24 November 2009

انا شكلى اتضحك عليا وعندى احبااااااااااط


سلام عليكم
انا عارفة ان ماحدش هيرد عليا يمكن غير اسرتى الجميلة
لكن لازم اكتب بقى ما انا بكتب على طول

انا اتضحك عليا
اشتغلت وفى الاخر الراجل اختفى ومش عايز يبعتلى فلوسى

هو صحيح كان شغل من غير ما ادفع مليم لا مواصلات ولا كلام من ده
لكن كفاية انى اخدت من وقتى وجهدى عشان الشغل ده

عندى احبااااااااااااااااااااااط احبااااااااااااااااط احباااااااااااااااط
قد ماكان عندى انشراااااااااااااااااااااااااااااااااااح اول ما اشتغلت

هو صحيح انا كنت حاطة احتمال 90% انه ممكن يتضحك عليا
لكن برضه زعلاااااااااااااااااااااااااااانة

عندى احباط لدرجة انى ماشربتش شاى بلبن النهاردة
لدرجة انى استقلت من الشغلانة التانية وقلت مش عايزة اشتغل خلاص تانى

خدت ايه يعنى ؟
ولا حاجة

مالها البطالة ؟
مالها السرمحة فى المنتديات والمدونات ؟
مالهاااااااااااااااااااااااااااااا

انا زعلااااااااااااااااااان
خلاص كله ضاع كله اتدمر
منك لله ياشيخ جبتلى احباط

لا وانا عمالة احلم باول مرتب فى حياتى هعمل بيه ايه
بلا نيلة


21 November 2009

لا مش هينفع اسكت
















انا لغاية امبارح وبقول انا مش هعمل زى الباقى
انا هسكت وهخلينى هادية
مش هولع الدنيا اكتر من كده

لكن بجد كفاية كده
مش هينفع اسكت واكون هادية
قلت العروبة اهم
مش هفرح عدوى فيا

لكن بجد كفاية بقى
ايه الاهانة دى ؟
اخوات صحيح لكن لازم وقفة حتى مع اخويا

صحيح وقفنا جنب بعض كتير
لكن عيب بقى بجد عيب

وييجى امبارح يقول عايز دليل قاطع
وهو احنا من امتى بنفترى على حد؟
من امتى بندعى ان حد هاجمنا
احنا مش اسرائيل عشان ندعى ان غيرنا بيكرهنا

كفاية وعيب بقى لازم اعتزار رسمى اه غلطو حتى لو حد مصيبة سخنهم غلطو وشكلهم قدامنا وحش قوى
كفاية وعيب قوى
عيب قوى ان فرنسا قنواتهم تقول اننا احنا السبب واحنا اللى بهدلناهم
؟؟؟؟؟؟؟؟؟؟؟؟؟؟

ولا هو مش عارف ايه لما يقع تكتر سكاكينه؟

حسبى الله ونعم الوكيل

صحيح فى تقصير من ولاة امرنا
هما اللى استهترو بكرامتنا جوة بلدنا

لكن عيييييييييييييييب عيييييييييييييييييب عييييييييييييييييييب

وانا هرفع علم بلدى جوة وبرة بيتى وكلنا لازم نعمل كده ماحدش يعيط لا الموقف مؤثر اه وهما غلطانين اه

مابقولش حرب لان ده اللى عايزه عدونا ...عدو المسلمين
لكن لازم نقول للكل احنا هنا
لينا كرامتنا
ولينا قوتنا


مش بس نقول كده للجزائر اللى وقعت نفسها لعبة فى ايد عدونا لكن لكل العااااااااااااااااااااالم

احنا هنا احنا المصريين

لحظة هدووووووووووووووء مسروقة

فى السفر
ولما يكون بيطول
ممكن تسرق لحظة هدوء
تغيب فيها بذهنك عن الدنيا
عن المسئولية اللى وراك واللى مستنياك
عن الدوشة
تغمض عينيك وتسرح فى زنة الطريق
وبعدها تتعود ودانك عليها
تنسى كل اللى حواليك
تفكر بس انك اخيرا قاعد مش هتعمل حاجة على الاقل ساعة

ويبقى ليك الاختيار انك يا ترتااااااااااح ياتفكر فى حاجة واحدة بس شغلاك
يا تنااااااااااااااااااااااام

لحظة ما بتتكررش كتير
عشان كده انا بعشق الطريق
طريق السفر

10 November 2009

اغماء

اعدت طعام الغداء
جلست تاكل مع اسرتها كالمعتاد وعلى غير المعتاد استطاعت ان تاكل دون توتر من بكاء صغيرها
لم تستطع ان تكمل طعامها فلم تستسغ مذاقه ولا مكوناته التى حرصت ان تتطا
بق فى اعدادها مع الوصفة فى كتاب الطهى
بعد الاكل بقليل شعرت بالرغبة فى النوم
تمددت بجانب صغيرها الذى ظهر عليه ايضا النعاس واغمضت عينها
استيقظت وجدت الحال كما هو فالزوج قد خرج بحثا عن رزقهم وصغيرها بجانبها ينام كالملائكة
تعجبت من كونه لم ييقظها ببكائه كالعادة لكنها شعرت بانها نالت قسط كاف من النوم
رفعت راسها شعرت انه كالحجر الثقيل لا يتحرك كررت المحاولة جاهدة ونفضت عنها النوم

تحركت كالبالون يمينا ويسارا رغم خفة حركتها لكنها تشعر بضيق شديد يطبق على صدرها
شربت كوبا من الماء واعدت كوبا من الشاى بخمس ملاعق من السكر على غير عادتها
لا تزال تشعر بانها نائمة وتحلم
لم تستطع ان تكمل الشاى الذى شعرت بانه يزيد الامر سؤا

جلست تكتب هذه الكلمات بيد كسولة متثاقلة وعين تغطيها نظارة غريبة الشكل تعينها على القراءة فى اوقات جهدها

