12 October 2009

ايه اللى بيحصل لشبابنا ده؟

سلام عليكم

انا مش عارفة ايه اللى بيحصل ده؟
شباب مصر ماله؟
ايه اللى جرى ؟ولا هو كده من الاول وانا اللى ماكنتش واخدة بالى

حصل ده قدامى من اقل من خمس دقايق
فى وقت صلاة العشاء
بدل ما يروحو يصلو
يترصدو بنت فى الشارع ويتكفل واحد فيهم انه يخبطها بعجلته ويجرى
لا والباقى الهمام يروح عليها جرى يقولها مالك وسلامتك
!!!!!!!!!!!!!!!!!!!!!!!!!!!!!!
بصراحة مش عارفة امسك اعصابى من ساعة ما شفت ده بيحصل قدامى

صحيح البنت كان لبسها مش مظبوط
بس هل ده يديهم الحق انهم يعملو معاها كده؟
هل معنى ان البنت مخها تعبان ومش ملتزمة هل معنى كده ان كل اخلاقها وحشة؟
بصراحة لا

دايما بنقول البنات مفروض تبقى محترمة ولابسة كويس وماتمشيش فى شارع ضيق لوحدها
لكن نفترض انه ده شارعها
خلاص طالعة عمراتها
يحصل معاها كده؟

وليه دايما كل اللوم على البنت

حرام بجد حرام
كان نفسى انزل اهزق العيال دى
قمة الاستهتار والتخلف والفراغ
ماحسبوش حساب ان ممكن تكون اخت ليهم هى اللى فى الموقف ده ؟
ماحسوش بالرعب والالم النفسى قبل الالم الجسمانى اللى سببته الخبطة دى للبنت
البنت وقعت على الارض من شده الخبطة
صوت اهاتها هو اللى شد انتباهى للى حصل خلانى ابص من رابع دور اشوف ايه اللى بيحصل

ربنا يهدينا ويهدى شباب المسلمين
ويهدى الاهالى لتربية عيالها صح


تنويه :
هتوقف عن الكتابة لفترة
وده لان مافيش حد بيجى المدونة ولانى مش فاضية ازور المدونات والناس نسيتنى
ولاعادة ترتيب بعض الاوراق المبعثرة


7 comments:

أحمد عاطف said...

الاخت عابرة سبيل

من ترتضي ان يتكشف سترها على كل من ذهب وجاء فلا تلومن الا نفسها وهي تعلم ان الطريق مليء بالجياع

الخوف كل الخوف على من تستر كل ما بدى منها من زينة ولا ترحمها الذئاب

تحياتي

ماما said...

بصى يا ام مصطفى
احنا نعمل اللى علينا والباقى على ربنا
وانا معاكى ان الشباب ملهمش حق فى اللى بيعملوه ده
بس زى ماهى ملتزمتش بشرع الله
متلمش غيرها على عدم الالتزام
وصدقينى يابنتى لما اقولك اذكار الصباح والمساء بترحمنا من ابتلاءات كتيره
((ومن يتقى الله يجعل له مخرجاويرزقه من حيث لا يحتسب ))

مهاجر فى وطنى said...
This comment has been removed by the author.
علاء سالم said...
This comment has been removed by the author.
علاء سالم said...

السلام عليكم

فعلاً دي مأساه كبيرة
وسببها الأهم مش بي حكايى التربيه
لكن السبب هو عدم وجود عقوبة

المقوله الشهيره بتقول من أمن العقوبة أساء الأدب

وحاليا معدش حد بيشغل دماغه بحد
وبدأت تختفي شهامة أولاد البلد فمعدش حد ممكن يكلمهم لما يعملوا كده
وحتى زمان كان فيه في كل شارع عسكري مهمته حفض الأمن والتصدي للأشياء اللي من النوع دا
وإحنا دلوقتي في حاجه لكده أكتر من زمان

خالص تحياتي

مهاجر فى وطنى said...

عابره السبيل
اولا شكرا لمرورك عندى
ثانيا والله معاكى حق فى انك تزعلى وتتخنقى كمان
الواحد بيشوف الى بيحصل فى فلسطين والشباب اللى معتصمين فى ساحات المسجد الاقصى ويقارنهم بهؤلاء الشباب بيتحسر
بس الموضوع لازم يتاخد بعين الجد خاصه فى البيوت يعنى ممكن يكون العيال دى اهاليها لا تعرف عنها شى بمعنى ان مادام الواد بيروح المدرسه والدرس وبيجى ينام اخر الليل فى البيت فخلاص
والله يا ريت يا جماعه ناخد بالنا من تربيه اولادنا شويه

YASMINA said...

لاااااااااااا
ماتقفليش المدونه
امال احنا هنقرا لمين؟؟

خليكى معانا