28 January 2008

الاختلاف يفسد للود قضية

بما ان عابر لسه ما حلمش الحلم التانى
قلت ادخلكم انا بكابوس فى النص

الاختلاف يفسد للود قضية
اه والله
وبيفسد بيفسد فعلا
سواء اختلاف فى الراى او العقيدة او الدين او حتى اسلوب الحياة
ابسط مثال ..الجدل اللى كان داير على جروب الكلية بتاعتى ..بحث اتعمل من طالبة وكان بحث متميز اتقرر علينا دراسته ومزاكرته لانه جاى فى الامتحان (قال يعنى احنا ناقصين )الجدل ده كان حول عدم رجوع البنت دى للمصادر الاصلية للبحث
بغض النظر عن التفاصيل
الموضوع اتقلب من كونه نقاش علمى الى دفاع عن البنت اللى عملت البحث، الود لو ما كانش فسد فهو على اقل تقدير حمض

الاختلاف يفسد للود قضية ..
روح كده قول لصاحبك انت غلطت فى كذا ...هتلاقيه بصلك من فوق لتحت وسابلك الشارع كله مش البيت بس

جرب تانى تدخل فى نقاش علمى عن بحث هتعمله مع زمايلك .. هتلاقيهم كل واحد عايز رايه هو اللى يمشى ..وهتندم انك عملت بحث معاهم(الحمد لله انا جنبت نفسى الحكاية دى السنادى وكنت مع جروب زى العسل )وهتتجنب انك تشارك تانى معاهم فى بحث او اى عمل جماعى

معلش جرب كمان مرة تدخل فى نقاش مع اى حد فى اى حتة فى اى بلد فى الدنيا ..عن حاجة انتو الاتنين مختلفين فيها ..وظهر الاختلاف ده ...النقاش كانى هادى جدا ومحترم ..وكل واحد له رايه ..لو هو مش مقتنع برايك ..ولا عرف يقنعك ،هتحس انك عايز تنهى النقاش وخلاص ..اصله ما فيش فايده فيه ...


اذا الاختلاف يفسد للود قضية
دى نظريتى الجديدة ..مش لازم الاختلاف يبقى معناه اننا هنتخانق ونضرب بعض ومش لازم يكون الاختلاف فى الراى نهايته الخصام او الزعل ..بس بتكون نهايته نوع من تجنب المناقشة ...او الزهق من الطرف التانى ده ولو لساعة ..ربع ساعة ..دقيقة
حسب الموقف المختلف عليه

فما حدش يجى يقولى بقى الاختلاف لا يفسد للود قضية ...لا،يفسد بس على حسب احنا مستعدين ومتقبلين اد ايه الطرف التانى المختلف معانا فى الراى وعلى حسب اهمية القضية ...

انا ما بقولش ان ده صح ..انا بوصف الواقع اللى بيحصل ....انا كما بحاول استخدم عبارة الاختلاف لا يفسد للود قضية تجنبا لمجادلات او خناقة على وشك الحدوث ..لكن بيفضل جوايا لبعض الوقت كلام زى:
طيب ليه انا ما يتسمعش كلامى ؟
ليه ما يتاخدش برايى ؟
هو انا مش زيهم يعنى ؟
او مثلا :
هما اكيد غلطانين وبكرة يعرفوا انى انا اللى صح
او :هما حرين انا عملت اللى عليا

وهكذا ...
عرفتوا بقى انا بقول ليه الاختلاف فى الراى يفسد للود قضية

حد عنده راى مخالف لرايى علشان يقوله ؟
انا مستنية ..ها ؟ ..ما تتكلموا ...خايفين ليه ؟
انا سامعاكوا اهو ....

سلام عليكم

10 comments:

عابر سبيل said...

السلام عليكم
بالنسبه للحلم ده مش بمزاجى انى احلمه
المهم
بوست جميل كالعاده
بس انا شايف المقاله من وجه نظر تنيه
وطبعا الاختلاف لا يفسد للود قضيه
دى بالظبط زى قول الله عز وجل الطيبون للطيبات
والى انا عايز اقوله ان احنا المفروض اننا نعمل كده اى معنا الجمله يجب علينا ان لا يفسد اختلافنا من ودنا"
زى بالظبط ان يجب علينا ان نزوج الطيبون للطيبات
بس برضه اختلافى معاكى لا يفسد من الود قضيه

الطائر الحزين said...