تنظر الى ما كتبته بتعجب
ماهذا الذى اكتبه ولماذا ولمن ؟

لكنها تستمر فى الكتابة لعلها تستفيق من هذه الاغمائة
تنظر للهاتف وتحدث نفسها بان تتصل بزوجها ليعود لعله يعرف سبب لما هى فيه لكنها تتراجع حتى لا تشغله او تفزعه

تضع راسها المثقل على المنضدة امامها وتضغط
نــــــــــــشــــــــــــــــر


08 November 2009

تاج تاااج تاااااااااااااااااااااااااااااج المحبة اتخرم وعايزله بونتة لحام


التاج ده من مامتى ومامة الناس كلها
الفراغ
وانا بقى مابصدق حد يبعتلى تاج رغم انه بيبقى ساعات فيه اسئلة صعبة وطالب صراحة عادة مابحبهاش
بس برضه ساعات الواحد بيحب يتكلم ويقول كل اللى جواه

يللا نبدا لان التاج طوييييييل
بسم الله الرحمن الرحيم

انت مين بقى؟
انا عابرة السبيل ام بقلظ باشا والحمد لله

عندك كام سنه؟
ولو انه عادة ماحدش بيقول الحق لكن 23

هل انت متزوج ؟ وهل عندك اولاد؟
الحمد لله عندى مصطفى "بقلظ باشا"

دراستك ايه؟
خريجة كلية الاقتصاد والعلوم السياسية بكالريوس العلوم السياسية وتطبيقات الحاسب الالى

كم طولك...وما لونك...
احم احم
طولى كويس ولونى كويس الحمد لله

هل تمارس عملا بشهادتك ام عمل حر وماهو
لا طبعا شهادتى لسه ماجالهاش نصيب اشتغل بيها
ولسه بادئة شغل جديد مش باينله اول من اخر بس اهو شغل بقضى بيه على الوقت الفاضى

ماهى مدة عملك اليوميه
هو عمل حر بمزاجى ...ساعة ساعتين وساعات اليوم كله

ماذا تفعل بوقت فراغك
مافيش الحمد لله بسبب انشغالى الحالى ببقلظ والشغل

هل لديك هوايات....وهل تمارسها
عندى والله بس مش بمارسهم خالص دلوقتى
عندى هواية الرسم والشعر والطبيخ بفن بس هيجى يوم وارجعلهم تانى ان شاء الله

هل تشعر برضا ربنا عنك ؟
والله ساعات بحس بكده لكن معظم الوقت بحس انى مقصرة

هل تحب؟...ومن بقلبك الان؟
اااااااه بحب حبايبى
زوجى وامى واختى وبقلظ باشا الحمد لله

لو لم تجد من تحب ....فماذا ستفعل؟
اكيد هلاقى لكن لو ماللقتش اشغل نفسى واموت روحى فى الشغل وهيجى الحب من تانى حتى لو حد مختلف

عندما تكون فى موقف اتخاذ القرار..تخالف الجماعه.. ام تشرك معك الاخرين ؟
لازم اشرك الاخرين وبعدين اعمل اللى يريحنى انا لو الموضوع خاص بيا لوحدى
لو ليه علاقة بالكل يبقى لازم الكل يبقى موافق وراضى

هل تتعامل بواقعيه؟
جدااااااااا وده بيزعل ناس كتير منى لانى مابطلبش حاجة غير اللى ممكن تحصل ولا بضيع وقت فى حاجة مش شايفة انها ممكن تتم

ماهو الشيء الذى فعلته وندمت عليه طول عمرك ؟
اخخخخخخخخخخخخخخخ ليه السؤال ده بس
خليها بينى وبين نفسى احسن

هل تصارح غيرك بالحقيقه ؟ ام تقول له مايريد سماعه؟
والله ...على حسب الموقف لو الحقيقة مش هتنفعه ولا هتضره بلاش منها لو هتزعل
لكن لو شايفة انها بيترتب عليها حاجات مهمة يبقى الصراحة مافيش احسن منها حتى لو هتزعله

صف انسان يمكن ان تحبه عمرك كله
اللى بيحبنى وبس

متى يقسوقلبك ؟
ومتى يقسو لسانك؟
يقسو قلبى لما احس ان اللى قدامى لا بيحترمنى ولا يستحق الاحترام ولا الرحمة
ويقسو لسانى نادرا لكن لما بستبيع بقى واللى يحصل يحصل

من هو اول من قلت له احبك؟
ماما
:)

هل يمكن ان تحب احد من المدونين؟
وهل يمكن ان يكون شريك حياتك؟
خلاص بقى راحت على السؤال ده
الحمد لله دخلت القفص وان كان شريك حياتى شريك فى المدونة بس ما بيكتبش فيها

ماذا تعنى لك المرأة او الرجل؟
المراة شخص عادة حنون وعاطفى وبيتحنن قلبه بكلمة حلوة ولمسة طيبة لكن ما بيضحكش عليها الا بمزاجها
ولما بتتجرح بقى ....كيدهن عظييييييييييم
الرجل شخص عادة عقلانى وعملى بيتحنن قلبه باكلة حلوة وابتسامة وبرضه بيضحك عليه بمزاجه ولما بيتجرح بيبقى عنيد
لكن ما بين ذلك وذاك فيه ظروف نفسية واجتماعية بتغير البنى ادم


فى زمن البحث عن الماده ..عن ماذا تبحث انت ؟
ابحث عن 10 جنيه اجيب بيها ايس كريم
:)

متى تعرف انك تحب ؟
لما بسامح وبعمل نفسى مش شايفة عيوب اللى قدامى

ماهى الشخصيه التى اثرت بحياتك ؟
اممممممممممم
مامتى حبيبتى اكييييييييييد
وزوجى
وبينهم شوية ناس مش اساسين فى حياتى لكن اثرو عليا بمواقفهم معايا


هل يوجد من تراه سعيدا فى الدنيا ولماذا ؟
ايوة فى ناس سعيدة
كل واحد على حسب هو بيشوف السعادة ازاى
لكن اؤمن ان السعادة فى الرضا

سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا
لااااااااااااااا اكيد هخرج طبعا واتفسح
هروح لماما وبعدين نطلع على اسكندرية اللى بحبها جدااااااااااااااا
وبس

ماهى درجة صراحتك ؟
وماهى المواقف التى يمكن ان تكذب فيها ؟
امممممممممم يعنى تقدر تقول 90%
انا مابحبش الكدب يمكن لانى لما بكدب بلخبط الدنيا وبتكشف وبيبقى شكلى اوحش من انى اقول الحقيقة
لكن ممكن اكدب فى حاجة مش هتضر حد لكن هتضرنى انا

هل يتغير الحب بعد الزواج؟
بيتغير اكيد بس لدرجة اخرى من درجاته اللى هى المفروض تكون السكن والمودة والرحمة

فيما تفكر الان ؟
بفكر بعد ما اخلص الاجابات دى هنشر البوست ولالا

لو لم تعيش بمدينتك؟؟؟فاى مدينه اخرى تفضلها
اسكندرية على البحر مباشرة
رغم انى بخاف من العوم

من اول من ياتى ببالك لتحكى له اسرارك؟
نفسى ثم نفسى ثم ورقى ثم على حسب السر بقى يا ماما يا زوجى يا اختى يا صاحبتى يا الشارع يا مدونتى وفى الحالة دى مابيفضلش سر

من تريد ان يكون دائما بجوارك ؟
حبايبى بس

من هو الد اعدائك؟
الفشل والكداب والخائن

ومن هو صديقك
اللى يفهمنى من غير كلام ورغى كتير من كلمة يفهم قصدى

ماهى صفات شريك العمر؟
اممممممممم
خليها دى تعرفوها البوست الجاى

لو الدنيا كلها زيك....لمن تقول هذه العباره ؟
لماما : لو الدنيا كلهازيك كنا نبقى فى الزمن الجميل

ماذا تكره فى الدنيا ؟
وماذا تحب
بكره برضه الخيانة والكدب والغش
وبحب الهدوء والصراحة وحسن النية

كيف تواجه مايضايقك
وماذا تفعل عند المفاجآت
الاول بزعل وبتعصب وبشتم وبعدين بهدى وبفكر واحاول اشوف اخرج من الزهق ده ازاى او العكس بنفس الترتيب برضه
فى المفاجئات بيبقى شكلى يضحك وشى بيحمر وبتخض واتلخبط وماببقاش عارفة اعمل ايه

لو معاك فلوس اكثر مما تتخيل...فماذا ستفعل بها
هعمل بيها كل اللى بتخيله وكل اللى بحلم بيه ونفسى فيه واحاول احقق للى يستاهل اللى نفسه فيه واتصدق وازكى عشان ترجعلى الفلوس اضعاف اضاعفها وافضل اصرف واجيب ايس كريم ومش بعيد افتح مصنع ايس كريم جديد

هل الفقر يصنع حبا؟؟
وماذا لو وجد الحب فى زمن الفقر المادى؟
مش هيعيش الحب ده الا لو كان فيه حب قبل الفقر وعاشو بقى على الحلوة والمرة سوا وكان عندهم اصل

ماهى اقسى صدمه تعرضت لها حتى وقتنا هذا
وماذا كان رد فعلك
وهل تعلمت منها شيء
هل انت على استعداد لتلقى صدمات اخرى؟؟
طويب

هل تصدق كل ماتقرا عن الاخرين كيف ترد على من لاتصدقه
لا ما بصدقش بصراحة كل حاجة
حتى لو صدقت فى الاول برجع افكر واشوف هل ده صح ولا الموضوع مش داخل دماغى
بسيب اللى يكدب ويفشر يفشر بس بحاول افهمه انى عارفة انه مش بيقول الحقيقة


اذا احببت انسان ما ...هل تصرح له بحبك ؟
وماذا تفعل لو لم يتجاوب معك؟
هل تؤمن بالمثل القائل:انا احب فانا اعيش
مابقولش غير لما هو يقول ولو ماتجاوبش معايا خلاص احسن هتحايل عليه ولا ايه ؟هو العمر قد ايه يعنى ؟
ايوة لازم الواحد يحب عشان يحس انه عايش

ماهى القضايا التى تشغل بالك؟
يعنى حاجات كتير شخصية وعامة
وربنا يكون فى العون

هل تستطيع تحقيق كل احلامك
هل تمتلك طموحا...وماهو؟
كيف ستحقق طموحك...ام سيبقى حلما فقط!!!!!!!!!!
لا مابقدرش احقق كل احلامى
ولكن لو لاقيت الظروف تسمح طموحى بيظهر وبيكبر وينتشر ويتوغل


ماهى علاقتك بالدنيا
ماهى علاقتك بالموت
الدنيا ساعات وساعات
ساعات بتبقى كل حاجة وساعات ولا حاجة وولا تسوى
الموت عندى بداية مرحلة جديدة بتمنى انها تكون مرحلة حلوة يااااااااااارب ويكتبلنا كلنا حسن الخاتمة

لو لك اختيار زمن تعيش به....فماهوذلك الزمن ؟ ولماذا ؟
الزمن ده لانه اكيد اللى يناسبنى والا ماكنتش هتولد واعيش فيه

هل يمكن ان ارا ك وانت غائب؟؟؟؟؟؟؟
ازاى يعنى ؟مش فاااااااااااااهم

ماذا ترى فى نفسك مميزا عن الاخرين؟
ولا حاجة خالص مش مميزة ..عادى يعنى

من اذا اقترب منك ...هربت منه بعيدا؟
المتطفل الفضولى اللى عايز يفرض نفسه عليا
واللى يعمل نفسه حبيبى عشان مصلحته والغريبة انى بساعده شوية لكن بعد كده بزهق وابعد

من تقول له : قرب منى قرب ...ياقلبى يا متغرب
بابا وجدو واحشنى الله يرحمهم
بس نتقابل فى الجنة ان شاء الله

