16 April 2008

اسف ....مش هتقدر تجرح كرامتى

اسف ....مش هتقدر تجرح كرامتى
















الغريب ان يكون اللى قدامنا ...اللى بنتعامل معاه هو اللى ما يحافظش على كرامتنا
ساعات الواحد ممكن يقعد يجيب للناس اعذار ....واحد وسبعين عذر عملا بحديث الرسول صلى الله عليه وسلم
ويفضل يتحمل ...ويصبر ..ويقول لا الناس بتهزر ..لا يمكن مش قصدها ...اكيد هو يقصد حاجة تانية ...مش معقول تكون عارفة ان ده هيجرحنى وتقول كده ...لغاية ما الواحد يوصل للمرحلة اللى يقول فيها :
لاااااااااا
ااااااااااااااا كفاية كده
thats it
ما ينفعش اسيبهم يتعاملوا معايا بالطريقة دى


كنت دايما بسمع مقولة كده بتقول:
حب نفسك علشان تقدر تحب الناس
...رغم انها مقولة غريبة شوية ورغم انى ما كنتش بفهمها على بعضها كده ... لكن فهمتها اخيرا ما ينفعش حد يكون مش عارف قيمة نفسه ويحب اللى حواليه ..هيقعد يقول الناس دى بتحبنى ليه ؟ ولو غلطوا فيه هيقول طيب هعملهم ايه ...ويبدا يكلكع ويتعقد ويكره الناس...ويسيبهم والاصل ان هو اللى غلطان .......لان لو هو واثق من نفسه مش هيخلى اى حد يغلط فيه ...ولا يجرح كرامته ...هيحب نفسه ويقدر حب الناس ليه ...ويعرف يتعامل مع كل واحد على الاساس الصح.... فى واحد قال مثل غريب كده سمعته على الاذاعة الشهيرة اللى كل ما اسمعها اقرر انى ما اسمعهاش تانى وهى نجوم اف ام
المثل قال ايه :
حب البنت تلبك ...لب البنت تحبك يعنى من الاخر بهدلها هتحبك
...ايه العبط ده!!!!!!!!! اكيد اللى بيتعامل بالمثل ده انسان لا يفقه شىء فى الدنيا ...لان ابسط حاجة معروفة عن المراة اهم حاجة عندها كرامتها ...اذا اتهانت كرامتها بتهون عندها كل حاجة ...ممكن تبيع اى حد واى حاجة الا كرامتها
دى المراة السوية ...اللى عارفة قيمة نفسها ...

بجد حاجة بتستفزنى قوى فى الشارع ...ان الراجل يكون ماشى مع مراته ..ويقعد يبص يمين وشمال على اللى رايحة واللى جاية ...وممكن تكون مراته حلوة وامورة وكل حاجة ...لكن هو يعمل كده .... مش عارفة ليه مراته بتسكت على حاجة زى دى ...رغم ان ده اكيد بيجرح كرامتها ...ليه ما توقفوش عند حده وتقوله ما تحترم نفسك ..هو انا مش مالية عينك ؟....ما تخلى فى عينك حصوة ملح وتحترم انى ماشية معاك بصراحة انا ببقى عايزة اقوله كده ...واقولها انتى ازاى قابله انه يهين كرامتك كده ...بس بقول وانا مالى اخرب عليهم ليه
لان اكيد هى لو هتهتم بكرامتها ...مش هتقبل تكمل معاه حياتها بالطريقة دى

اكيد ان الخيانة هى اكبر جرح للكرامة .....ودى شرحها يطول ...
يجى بعد الخيانة ...احساس الواحد ان الانسان اللى بيحبه قلبه مش كله ليه .....بتتجرح كرامة الانسان لما يحس ان الشخص اللى بيحبه بيفكر فى حد غيره ..او بيقارن بين اللى بيحبه وحد تانى ...ملاحظين انى بقول ان الاتنين بيحبوا بعض ؟...طيب تيجى ازاى ان واحد فيهم يكون قلبه مشغول بحد تانى ..او بيفكر فى حبه القديم .....هو ما اجرمش لحد كده ...لكن ده دليل على ان حبه للطرف لتانى ده مش كافى انه يملا قلبه ..ومن القلب للقلب رسول... ازاى الواحد او الواحدة يفضل يحب انسان لسه متمسك بماضيه ...لسه فاكره ...بيقارن بين حبه الجديد والقديم
ما ينفعش

