08 February 2009

عصفورين بحجر واحد


كل شوية افتكر اول بوست تقريبا كتبته عن الشمع والنور وان المدونة دى انا كنت عملاها من الاساس عشان استفيد وافيد
وفعلا استفدت كتير لكن هل افدت حد فعلا؟
الله اعلم
انا جت عليا فترة كل يوم اصحى من النوم عشان اكل واشرب الشاى باللبن وبعدين اقوم اغسل المواعين واحط الغسيل فى الغسالة وبعدين اقعد اتفرج على التلفيزيون وبعدين اصلى وبعدين اطبخ وبعدين الاكل يبرد علشان عابر ما جاش فى ميعاده وافضل كده ما بين المطبخ والسفرة والتلاجة والغسالة
فى يوم صحيت قلت لااااااااااااااااااااااااااااااااااااا كفاية كده
استغربت قوى
ده اللى انا كنت عايزاه طول ما انا فى الدراسة
انى اقعد فى البيت بقى وكفاية وجع قلب ومشاوير وكتب وورق
ولما اقعد فى البيت ما يعجبنيش؟
صحيح البنى ادم مننا ما بيعجبوش حاله ابدا
قررت انى اثور
لازم اتغير
مصر بتتقدم بينا وهى دى مصر يا عبلة

وفى الاخر لقيت الحل انى انزل اتمشى كل يوم شوية من باب اشباع هوايتى فى السير والتامل... امال انا عابرة السبيل ليه
وعشان الصحة مابقتش زى زمان ما نفعش السير والتامل معايا ،مش لاقية تغيير

قلت ادور على حاجة تانية مسكت ورقة وقلم وكتبت
كتبت كتير وجبت القديم على الجديد
وفى الاخر قلت هو انا عايشة ليه اصلا ؟يعنى من الاخر ايه معنى الحياة عندى ؟
ولاقيت انى بس لو عملت حاجة واحدة صح لدينى الشيطان هيتكفل انه يشغلنى عنها بمليون حاجة تانية
وبس بقى
حطيت فى دماغى الفكرة وقررت ونفذت والنظرية طلعت مظبوطة 100% واتظبطت الحكاية

وربنا ذكرنى بحديث الرسول صلى الله عليه وسلم "انما الاعمال بالنيات وانما لكل امرء ما نوى"

فبقيت صحيح مشغولة لكن بحاول فى كل حاجة اعملها تكون نيتى لله واهو بكده ضربت عصفورين بحجر واحد
مليت وقتى والحمد لله بحاول اكسب ثواب

وعشان كده قلت لايونكن ما اقولش على اللى حصل ده لان اكيد فى ناس كتير عندها وقت فراغ مش عارفة تعمل فيه ايه ولا تعمل بيه ايه

بس خلاص
سلام عليكم

5 comments:

Punny_Punny said...

ربنا يبارك لك في وقتك و حياتك
صحيح لما النية تكون خالصة لله في أي عمل ربنا بييسر العمل ده و يخلينا نستحمل مهما قابلتنا عقبات

الطائر الحزين said...

اذا صدقت النوايا يسر الله السبل

الفراغ said...

شوف يا ستى
صلى على النبى الاول
عليه الصلاة والسلام
حلو قوى اننا نعمل كل حاجه بنية انها لله
بس الاجمل لو كل واحد عمل بهذه النصيحه
ملحوظه
شكرا على زيارتك
وبعدين انا منساش اى حد وقف جنبى ولو بكلمه صغيره ممكن تضيءلنا طريق الحياه
دمتى فى كل خير

هكذا علمتني الحياة في ظل العقيده said...

عَنْ ابْنِ عَبَّاسٍ رَضِيَ اللَّهُ عَنْهُمَا قَالَ قَالَ النَّبِيُّ صَلَّى اللَّهُ عَلَيْهِ وَسَلَّمَ: (نِعْمَتَانِ مَغْبُونٌ فِيهِمَا كَثِيرٌ مِنْ النَّاسِ الصِّحَّةُ وَالْفَرَاغُ) [رواه البخاري]

موضوع مفيد

عابرة السبيل said...

punny -punny
------------
جزاك الله خيرا
مظبوووووووووط كلامك
----------------------------
الطائر الحزين
--------------
كونكورد
---------
خير الكلام ما قل و دل
-----------------------------
الفراغ
-------
عليه الصلاة و السلام

شكرا ليكى ولتواجدك المسنمر
-------------------------------