ماذا تريد ان تقوم به قبل ان تموت
اصلى ركعتين واستغفر ربنا
واصل رحمى واصالح اى حد مزعلاه



مارايك فى اسئلتى؟؟؟ وبدون مجامله

هل نسيت سؤال كان هاما بالنسبة لك؟
لااااااااااااا خالص
فاضل بس رقم التليفون والعنوان
الاسئلة حلوة بس طويييييييييييلة

هل استطعت تغطية شخصيتك
مع ملاحظة انى ماليش فى الكوره..........هههههههههه
مش عارفة لو الاجابة كانت كافية لحضرتك يبقى اه

من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
بما انى عندى ياس من المدونين
يبقى ماما واختى وزوجى كفاية
واللى يحب يجاوب يجاوب انا مابطلبش حاجة من حد


شكرا ليكى يا ماما على التاج كان جميل وكنت مبسوطة وانا بجاوب



05 November 2009

الاسبوع ده بتااااااااااااااااعى

السلام عليكم
انا بحب شهر 11
وبحب كل حاجة فيه حتى لو كانت نص كم

الاسبوع ده بتاعى اناااااااااااااااا
عشان انا اتولدت فى الاسبوع ده

اه يا خفيف قعدت اسبوع بتولد فيها ايه يعنى


يعنى انا عيد ميلادى الاسبوع ده

واحلى حاجة فى عيد الميلا
د هى طبعا
.
.
.
.
.
.
.
.

الهداياااااااااااااااااااااااااااااا

هعهعهعهعهعهع
والهديا
مالهاش طعم من غييييييييييييير
.
.

.
.
.
.
.

.
التورتااااااااااااااااااااااااااااااا

هعهعهعهعهعهع
والتورتة مالهاش طعم من غير

.
.
.
.
.
.
.

.
حبايبييييييييييييييييييييييييييييييييييى




02 November 2009

بوست للحبايبى

انا بحبكم
بحبكم
بحــــــــــــــــــــــــــبـــــــــــــــــــــــــكم كلكم

لا مش انتو يا غلسيييييييييييين
انا بحب حبايبى بس
حبايبى اللى بلاقيهم جنبى فى اى وقت وفى كل وقت

حبايبى وبس
والباقى خس

01 November 2009

ماليش نفس اعلق عند حد

عمرك حسيت انك هوا؟
ماحدش شايفك ولا حاسس بيك
اهو انتو بتحسسونى بكده
بتستكتروا فيا التعليق
واعلق عندكم ما تردوش عليا
هوااااااااااااااااااااااااااااااااااا
ولا يهمكم ..عادى عادى
يللا اقفلو المدونة وروحو غيرها
واكتبو تعليق هناك

تصبحو على خير


مش باقى منى غير شوية ضى فى عنيا انا هديهوملك وامشى بصبرى فى الملكوت
مش باقى منى غير شهقة فى نفس مقطوع
وانا صوتى مش مسموع...








ما بين الانتظار والانتظار ...هناك انتظار

السلام عليكم

الانتظار ده حاجة مملة قوى قوى قوى
ما بحبووووووووووووش خ
الص
وده لانى ماعنديش صبر خالص
ومستعجلة على طول على طول


وما بين الانتظار الا
ولانى.
.
.
.
.
.
.
.
.
والانتظار التانى

.
.
.
.
.
.
.

هناك انتظار فى النص


فهل وانا قاعدة مستنية كده هستنى تانى ؟ ومن هنا ياتى الانتظار اللى فى النص
انتظار الانتظار



المهم بقى ان مش بعد كل الانتظارات دى انتظر كمان مرة لانى لما بنتظر كتير بطلع نتايج مش حلوة وعادة باخد قرارات غير سليمة من كتر صبرى
مهو للصبر حدود و انا اصلا ما عنديش
صبر

طيب حد يجيلى بعد كل الكلام ده يعمل نفسه فهم او بيحاول يقنع نفسه انه فهم كلامى ويسالنى ....انتى فى اى من الانتظارات التلاتة ؟
هقولك انى فى الانتظار الرابع

والسلام ختام

27 October 2009

هاااااااااااااا ....ده الشغل حلو يا جدعااااااان

لذة غريبة قوى بتيجى للواحد لما يحس انه نجح فى حاجة
يا سلااااااااااااااااااام على الاحساس ده مابيتقارنش باى حاجة تانية ولا باى احساس تانى
زى انتعاش الزهور

ياااااااااااااااااااااااااه ..بقالى كتير ماحستش الاحساس ده
من ساعة نتيجة اخر سنة ليا لما الحمد لله جبت المرتبة


النهاردة بدات فى اول شغل واول وظيفة ليا فى حياتى
صحيييييييييح هى وظيفة تقريبا من غير اجر
وصحيييييييييييييييييييييح انا مش هقولكم عليها
وده عشان ما تفرحوش فيا ولا تقولولى موت ياحمار

لكن فكرة ان انا الوحيدة من 6 غيرى اللى فاز بالشغل دى كفاية
نجحت فى انى اكسب وظيفة
تصدقو فعلا فى شغل موجود ياجماعة فى البلد
وفى ناس ممكن تشتغل


وانا بتكلم عن فكرة الشغل بس ما بتكلمش عن الربح
يعنى اقصد بدل ما الشباب قاعد فى الشارع وعلى النواصى ولا مقضيها شات وموبايلات
يدور على اى شغل يخطفه من الفراغ اللى هو فيه
يشغل دماغه ويخليها تتحرك شوية بدل ما تقف
يعافر وينجح مرة ويفشل مرة لكن اكييييييييييييييد هيتعلم

بجد النجاح حلو وبيدى للواحد طاقة انه يكمل فى طريقه

يمكن اكون متفائلة ؟
يمكن عشان اول يوم فى الشغل ؟
يمكن
بس اكيد ان اللى يدور هيلاقى



21 October 2009

i miss youuuuuuuuuu



i really miss you

i loved you so mush , but with all tests i passed i thought i hate you


i thought that i would never miss you again
but
i miss your smell , your all complex stuffs

i really miss you ........
my books
i miss my library , research , papers and pens
but
i am so sorry..... i am very busy to come back to you

i promise you, i will come back when i am ready....