طول عمرى بكره انى اعايب على حد ...او اتريق على حد حتى لو بالهزار ....بعتبر ان اللى بيعمل كده ده ...مش بيتريق على اللى قدامه قد ما هو بيعترض على خلق الله ...بعتبرها جرح لكرامة الانسان ...ذنبه ايه اللى ربنا خلقه مش جميل ..او قصير ..او اسمر قوى ...اوتخين ...او رفيع ..او او او ..هل فى ايد الانسان انه يغير شكله؟؟...طبعا لا ...يبقى ليه الناس تتريق على بعضها ؟...
ممكن الواحد لانه واثق من نفسه يسيب الناس تتريق وتهزر عليه ويقول مش مهم ..مش فاهمين حاجة مساكين ...لكن لما يزيد الامر للتجريح يبقى الامر مختلف
يعنى مثلا بنتين طلعوا المترو النهاردة وواحدة منهم هاتك يا تريقة على صاحبتها ...حقيقى انا اضايقت ...يعنى هى شايفة كل العيوب دى فى صاحبتها ....... طيب مصحباها ليه ؟وبعدين البنت مافيهاش حاجة فعلا ..معرفش سكتت عليها ليه ..ما تقولها ما تبصى لنفسك انتى اللى ملكة جمال الكون يعنى !!!!!!!!

لازم كل واحد فينا يفهم ان زى ما هو ما بيقبلش ان حد يجرح كرامته هو كمان لازم يحترم كرامة الاخرين ...نفكر قبل ما نتكلم ...هل اللى هنقوله ده هيزعل اللى قدامى ولا لا ...هيضايقه ولا اهزر عادى ...حتى الهزار لازم يكون بعيد عن جرح الكرامة
ما حدش يسمح لاى شخص انه يجرح كرامته او يقلل من شانه
والا مايلومش الا نفسه بعد كده

اسف ...مش هتقدر تجرح كرامتى
دى حملتى الجديدة بعد حملة مقاطعة النسكافيه اللى نشرتها السنة اللى فاتت وما حدش عمل بيها برضه
مش هحط اللينك بتاعها واللى عايز يدور عليها يروح يشوف الارشيف

بس خلاص
سلام عليكم








7 comments:

هكذا علمتني الحياة في ظل العقيده said...

السلام عليكم ورحمة الله وبركاته

اولا ايه اخبار عابر وعابرة السبيل

ثانيا دي حامله تستحق المسانده

اختر لنفسك منزلا تعلو به *** او مت كريما تحت ظل القسطل
موت الفتى في عزة خير له *** من ان يموت اسير طرف اكحل

بس مش عارف ليه اول ما قرأت التدوينه قلبي اتقبض
ان شاء الله خير

Anonymous said...

اولا السلام عليكم
ثايا انا كمان حصلى نفس الى حصل لكنكورد
او اشد شويه
ده مش هعتبره تعليق لغايه مفهم ايه الدافع لكتبه هذا البوست

هكذا علمتني الحياة في ظل العقيده said...

يا جماعه اخباركم ايه
انا كل يوم
لا كل يوم ايه
كل ما بفتح الجهاز ادخل المدونه عشان اطمئن عليكم الاقيكم مش هنا
هضطر اشحن وانا مبشحنش غير كل كام شهر واتصل بالدكتور عابر واطمئن عليكم

عابرى السبيل said...

عابرة السبيل
--------------
احنا كويسين الحمد لله يا كونكورد
والبوست ده مش ليه علاقة بينا خالص
ما تخافش
عمر الشقى بقى
-------------
عابر السبيل

يرحمه الله يا حاتم
ادعيله هو مات من الحزن على الناس بتاعه العسكريه

nonoymm said...

يعني انا دخلت النهاردة في تدوينة هايلة بجد
بارك الله فيكي
هقولك ان اي حاجة تهون على الاقل بالنسبة لي الا جرح الحبيب
ربنا يكرمنا يارب وما نتهانش ابدا
تحياتي

monaliza said...

انا معاكى جدا
-----------------------------------
ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

عابرة السبيل said...

nonoymm
--------
اهلا بيكى يا نونيوم ...امين يارب
---------------------------------
monaliza
----------
طيب خليكى معايا على طول بقى

شكرا على الرد
--------------------------