16 March 2009

احبااااااااااط اخر حاجة

انا اتخنقت ...الواحد يتعب روحه ليه طيب لما ماحدش هيحس باللى هو عمله ؟!!!!!!!! الواحد يفضل يشيل ويحط ويروح وييجى ويطلع وينزل عشان بس فى الاخر يسمع كلمة حلوة ...يحس انه عمل تغيير كويس للى حواليه ...يحس بالراحة النفسية ...يقوم بعد ده كله ...ولا حاجة ...ولا كلمة ...ولا نفس ....

احباااااااااااااااااااااااااااااااط من الاخر

اهو ده بالظبط اللى هيحصل لاخونا المسكين اللى اخترع عربية البودى بتاعها كله خشب وبتصميم جديد ...حد عرف عنه حاجة ؟

طيب مش مهم مافيه غيره كتير ...يعنى فى دفعتنا مثلا واحد اخترع اختراع كده والله انا مافهمتش حاجة فيه ...بس ساعتها عرفنا انه اختراع كويس وانه مستنى براءة الاختراع ...واستنى بقى يا سيدى على ما اللجنة تشكل لجنة فرعية ومنها تنبثق عدة لجان عشان يشوفوا اختراعك ده يستحق النظر فيه ولا لا... النظر ...مجرد النظر

هو ده اللى بيخلى بلدنا دى تتخلف اكتر ماهى متخلفة...الناس يأست من اى تغيير
اى تغيير ايجابى ...ويأست من انها حتى تحاول تفكر فى حلول للمشاكل اللى موجودة لان ماحدش هيسمع ولا هيهتم ولا هيعمل بالحلول دى
ان ماكانوش يتهموا بانهم بيشوهوا صورة البلد وبيتهموا الحكومة بالتقصير وكل شغلهم هو النقد اللاذع غير المبرر للحكومة النظيفة
مصر بتتقدم بينا يا جماعة والله ...الى حافة الهاوية

ومع الجو الجميل ده احب اعرض عليكم اخر اشعارى بعنوان :

يا مصر يأم الدنيا
--------------
يا مصر يأم الدنيا ....طيب فين ابوها ؟
قتلوه ولا سرقوه ولا نهبوها ؟

يا مصر ياشايلة جواكى حمل تقيييييييل
شايلاه لوحدك ...ماشية بيه يجى عشرتلاف ميل

يامصر حملك زاد قوى ...عارفة
لكن ماحد يحس بيكى بالعافية

يامصر ارضك ترابك ميتك نسمتك ليهم
وهما ياااااه على القسوة اللى فيهم

يامصر اوعى تعجزى ...اوعى تشيخى قبل الاوان
لسه نيلك بيجرى وذكر الله بيعلى فى كل اذان

يامصر ان سرقوا خيرك واكلو طيرك وشربو بيرك
جوه بيرك لسه فيه دهب ...يوسف شايل قناديلك

4 comments:

:) said...

احباط = يبقى انت اكيد اكيد فى مصر

Anonymous said...

السلام عليكم
انا عايز اعلق على الجذء الاول من البوست
انا متفق معاكى تماما ان لازم نلاقى شكر من الناس على الى بنعمله
يقول رسول الله صلى الله عليه وسلم من لم يشكر الناس لا يشكر الله

بس هل للشكر صيغه معينه بالتحديد ؟؟؟؟؟
وهل هو ثابت لكل الناس ؟؟؟؟؟
وهل لازم نسمع الشكر فى الوقت الى يعجبنا ؟؟؟؟
وبالصيغه الى تعجبنا ؟؟؟؟
وهل لو فرض ما لم يقدم هذا الشكر على الفور نزعل منه او نحكم عليه انه مبيقدرش الى بنعمله ؟؟؟؟؟

عصفور مهاجر said...

الأحباط مش عندك انت بس
دا عند كل الناس
وان شاء الله في الملتقي نقضي عليه خالص هناك سنجد الصدق والجديه ...
تابعي الموضوع الجديد
بالنسبه للجزء الثاني رائع
فيه مدونه بتكتب نفس الكلام تقريبا اسمها(هوهو) تجدي لنكه عندي
سلام
عصفور

3abratalsabeel said...

السلام عليكم
------------
:)
----
مظبووووووووووط
---------------------
المجهول
-------
يعنى انت ما شفتش غير الجزء الاول بس من البوست
ماشى
لو الشكر ما كانش له تاثير على الاخرين ما كانش يبقى ليه لازمة
وكل واحد ودماغه
يعنى فى ناس ما بتحبش حد يشكرها وفى ناس مش فارقة معاها وفى ناس بتحب تتشكر

المهم ان الشكر ده سلوك ورد فعل واللى بيتشكر هو اللى بيحدد شكله واسلوبه
بس خلاص
-------------------------------------

عصفور مهاجر
------------
واضح كده انه عند كل الناس وانهم مش ناقصين البوست بتاعى فماحدش علق عليه

شكرا على انك خدت بالك من الشعر
انت الوحيد اللى علق عليه

بالنسبة لهوهو انا هروح كده اشوفها
شكرا