12 October 2009

ايه اللى بيحصل لشبابنا ده؟

سلام عليكم

انا مش عارفة ايه اللى بيحصل ده؟
شباب مصر ماله؟
ايه اللى جرى ؟ولا هو كده من الاول وانا اللى ماكنتش واخدة بالى

حصل ده قدامى من اقل من خمس دقايق
فى وقت صلاة العشاء
بدل ما يروحو يصلو
يترصدو بنت فى الشارع ويتكفل واحد فيهم انه يخبطها بعجلته ويجرى
لا والباقى الهمام يروح عليها جرى يقولها مالك وسلامتك
!!!!!!!!!!!!!!!!!!!!!!!!!!!!!!
بصراحة مش عارفة امسك اعصابى من ساعة ما شفت ده بيحصل قدامى

صحيح البنت كان لبسها مش مظبوط
بس هل ده يديهم الحق انهم يعملو معاها كده؟
هل معنى ان البنت مخها تعبان ومش ملتزمة هل معنى كده ان كل اخلاقها وحشة؟
بصراحة لا

دايما بنقول البنات مفروض تبقى محترمة ولابسة كويس وماتمشيش فى شارع ضيق لوحدها
لكن نفترض انه ده شارعها
خلاص طالعة عمراتها
يحصل معاها كده؟

وليه دايما كل اللوم على البنت

حرام بجد حرام
كان نفسى انزل اهزق العيال دى
قمة الاستهتار والتخلف والفراغ
ماحسبوش حساب ان ممكن تكون اخت ليهم هى اللى فى الموقف ده ؟
ماحسوش بالرعب والالم النفسى قبل الالم الجسمانى اللى سببته الخبطة دى للبنت
البنت وقعت على الارض من شده الخبطة
صوت اهاتها هو اللى شد انتباهى للى حصل خلانى ابص من رابع دور اشوف ايه اللى بيحصل

ربنا يهدينا ويهدى شباب المسلمين
ويهدى الاهالى لتربية عيالها صح


تنويه :
هتوقف عن الكتابة لفترة
وده لان مافيش حد بيجى المدونة ولانى مش فاضية ازور المدونات والناس نسيتنى
ولاعادة ترتيب بعض الاوراق المبعثرة


05 October 2009

الامهات بتتعب يا رجاااااااااااااااااالة

سلام عليكم
-----------
اه الامهات بتتعب يا رجالة
حسو بيهم يعنى
صحيح النهاردة مش عيد الام
لكن هو لازم يبقى النهاردة عيد الام عشان تروح تصالح مامتك ولا تزورها ولا تجيبلها هدية؟

ما تقوم يابنى انت وهو تتصل بامك ولا تروحلها اوضتها وتقعد معاها شوية
ياخى انت لولا امك دى انت كنت ولا تسوى

هتقولى اشمعنى يعنى الرجالة اللى بتخصيهم بالكلام؟
عشان البنات بطبعها رقيقة وحنينة وان كان برضه فى بنات
مهيسة
قومى يابت منك لها انجرى روحى صالحى مامت
ك

خلاص كده ياباشا ؟خالصين؟


نرجع بقى
هى مش امك دى سهرت بيك وانت تعبان؟
فرحت بفرحك وزعلت بزعلك؟

يابنى دى امك دى لو لفيت كده حواليك مش هتلاقى حد يحبك باخلاص زيها

لا ...صحابك ميييييين ...فى الاخر الحياة بتشغلهم عنك
ولا مراااااااااااتك ...هى اصلا اصلا متجوزاك مصلحة مش عشان سواد عيونك
ماتزعلوووووووش
ولا جوزك ياختى هيعوضك عن امك ولو ثانية واحدة مع اول خناقة هتلاقيه بيقولك :
على اماااااااااااااك

والله يا جماعة الامهات بتتعب
واحنا مابنحسش بتعبهم ده
بناخد اهتمامهم وتعبهم لينا على انه شىء مسلم بيه
طبعا مش انتى ماما ...استحملى بقى
:)

انا كاتبة البوست ده النهاردة بعد تجربة يعنى مش كلام فى الهوا
وعشان كمان مش معقولة نستنى لعيد الام عشان نتكلم عن الام وعن حقها علينا
وطبعا ماننساش توصية الرسول صلى الله عليه وسلم على الام :
امك ثم امك ثم امك ثم ابوك

معلش يمكن البوست ملخبط شوية بس معلش عشان وقتى ضيق
سلااااااااااااام

16 September 2009

رمضان كريم

رمضان عدى جرى جرى جرى
ياترى هنلحق ليلة القدر ؟

كل سنة وانتم طيبين

نصيحة يا جمااااااااااااااعة
اللى فاضى يستغل وقته بجد
وبلاش تضيع الوقت فى رمضان
فاضل 3 ايام بس

كل سنة وانتم طيبين

25 July 2009

نعمة والحمد لله

السلام عليكم
صحيح تدوينتين فى الراس توجع
بس اهو ربنا سهل وكتبت

نعمة والحمد لله
--------------------
الاطفال نعمة من عند ربنا
زى ما قال ربنا سبحانه وتعالى : المال والبنون زينة الحياة الدنيا

فى ناس تقول بس ربنا قدم المال الاول يعنى معنى كده اللى معهوش ما يلزموش
ودول عادة بيبقو عنهدم عيال وقرفانين منهم
ما انكرش انى ولغاية ايام قليلة كنت حاسة بعبء كبير قوى من وجود طفل فى حياتى بعد عيشة الحرية وعبرت عن كده فى ام بقلظ

لكن فى لحظة هدوء وسكينة
قلت سبحان الله
ربنا انعم على الواحد بنعمة كبيرة قوى غيرى بيتمناها ومش لاقيها ولو حد ربنا ما رزقهوش باطفال لغاية دلوقتى ودخل قرا الكلام ده هيطلع يقول ناس بتتبتر على النعمة