اااه
هذه مشكلتنا الرجوع للحق


على المستوى الشخصى وعلى مستوى الدولة


اى مسئول يأتى لا يكمل ما بدأ سابقة ولكن يتفرد فى العبقرية بمفردة

اى رأى ما دام لا ينبع منك فهو رأى عقيم


عجبا

ان رسول الله صلى الله عليه وسلم رجع عن بعض آرائة

اهو الراى والمشورة أم هو الوحى

فلما كان الرأى والمشورة

نزل الرسول عن راية واتبع رأى الصحابى وتلاقت الفئتين عن بدر ومنعوا الكافرين من المدد بالماء


تحياتى

عصفور المدينة said...

نعم أوافق أوافق أوافق
المشكلة يا أستاذة أن هذه الأيام كثيار ما نسمع شخصا يدعي سعة الصدر وقبول النقد وووو
ثم إذا حدث أي اختلاف معه تجدينه شخصا آخر

هكذا علمتني الحياة في ظل العقيده said...

السلام عليكم ورحمة الله وبركاته
ازيك يا عابرة السبيل وازي عابر عامل ايه
كل سنه وانتم طيبين
بالنسبه للموضوع انا اوافقك الرأي لسبب واحد وهو ان الاختلاف يفسد للود قضيه

3abratalsabeel said...

سلام عليكم
-----------
عابر السبيل
------------
ماشى يا عابر السبيل
مش فاهمة حاجة طول مانت مختلف معايا يبقى مش فاهمة حاجة
----------------------------------
الطائر الحزين
-------------
عندك حق
وجبت انت النظرة الشاملة اللى عدت عليا
-----------------------------------
عصفور المدينة
_____________
الرابح الاكبر معانا النهاردة هو انت
علشان موافق بالتلاتة
-----------------------------------
هكذا علمتنى الحياة فى ظل اعقيدة
-----------------------------
مش عارفة يعنى انت موافق علشان موافق ولا علشان ما ازعلش والود يبوظ
-------------------------------
سلام عليكم

واحد من الشعب said...

ايه الكلام دا
لالالالالالالالا انا مختلف معاك
متساليش مختلف فى اية لانى انا نفسى مش عارف
المهم عايز اختلف فى الرآى وبس
كنت بهزر ..... كلامك صحيح ميه فى المية
عارفة انا لما بشاهد بعض الحوارات بضحك
لان فى الاخر شتايم وحاجات تنحدف
الناس مش طايقه بعضيها يجدعان
ربنا يستر

keda-sponsor said...

الخلاف يفسد للود قضيه

ده فعلا بيبقى مجود بس مش على طول

يعني بيتوفر في حاله ضيق الأفق و التخلف العقلي لطرفي النقاش لكن لو الطرفين ميه ميه و زي الفل .... مين هيزعل من مين ليه... هيخلصوا النقاش و الأتنين حبايب

صح ؟

فهمى لطفى said...

السلام عليكم
اعتقد انه عنوان ملفت ولكنه باطبع غير صحيح.
كان احد الصالحين يقول ( كنا نقول الراى ونتمنى الا يؤخذ به ) ولكن هذه القاعدة لها استثناءات ( علشان متزعلوش ) انا شخصيا لما خطيبتى بتختلف معايا بيدمر للود قضيه ( للدقائق على راى صاحب الحلم )

عابرة السبيل said...

واحد من الشعب
----------------
ربنا يستر
-----------------------------------
keda-sponser
------------
"ضيق الأفق و التخلف العقلي لطرفي النقاش""
ما حدش مقصود بكلامك ده هنا صح ؟
بس عندك حق
-------------------------------------
فهمى لطفى
----------
اهلا اهلا اهلا اهلا
والله المدونة فرحانة بيك

مش زعلانين طبعا
انت تقول اللى انت عايزه ...دى اول زيارة والتعليق ببلاش
بس بعد كده فى ضرايب وحاجات كده

طيب وليه تختلفوا ؟ولا سى السيد من اولها ؟
انا سالت عابر السبيل علشان اتاكد انك فهمى صاحبه
اهلا بيك مرة تانية

bota said...

السلام عليكم

في الزمان بتاعنا ده كل واحد شايف انه رايه هو الصح
معندناش ثقافه حوار
ورغم كل ده انا واحده من الناس بقعد اقول انا ممكن اتقبل الراي الاخر ومعرفش ايه وحاجات كبيره وساعات فعلا بعملها وساعات بعند مع راي الطرف الاخر لمجرد العند او فرض الراي وعارفه انه غلط
بس ربنا بهدينا جميعا
وربنا يوفقكم