12 June 2008

كل قدر الله جميل

عارفة انكم داخلين فاكرين بقى هتلاقوا حاجة ممتعة
خلصنا الامتحانات وافراج الحمد لله

لكن لان الحياة هى اللى بتمشينا
البوست جه النهاردة غير اللى توقعت انى اكتبه ،وغير اللى قعدت افكر فيه كتير واحلم بيه بقالى 24 ساعة

فيلسوفى العظيم اول كلمة سمعتها منه ودخلت دماغى هى :
كل قدر الله جميل

كلمة جميلة قوى ،تخلى الواحد يرضى بقضاء الله وقدره مهما كان ومهما حصل

النهاردة حصلت حاجة غيرت مجرى اليوم تماما ،وثبتت الكلمة دى فى دماغى اكتر،من يومين كنت بحلم باخر يوم امتحانات ،وبخططله هيكون عامل ازاى ،وبعدين ما نفعش التخطيط ده،وبدل ما كنت ناوية اخرج مع صحابى ونقضى اليوم كله بره ،ما نفعش ،وكنت زعلانة قوى ...زعلانة لانى سبتهم فجأة كده ومشيت وهما بيتحايلوا عليا استنى شوية ،

بس قلت كفاية انى هقضى اليوم مع اسرتى ،هو حد ليه غير اسرته برضه ،وسبحان الله ،يشاء ربنا انى اروح علشان الحق اقعد شوية معاهم قبل ما يجى خبر وفاة ابن اخت عابر السبيل

انا لله وانا اليه راجعون
طبعا ما يتوصفش الحزن والزعل
ابن اخت عابر السبيل كان لسه طفل عمره ما يكملش الاربع سنين ،طفل بريء جدا،هادى خالص ،ومامته فى غاية الطيبة
ولكن هو كده ربنا ما بيبتليش غير اللى بيحبهم

كل قدر الله جميل
،طبعا لا شك فى كده ،واول ما عرفت الخبر جه فى دماغى على طول الاية اللى فى سورة الكهف اللى هى :
بسم الله الرحمن الرحيم :
(فاردنا ان يُبدلهما ربهما خيرا منه زكوة واقرب رُحما)81
اكيد ربنا عمل كده لحكمة عنده ،واكيد ان ده الخير لامه ولابوه
ربنا يصبرها ويرضيهاويعوضها خير عن ابنها


ربنا ما بيعملش فى حد حاجة وحشة
كنت وانا صغيرة لما ابقى عايزة اروح رحلة مثلا وما ينفعش اطلعها لان ورايا امتحان او انا اللى تعبت وما رحتش،كنت ببقى زعلانة قوى ،لكن ماما كانت تقولى:ماتعرفيش الخير فين ربنا اكيد مش عايز يزعلك ،ربنا ما بعملش فى حد حاجة وحشة، وفعلا كنت اروح تانى يوم المدرسة الاقى البنات بتشتكى من ان الرحلة كانت وحشة او الجو ما كانش حلو اوحصلت مشكلة

كل حياتنا كده ،ربنا بيقدرلنا الخير
المهم احنا اللى نرضى بيه

معلش اذا كان البوست ملخبط ،لكن هو بيعكس اللخبطة اللى جوايا،كان نفسى يكون البوست مختلف النهاردة لكن :
كل قدر الله جميل


8 comments:

عصفور المدينة said...

عجبا لأمر المؤمن

mo'men mohamed said...

نعم يا استاذ عصفور
عجبا لأمر المؤمن
انا لله و انا اليه راجعون

ربنا يصبر اهله
السلام عليكم

Anonymous said...

سلام عليكم
بجد احنا كلنا زعلنا منك عشان استندلتي وسبتينا فجأة وخلعتي من غير ماحتى تودعينا ولا تقعدي معانا شويةبس مش مهم انتي متتنسيش ابداوحتفضلي علامة ف حياتي وحياة كل اللي عرفتيهم
بخصوص الموضوع بجد حاجة صعبة وربنا يصبر والدتة ووالدة ويعوضهم خير ويجعله في ميزان حسناتهم
مي سمير

عابر السبيل said...

السلام عليكم ورحمه الله وبركاته
نعم كل قدر الله جميل

الطائر الحزين said...

لا اله الا الله
قد جعل الله لكل شىء قدراً

عابرة السبيل said...

السلام عليكم
------------
عصفور المدينة
و mo'men mohamed
-------------------
ياسلام على التعليق
خير الكلام
--------------------------
مى سمير
--------
ما تكتبى اسمك الثلاثى بالمرةوالعنوان
وبعدين ايه الشعر الفظيع اللى كتباه عليا ده؟
استندلت؟
ماشى
بس جزاكى الله خيرا على التعليق
وربنا يصبر اهله
------------------------------
الطائر الحزين
-------------
خير الكلام برضه
جزاك الله خيرا على المروروالتعليق
--------------------------------
عابر السبيل
-------------
شكرااااا

----------------------

استنونى البوست الجاى
سلام عليكم

نونو said...

فعلا
دي حكمتي الابدية اللي دايما ماشية بيهااكيد الحاجة دي حصلت او ما حصلتش
لحكمة خير
واكشف ادام شوية ان ما كانش ينفع يحصل الا كدة
فعجبا لامر المؤمن ان امره كله خير
======================
انا لله وانا اليه راجعون
ربنا يصبرهم يارب
========================
متتاخريش اوي كدة
تحياتي

عابرة السبيل said...

سلام عليكم
-----------
نونو
-------
ازيك يا نونو عاملة ايه
كلامك طبعا مش محتاج تعليق عليه
انتى شايفاهم اهو كلهم كاتبين كلمة ونص

هحاول ما اتاخرش بالبوست الجديد
ان شاء الله يومين بالكتير

سلام عليكم