ساعتها حسيت ان انا غلطانة انى بشتكى
الحمد لله

الانسان دايما كده الحاجة اللى بتجيله من غير تعب ولا طلب دايما بياخدها على انها شىء مسلم بيه
ومش بعيد كمان يقول ليه جاتلى الحاجة دى
وما يشكرش النعم

كل واحد فى حياته نعم كتير قوى ممكن مايكونش شايفها وممكن كمان يكون مش راضى عنها
وما يعرفش ان ربنا ما بيعملش حاجة وحشة فى حد
وسبحان الله
فى ايه فى القران : بسم الله الرحمن الرحيم
" ويبلوكم فى السراء والضراء وحين الباس "
والواحد ما يركزش فى الاية دى غير على الضراء بس مع ان الابتلاء فى السراء اكتر لان الانسان بينسى زى ما قلت قبل كده

الحمد لله حمدا كثيرا مباركا ملىء السماوات والارض


05 June 2009

فأعود للصمت

عندما تتخبط العواطف
وتتشابك الافكار
لا يسعنى سوى الصمت
واترك الاخرين يتحدثون
ظنا منى انهم يفهمونى
فاذا بهم يظنون ما يظنون وكانهم لا يعرفونى

واجد انى مجبرة على الكلام
ولكنى اعجز عن اخراج الكلمات
فاعود للصمت

18 May 2009

بنج نصفى

سلام عليكم
طبعا مش محتاجين اقول انى انا عابرة السبيل
الحمد لله اخيرا ربنا كرمنى ورجعت تانى المدونة بعد طول غياب
...بس ما حدش يفتكر انى هكون فاضية اكتب كل يوم بوست يعنى ممكن كل اسبوع ولا حاجة ...وكله على حسب الالهام
المهم ...من غير رغى كتير ولت وعجن ما بحبوش ندخل فى موضوعنا عشان كل واحد داخل فاكر انى ما كتبتش حاجة جديدة وجى بس يطل ما يضعش وقته...نبدا
بسم الله الرحمن الرحيم
-----------------
بنج
نصفى
---
------
يارب ما يتكتبش على حد ابدا انه يدخل اوضة عمليات
ولا يشم بنج ولا يتحط على وشه قناع اكسجين
الحمد لله دخلت انا اوضة العمليات ...واتبنجت بنج نصفى


وده معناه للى ما يعرفش ويارب ما يجرب ...ان نص جسمك يكون صاحى وفايق وقادر تتكلم وتشوف وتسمع كل اللى بيحصلك فى العملية والنص التانى ولا كانه يعرفك ...مخاصمك ...انت حاسس انه معاك لكن مش حاسس باى حاجة فيه ولا قادر تحركه
تبص عليه تفتكر ان رجلك اليمين لسه يمين تلاقيها راحت تكلم الشمال فى موضوع سر وشكلها ناوية تقلب شمال


افتركت وانا فى العملية يوم موت الانسان ويوم تغسيله وتكفينه
لما خلاص الروح تطلع ولكن الواحد يبقى شايف اللى بيحص
له ومش قادر يتحرك ولا يعمل حاجة شايف نفسه بيتغسل وبيتكشف وبيتشال ويتحط ولا بايده حاجة يعملها
ده لوحده فيه نوع من الذل ...قد ايه الانسان ض
عيييييييييييييييييف بجد ...مجرد جسد فانى
دمعتين على جنب كده
):


نكمل عشا
ن الوقت
تخيلوا بقى لو اللى بيتغسل ده كمان كانت نهايته مش حلوة ...مات فجاة على معصية ...زى ما سمعنا كتير حكايات بيتفضح فيها الميت بعد موته ...تخيلوا واحد شايف الناس بتشوف عمله السىء ده وقدامه وبعد موته ...ويسمع الكلام اللى بيتقال عليه
...
كووووووووول ده مش مهم قصاد انه خلاص ...بح ..فركش ..مش راجع ...ولا... كمان فايق وعارف نهايته ومستنى يتاخد القبر للحساب ...فايق وحاسس ومش قادر يتحرك ولا يتكلم ولا يرجع
يااااااااااااااااه ...صعبة قوى قوى
ربنا يحسن ختامنا

كمان وانا جوة جه فى بالى الاية من سورة يس :
بسم الله الرحمن الرحيم :
"اليوم نختم على افواههم وتكلمنا ايديهم وتشهد ارجلهم بما كانوا يكسبون "
صدق الله العظيم

لما شفت رجلى اليمين جنب الشمال كده قوى وانا مش عارفة اعملها حاجة ولا احركها ...قلت يااااااااااه رجلى دى بتاعتى دلوقتى ماشية بمزاجها كده ولا عارفة اتحكم فيها فما بالكم بقى لما ايدينا ورجلينا تشهد علينا واحنا واقفين زى كيس الجوافة مش قادرين نتكلم الحمد لله ربنا يحسن ختامنا يارب

خلصت الكلام ومش لاقية كلام اقوله غير اللى قلته
وحشتونى بجد ووحشتنى تعليقاتكم
مش عايزة شفقة ولا احسان ولا حمد الله على السلامة ولا الكلام ده
انا كويسة الحمد لله انا عايزة تعليق كويس بضمير
يللا سلام عليكم

21 April 2009

انا مش عابرة السبيل

ايون
انا مش عابرة السبيل
انا واحدة تانية خالص ...لا عندى مزاج ولا دماغ ولا كلام عشان اكتبه

اجيب كلام منين ؟ولا االف شعر ازاى وانا فى حاجة كاتمة على نفسى ومحسسانى انى برميل مليان ميا

اصبرو يا ناس ...لما عابرة السبيل ترجع اكيد ان شاء الله هترجع المدونة حلوة وجميلة ومليانة كلام مفيد

