وكمان وطلع المواهب المستخبية دى

مستنية بقية الحلم

الطائر الحزين said...

انها الحقيقة التى نختبء ورائها على انها حلم

واحد من الشعب said...

السلام عليكم
ازيك ياعابر

داكابوس وبيحصل كل يوم
اذا مش كل دقيقة تفتكر الناس بقت وحشة لدرجة دي لية؟
اوعا تقولى قلت الدين لان قى منهم
السجدة على جبينهم
تعيش وتحلم
...........
مستنى حلمك الجي .