25 July 2009

نعمة والحمد لله

السلام عليكم
صحيح تدوينتين فى الراس توجع
بس اهو ربنا سهل وكتبت

نعمة والحمد لله
--------------------
الاطفال نعمة من عند ربنا
زى ما قال ربنا سبحانه وتعالى : المال والبنون زينة الحياة الدنيا

فى ناس تقول بس ربنا قدم المال الاول يعنى معنى كده اللى معهوش ما يلزموش
ودول عادة بيبقو عنهدم عيال وقرفانين منهم
ما انكرش انى ولغاية ايام قليلة كنت حاسة بعبء كبير قوى من وجود طفل فى حياتى بعد عيشة الحرية وعبرت عن كده فى ام بقلظ

لكن فى لحظة هدوء وسكينة
قلت سبحان الله
ربنا انعم على الواحد بنعمة كبيرة قوى غيرى بيتمناها ومش لاقيها ولو حد ربنا ما رزقهوش باطفال لغاية دلوقتى ودخل قرا الكلام ده هيطلع يقول ناس بتتبتر على النعمة

ساعتها حسيت ان انا غلطانة انى بشتكى
الحمد لله

الانسان دايما كده الحاجة اللى بتجيله من غير تعب ولا طلب دايما بياخدها على انها شىء مسلم بيه
ومش بعيد كمان يقول ليه جاتلى الحاجة دى
وما يشكرش النعم

كل واحد فى حياته نعم كتير قوى ممكن مايكونش شايفها وممكن كمان يكون مش راضى عنها
وما يعرفش ان ربنا ما بيعملش حاجة وحشة فى حد
وسبحان الله
فى ايه فى القران : بسم الله الرحمن الرحيم
" ويبلوكم فى السراء والضراء وحين الباس "
والواحد ما يركزش فى الاية دى غير على الضراء بس مع ان الابتلاء فى السراء اكتر لان الانسان بينسى زى ما قلت قبل كده

الحمد لله حمدا كثيرا مباركا ملىء السماوات والارض


2 comments:

Anonymous said...

وهى دى عابره السبيل رجعت تانى
انا متفق معاكى تماما ان الاطفال نعمه من عند ربنا
بس لازم نتاكد اننا على قدر مسوليه تربيه هذه الاطفال
وان حياتنا بتتغير تماما بعد مبنكون اباء
عموما ربنا يعينك على تربيه بقلظ باشا ويباركلك فيه ويجعله عون ليكى على دخول الجنه

ماما said...

ربنا يخليهولك يا بنتى ويفرح قلبك بيه
ويجعله اهل للبر والتقوى
وينسعد بعزكم انتى وابوه....ويجعله من المؤمنين الصالحين الحافظين لكتاب الله والعاملين بما فيه

ودى اكبر نعمه ربنا ينعم عليكوا بيها
وربنا قال (لان شكرتم لاازيدنكم)