ما حدش يسال بقى فين البوستات الحلوة بتاعة زمان والكلام اللى يقطع القلب ده
كله راجع ان شاء الله بس فى وقته ...لما الالهام ييجى

انا لولا غلاوة المدونة عليا كنت قفلتها لغاية ما عابرة السبيل ترجع بس اهو من حلاوة الروح سايباها مفتوحة

يللا سلام

16 April 2009

وردتين



بلاش وردتين لحسن انتو دماغكم بتروح لبعيد وهتفتكرو ان الموضوع داخل رومانسية
والكلام اللى ما بقاش يجيب همه ده

و كل ما هنالك ان جاتلى وردتين النهاردة من جنينة ناس صحابنا ...بصراحة مافيش احلى ولا اجمل ولا اطعم منهم
الوردتين ماشاء الله
واحدة نبيتى وواحدة صفرا
ورحيتهم حلوووووووووووة

وكانى اول مرة اشوف او اشم ورد بلدى
امال الورد اللى كنا بنشتريه زمان ده ايه ؟اكيد مش ورد ...ده اكيد برسيم متنكر


بس خلاص


12 April 2009

الحمد لله


الحمــــــــــــــــــــــــد لله

مش عايزة اكتب حاجة تغير من الاحساس اللى جوايا او ما اقدرش اوصفه
وكل اللى فى دماغى من تفكير بيطلع فى الاخر ...الحمد لله وسبحان الله
وكلمة ماما المشهورة :لما ربنا يريد
الحمد لله
الحمد لله
الحمد لله


01 April 2009

ايه ده؟....يخرب بيت اللى يزعلنى


اه يخرب بيت اللى يزعلنى
فيها ايه يعنى ؟
مش الواحد لما بيلاقى حد زعلان قوى ويحب يواسيه يقوله خلاص يا عم يخرب بيت اللى يزعلك

انا بقى بقول لنفسى ما تزعليش يا حبيبتى ...يخرب بيت اللى يزعلك بس ما تعمليش فى نفسك كده
انا عاملة فى نفسى ايه؟مانا كويسة اهو


ولا يهمك ...فداكى يا روحى 100 كيلو دقيق ...ايه يعنى تحرقى نص كيلو يعنى؟
اه ايه يعنى ...ما انا كنت عايزة اعمل بسكوت والكتاب الغبى هو اللى قال سيبيه نص ساعة فى الفرن

ولا تسوى الدنيا حاجة طول ما انتى كويسة وبخير
ايه يعنى نص ازازة الزيت وقع على الارض ؟
ما تقع ...هو انا كنت بلعب بيها يعنى ما انا كنت بعمل الاكل

وفيها ايه انك كنتى هتكسرى طبقين ....ولا حاجة قصاد انك تكونى مرتاحة
مش انا اللى كنت هكسرهم يا ستى ...ولو حتى اتكسروا ...اشترى 12 بدالهم

وبرضه ايه يعنى انك بتكتبى فى المدونة وماحدش بيعلق غير قليل قوى رغم انك بتلفى على المدونات واحدة واحدة
ولا يهمنى ...انا بكتب عشان بحب اكتب...واللى مش حابب المدونة ما يعلقش وما يدخلش اصلا

ولا يهمك كمان من اللى داخلين يكتبوا وكانهم داخلين يسرقوا ...من غير لا اسم ولا فصل
ولا كأنى شايفة تعليقاتهم ...ولا هرد عليهم كمان

انا بقى مش عايزة حد يعلق
ولو حد علق هقفل المدونة خالص

بس هه

16 March 2009

احبااااااااااط اخر حاجة

انا اتخنقت ...الواحد يتعب روحه ليه طيب لما ماحدش هيحس باللى هو عمله ؟!!!!!!!! الواحد يفضل يشيل ويحط ويروح وييجى ويطلع وينزل عشان بس فى الاخر يسمع كلمة حلوة ...يحس انه عمل تغيير كويس للى حواليه ...يحس بالراحة النفسية ...يقوم بعد ده كله ...ولا حاجة ...ولا كلمة ...ولا نفس ....

احباااااااااااااااااااااااااااااااط من الاخر

اهو ده بالظبط اللى هيحصل لاخونا المسكين اللى اخترع عربية البودى بتاعها كله خشب وبتصميم جديد ...حد عرف عنه حاجة ؟

طيب مش مهم مافيه غيره كتير ...يعنى فى دفعتنا مثلا واحد اخترع اختراع كده والله انا مافهمتش حاجة فيه ...بس ساعتها عرفنا انه اختراع كويس وانه مستنى براءة الاختراع ...واستنى بقى يا سيدى على ما اللجنة تشكل لجنة فرعية ومنها تنبثق عدة لجان عشان يشوفوا اختراعك ده يستحق النظر فيه ولا لا... النظر ...مجرد النظر

هو ده اللى بيخلى بلدنا دى تتخلف اكتر ماهى متخلفة...الناس يأست من اى تغيير
اى تغيير ايجابى ...ويأست من انها حتى تحاول تفكر فى حلول للمشاكل اللى موجودة لان ماحدش هيسمع ولا هيهتم ولا هيعمل بالحلول دى
ان ماكانوش يتهموا بانهم بيشوهوا صورة البلد وبيتهموا الحكومة بالتقصير وكل شغلهم هو النقد اللاذع غير المبرر للحكومة النظيفة
مصر بتتقدم بينا يا جماعة والله ...الى حافة الهاوية

ومع الجو الجميل ده احب اعرض عليكم اخر اشعارى بعنوان :

يا مصر يأم الدنيا
--------------
يا مصر يأم الدنيا ....طيب فين ابوها ؟
قتلوه ولا سرقوه ولا نهبوها ؟

يا مصر ياشايلة جواكى حمل تقيييييييل
شايلاه لوحدك ...ماشية بيه يجى عشرتلاف ميل

يامصر حملك زاد قوى ...عارفة
لكن ماحد يحس بيكى بالعافية

يامصر ارضك ترابك ميتك نسمتك ليهم
وهما ياااااه على القسوة اللى فيهم

يامصر اوعى تعجزى ...اوعى تشيخى قبل الاوان
لسه نيلك بيجرى وذكر الله بيعلى فى كل اذان

يامصر ان سرقوا خيرك واكلو طيرك وشربو بيرك
جوه بيرك لسه فيه دهب ...يوسف شايل قناديلك

10 March 2009

فى بيتنا نت

سلام عليكم
بناءا على طلب الجماهير الغفيرة
نكتب اليوم ...بوستا جديدا
تاتااتاااااااااااااااااااااااااااااااااااااااااااااااااااااتشششششششششششش

فى بيتُنا نت
---------
بعد ان طال انتظاره ...وحفيت الارجل بحثا عن وصلة نت تتناسب مع الحالة الاقتصادية التى تنتاب البلاد ....وفقنا الله عز وجل الى الحصول على خط نت مش بطال ...بيقطع بس كل ربع ساعة ساعة...لكننا رغم هذه الصعاب نكتب اليكم اليوم

اول ما دخل النت بيتنا كان غير مرحب به مطلقا...وانهالت الاعتراضات :
من اين ؟ولماذا ؟وكيف؟وما الداعى ؟
كما وردت الانباء فى حينها عن سقوط امطار غزيرة ...وخروج الاف من المواطنين فى مظاهرات ترفع لافتات تطالب بقطع سلك النت

وفسر المحللون هذه المظاهرات بانها خوف لا ارادى للجماهير... الخوف من ضياع الوقت والعمر والنظر والفلوس


وخرج مسؤل كبير قوى بوزارة الداخلية يطمئن المواطنين بان هذا الخوف مبالغ فيه و سيتلاشى بعد فترة وجيزة لما يحسوا بالفرق الكبير وتبان عليهم النعمة

وفعلا ما عداش يومين اهو وبكتبلكم بعد ما كان النت عامل زى الكلب الجربان والواحد خايف يقرب منه

هذا وبالله التوفيق
دمتم فى رعاية الله وامنه
والسلام عليكم ورحمة الله وبركاته

08 February 2009

عصفورين بحجر واحد


كل شوية افتكر اول بوست تقريبا كتبته عن الشمع والنور وان المدونة دى انا كنت عملاها من الاساس عشان استفيد وافيد
وفعلا استفدت كتير لكن هل افدت حد فعلا؟
الله اعلم
انا جت عليا فترة كل يوم اصحى من النوم عشان اكل واشرب الشاى باللبن وبعدين اقوم اغسل المواعين واحط الغسيل فى الغسالة وبعدين اقعد اتفرج على التلفيزيون وبعدين اصلى وبعدين اطبخ وبعدين الاكل يبرد علشان عابر ما جاش فى ميعاده وافضل كده ما بين المطبخ والسفرة والتلاجة والغسالة
فى يوم صحيت قلت لااااااااااااااااااااااااااااااااااااا كفاية كده
استغربت قوى
ده اللى انا كنت عايزاه طول ما انا فى الدراسة
انى اقعد فى البيت بقى وكفاية وجع قلب ومشاوير وكتب وورق
ولما اقعد فى البيت ما يعجبنيش؟
صحيح البنى ادم مننا ما بيعجبوش حاله ابدا
قررت انى اثور
لازم اتغير
مصر بتتقدم بينا وهى دى مصر يا عبلة

وفى الاخر لقيت الحل انى انزل اتمشى كل يوم شوية من باب اشباع هوايتى فى السير والتامل... امال انا عابرة السبيل ليه
وعشان الصحة مابقتش زى زمان ما نفعش السير والتامل معايا ،مش لاقية تغيير

قلت ادور على حاجة تانية مسكت ورقة وقلم وكتبت
كتبت كتير وجبت القديم على الجديد
وفى الاخر قلت هو انا عايشة ليه اصلا ؟يعنى من الاخر ايه معنى الحياة عندى ؟
ولاقيت انى بس لو عملت حاجة واحدة صح لدينى الشيطان هيتكفل انه يشغلنى عنها بمليون حاجة تانية
وبس بقى
حطيت فى دماغى الفكرة وقررت ونفذت والنظرية طلعت مظبوطة 100% واتظبطت الحكاية

وربنا ذكرنى بحديث الرسول صلى الله عليه وسلم "انما الاعمال بالنيات وانما لكل امرء ما نوى"

فبقيت صحيح مشغولة لكن بحاول فى كل حاجة اعملها تكون نيتى لله واهو بكده ضربت عصفورين بحجر واحد
مليت وقتى والحمد لله بحاول اكسب ثواب

وعشان كده قلت لايونكن ما اقولش على اللى حصل ده لان اكيد فى ناس كتير عندها وقت فراغ مش عارفة تعمل فيه ايه ولا تعمل بيه ايه

بس خلاص
سلام عليكم

17 January 2009

تاهت عن بالى ازاى ؟

تاهت عن بالى ازاى اكتب عن غزة
وكسلت ازاى اقول كلمة رثاء
ازاى غمضت عينى انام واحلم ؟
وازاى بعد الحلم صحيت واكلت وشربت ؟

ازاى بضحك وبغنى ؟
وازاى فى عز همومهم بفرح وبرقص ؟

مش عارفة ازاى ؟ومش عارفة اعمل ايه؟
حتى الدعاء نادرا ما بدعيلهم

كنت نويت اعمل حاجة تقربا الى الله وسعى انى اكون مسلمة بحق وحقيقى وجهاد فى سبيله ما كنتش متخيلة ان ممكن حد هيوقفنى عن اللى ناوياه
لكن ...اكتر شخص تصورت انه هيؤيدنى ويشجعنى لاقيته بيقولى لا استنى افكر واراجع نفسى وراجعى نفسك تانى
ولاقيتنى بنساق ورا كلامه بدل ما اصر على موقفى وعلى اللى انا عايزاه واللى نويته

ادعولى ربنا يقوينى ويقدرنى واكون قدها وقدود